Read Batak Angkola MIKA 6 Bible Online

MIKA 6 - Batak Angkola bible

MIKA 6

¹Tangihon ma sanga aha tuduan ni TUHAN tu Israel. Jongjong ma Ho, ale TUHAN, jana pajojor ma pangaduanMu! Padiar ma dibege angka dolok dohot tor sanga aha na giot dokkononMu.

²Ale angka dolok, ale angka jongjongan ni tano, tangihon bo pangaduan ni TUHAN! Adong parkaroNia dohot Israel bangsoNa i jana giot tuntutonNia halahi.

³“Ale bangsongKu aha dehe na Hubaen tu hamu? Di pangalaho na dia do Hususai hamu? Alusi ma Au!

⁴Madung Huoban hamu haruar sian Mesir, jana Hupalua sian parhatobanan; Husuru do si Musa, si Harun dohot si Miryam laho mamimpin hamu.”

⁵“Ale bangsongKu, ingot hamu ma sanga aha na nisangkapan ni si Balak raja ni Moab i tu hamu, jana aha do alus ni si Bileam anak ni si Beor i tusia. Ingot hamu ma sanga aha na tarjadi di pardalanan antara ni parbandaran na di Sitim dohot na di Gilgal. Anggo diingot hamu do sudena i, torang do botoonmunu sanga aha na dung Hupatupa laho paluahon hamu.”

⁶Aha dehe sihaulkononku tu TUHAN, Debata na di banua ginjang muda ro au marsomba tuSia? Angkon obanonku dehe lombu jara-jara na ummokmok baen sihaulkonon gabe haul situtungon tuSia?

⁷Sonang dehe roha ni TUHAN muda huoban tuSia marribu-ribu biri-biri sanga miak zetun marlobi-lobi? Angkon haulkononku dehe tuSia anakku siangkaan baen tobus ni angka dosangku?

⁸Nada! Madung dipaboa TUHAN tu hita sanga aha na denggan. Anggo na nipangido ni rohaNia sian hita, i ma anso tigor pambaenanta, tadalankon ma holong ni roha, jana mangoku di bagasan toruk ni roha di jolo ni Debatanta.

⁹Habisuhon do muda mangkabiari Debata. Pio-pio do Ia tu halak na mangingani kota, didok Ia do, “Tangihon ma ale hamu na marlagut di bagasan kota!

¹⁰Di angka bagas ni halak parjahat, marpungu ma sinadongan na dapot sian dalan na so patut. Dipake halahi do parsuhatan na pargabus, i ma sada parbuatan na sai Huhagigihon.

¹¹Tarampuni Au ma he jolma na mamake timbangan na pargabus?

¹²Angka halak na mora di hutamu mamoroi do sian halak na pogos, jana pargabus do hamu sudena.

¹³Saonnari pungkaonKu ma mamotuk dohot manyarsarkon hamu hara ni angka dosamunu i.

¹⁴Mangan ma hamu, tapi nada marnabutong — mur tongtong noma malean. Angkatonmunu ma angka barang-barang, tapi nada tarjagohon hamu; sanga aha na nijagohonmunu roncohononKu ma i di bagasan parporangan.

¹⁵Disabur hamu gandum, tapi nada buatonmunu suhana. Ditanak hamu miak sian batu ni zetun, tapi nada buatonmunu suhana. Ditanak hamu miak sian batu ni zetun, tapi nada tarpake hamu miakna i. Diporo hamu anggur, hape nada inumonmunu.

¹⁶Tarjadi pe sudena i patunda ni na niihutkonmunu ma angka parbuatan jahat na nibaen ni Raja Omri dohot Raja Ahab, anakna i. Diihutkon hamu do antong angka pangalaho ni halahi. Hara ni i roncohononKu ma hamu, jana siincahan dohot silayason ni sandok bangso ma hamu.”