Read Batak Angkola NAHUM 1 Bible Online

NAHUM 1 - Batak Angkola bible

NAHUM 1

¹On ma tona ni Debata taringot tu Ninive. Marhite parnidaan do dipaboa tona i, i ma na dilehen tu si Nahum, sada halak panurirang sian Elkos.

²Nada ra TUHAN Debata marimbang, sanga ise na mangalo Ia, ingkon dapot uhuman. Di parpiar ni murukNa, tu halahi, dibaloskon Ia pambaenanna be.

³Nada mopop muruk ni TUHAN; lobi do kuaso diSia jadi sanga ise na marsala nada dipalua Ia sian uhumanNia. Sanga na di dia TUHAN mardalan, disi do ro halingsungsung; jana abuan ni patNia do ombun.

⁴Diondam Ia laut jana dipahiang Ia, sude batang aek di pahiang Ia. Gabe harsang Dolok Karmel dohot angka padang na di Basan jana di Libanon malos ma sude angka bunga.

⁵Humutur do angka dolok muda ro TUHAN; gabe malala do angka tor di adopanNia. Muda masuk TUHAN, humutur ma portibi, humutur ma tano dohot sude pangisina.

⁶Ise ma he bisa martahan muda muruk Tuhan? Ise ma tarbaen malua sian hamumurukNa? Palalu hosom ma Ia manggasa-gasa masarsar do batu gabe abu di joloNia.

⁷Na denggan do TUHAN i, ditolong Ia do bangsoNia taran marhasusaan, dijagohon Ia do halak na marsihohot tuSia,

⁸jana patariparhon halahi dompak ro banjir. Abiskonon ma sude halak na ro mangalo Ia, jana ayakonNia ma musuNia tu bagasan hagolapan.

⁹Aha dehe maksudmu mangalo TUHAN? Giot pangabisonNia do i; nada pola dua noli ro hasusaan.

¹⁰Angke halahi pe angkon mago songon duri na marsijalin-jalinan, abis matutung songon durame na mahiang.

¹¹Madung ruar sian ho, ale Ninive, sada halak na gok tahi na jahat. Na mambaen tahi do ia laho mangalo TUHAN.

¹²Jadi didok TUHAN ma tu Israel, bangsoNia i, “Haru pe gogo halak Asur i jana bahat bilanganna, tapi pangabisonKu do halahi sudena. Ale bangsongKu, Au do mambaen hamu marhancit, tapi nada ulahanKu be mambaen songon i.

¹³Saonnari ponggolkononKu ma boban na mamborati ho, jana gotapkononKu rante na manambat hamu.”

¹⁴On ma haputusan ni TUHAN maradopkon Asur, “Nada marpomparan be halahi laho paudut sundut ni bangsona. RoncohononKu ma angka patung ni gana-ganaan na adong di angka bagas pamelean ni debata ni halahi. Hatiha manghuar kuburan ma Au di bangso Asur, angke nada patut be halahi mangolu!”

¹⁵Ligi da, ro do sada suruan mamolus sian angka dolok, maroban jamita na denggan, barita hamonangan. Ale bangso Juda, pestahon ma ari pestamu jana haulkon ma haulmu tu Debata. Nada rajaan ni parjahat be tanomu. Ma pola sude halahi diabiskon.