Read Batak Angkola MIKA 5 Bible Online

MIKA 5 - Batak Angkola bible

MIKA 5

¹Tapi anggo ho, ale Betlehem Efrata, ho ma sada kota na ummenek di Juda! Hape sian ho ma giot pabangkitonKu sada halak na markuaso di Israel na marasal mula sian narobi.

²Hara ni i padiaronnia ma halahi lopus tubuan anak sada dadaboru na denggan hian pamatangna. Dung i pasadaonna ma mangulahi angka dongan sabangsona na adong di habuangan dohot bangso ni halahi.

³Markarejo ma ia jana marmahani halahi markite-hite hagogoon ni TUHAN i dohot markite-hite hamuliaan ni goar ni TUHAN Debatania sandiri. Mangolu di bagasan sonang ma bangsona i, dibaen okuon ni jolma na satano on do hagodangannia,

⁴jana ia do hadameon i. Muda ro tentara ni Asur mamorangi tanonta on dohot mangarumpakkon partahananta, pabangkitonta ma pitu halak parmahan mangalaho halahi, bope sanga salapan halak pamimpin ni jolma.

⁵Taluhonon ni halahi ma Asur dohot luat ni si Nimrod marhite podang; jana paluaon ni halahi ma hita sian halak Asur, muda ro halahi masuk tu tanonta dohot mamolus luatta jana mandege luatta.

⁶Halak Israel na teba i, gabe songon ombun na lambok ma i sian TUHAN maradopkon angka bangso na bahat, jana songon parro ni udan tu suan-suanan. Marpangunsandean ma halahi tu Debata, jana nada be tu jolma.

⁷Angka halak Israel na tading dope di tonga-tonga ni angka bangso, tudos tu singa ma i na manjalahi panganonna di harangan sanga di padang-padang. Manyaroso ma singa i tu tonga-tonga ni punguan ni biri-biri, soroanna ma biri-biri i jana parsibakkononna; nada adong na ro mangurupi biri-biri i.

⁸Taluhonon ni Israel ma angka musuna jana roncohononna i sudena.

⁹Didok TUHAN ma: “Masa ma di hatiha i, pangabisonKu ma angka kudo sian tonga-tongamunu jana ropuhonKu ma angka kudo porangmu.

¹⁰Huroncohon angka kota na adong di tanomu jana Hurumpakkon sude partahananmu.

¹¹Hulantuk sude angka ajimatmu jana Hubonom sude angka datumu.

¹²RopuhonKu angka patungmu dohot angka tugu pameleanmu; nada be sombaonmunu angka barang-barang na nibaen ni tanganmu sandiri.

¹³RumpakkononKu ma angka patung ni debata boru-boru Asera na adong di tanomu, jana Huroncohon angka kotamunu.

¹⁴Di bagasan panggasa-gasa ni murukKu, baloskononKu ma hajahatan ni sandok bangso na so marpangoloion tu Au.”