Read Batak Angkola BILANGAN 9 Bible Online

BILANGAN 9 - Batak Angkola bible

BILANGAN 9

¹Di bulan parjolo taon paduahon dung ditinggalkon halak Israel tano Mesir, didok TUHAN ma tu si Musa di Parhorsihan Sinai. Ninna Tuhan i ma,

²“Di tanggal opat bolas bulan on, mamungka sian na lusut mataniari, sude halak Israel angkon mamestahon Pesta Paskah mangihutkon aturan na dung nitotopkon.”

⁴Jadi disuru si Musa ma halak Israel mamestahon Pesta Paskah i.

⁵Jadi dung potang ari di tanggal opat bolas di bulan parjolo i, marpesta ma halahi di Parhorsihan Sinai. Sude dipatulus halahi tumbuk songon na dung diparentahon ni TUHAN i tu si Musa.

⁶Tapi mangihutkon aturan ni ugamo, adong do sanga piga-piga halak na ramun, hara ni na dais halahi tu bangke, gabe nada tola halahi marpesta Paskah di ari i. Dung i gabe kehe ma halahi tu adopan ni si Musa dohot si Harun,

⁷ninna ma, “Na ramun do hami, angke dais hami tu bangke. Tapi biasi dipaolat hami, gabe so tarbaen be hami dohot manghaulkon haulnami tu TUHAN rap dohot angka kahangginami sabangso?”

⁸Dialusi si Musa ma, “Painte hamu jolo lopus adong hujagit hata ni TUHAN.”

⁹Disuru TUHAN i ma si Musa

¹⁰mandok tu halak Israel, “Muda adong ditonga-tongamunu sanga sian pomparanmunu na gabe ramun hara ni na dais tu bangke sanga betak adong hatiha di pardalanan na dao, tapi giot dohot ia mamestahon Pesta Paskah,

¹¹tola do dohot ia mamestahon. Tapi dung salpu pe sabulan anso pestahononna, i ma di tanggal opat bolas bulan paduahon. Pestahon hamu ma disi lalu mangan roti na so marragi dohot sayur na paet.

¹²Ulang adong na nitinggalkon sanga panganon aha pe tu ari ancogotna i, jana nada tola hamu mamonggol holi-holi ni pahan-pahanan na haulkon tu Tuhan. Pestahon hamu ma Paskah i mangihutkon sude aturan.

¹³Tapi halak na ias mangihutkon ugamo nada muse di pardalanan ia, hape nada dipestahon ia Paskah i, nada etongon be halak i bangsongKu, angke nada dihaulkon ia haul tu Au di ari na dung ditontuhon. Taononnia ma panginona ni dosania i.

¹⁴Muda adong halak na leban na rap dohot hamu giot dohot marpesta Paskah, angkon pestahononnia do pesta i mangihutkon paraturan na mardomu tusi. Mangonai do uhum on tu sude jolma, bope halak Israel bope halak na leban.”

¹⁵Di hatiha pajongjongkon Bandar Parmianan Ni TUHAN i, di ari i ro ma sada ombun manutupi Bandar Parmianan. Muda borngin tarida ombun i songon api.

¹⁷Muda manaek ombun i dibuka halak Israel ma Bandar Parmianan anso mardalan halahi. Muda mijur ombun i dipajongjong halahi ma bandar i mangulahi.

¹⁸Marhite hata ni TUHAN, do dibuka halak Israel Bandar Parmianan, jana marhite hata ni Tuhan i muse nipasang mulak. Salolot di ginjang Bandar Parmianan Ni TUHAN i ombun i, laing tinggal disi ma halahi.

¹⁹Muda lolot ombun i tinggal di ginjang Bandar Parmianan, tunduk ma halahi tu TUHAN i jana nada pinda halahi.

²⁰Tapi huhul hum sanga piga-piga ari ombun i di ginjang ni Bandar Parmianan. Sanga na bia pe, marguru tu parenta ni TUHAN i do na manontuhon laing tinggal sanga pinda halahi.

²¹Huhul sian andospotang tu manyogot do ombun i maradian, muda manaek ombun i, halahi pe pinda ma. Ganop manaek ombun i angkon pinda halahi.

²²Bope na hum dua ari, sabulan, sataon sanga lobi, salolot tinggal ombun i di ginjang ni Bandar Parmianan Ni TUHAN nada morot halahi.

²³Sanga na tinggal bangso Israel di sada inganan sanga pe kehe tu inganan na asing sude mangihutkon parenta ni TUHAN na nilehen ni TUHAN i marhite si Musa.