Read Batak Angkola NAHUM 3 Bible Online

NAHUM 3 - Batak Angkola bible

NAHUM 3

¹Marjaya ma kota na gok pamunuon! Gok gabus do sude, na gok dohot panyamun, dohot panangkupon na so mar na so!

²Bege ma parlisik ni loncing-loncing dohot parderek ni kareta, pamakpak ni kudo dohot panghutur ni kareta.

³Ro ma parangan na markudo manyaroso, marjilam-jilam angka podangna jana marlinang-linang. Nada taretong bahat ni jolma na mate, marsidondonan angka bangke, mambaen jolma tartuktuk be.

⁴Sudena, i hara ni bahatna parkarosuanon ni dadaboru panggampang, na jogi rupana jana tukang sihir, na patundukkon angka bangso marhite parmainanna dohot angka marga marhite sihirna.

⁵Didok TUHAN Na Markuaso i ma, “Ligi da Au noma gabe alomu, sintakonKu ma ujung ni abitmi lopus tu bohimu jana giot patidahonon ma hahailamu tu angka bangso dohot dongan magodangmu tu angka harajaan.

⁶BaenonKu ho songon barang sihagigian, dangguranKu ho dohot kotoran; baenonKu ho gabe sitontonan.

⁷Mandao ma sanga ise na mangaligi ho jana dokkononna, ‘Ninive hum tading rompak-rompakna noma! Ise ma na dohot marsak dongannia? Nada adong na ra mangalehen apo-apo tusia.’ ”

⁸Dumenggan ma lakna ho sian Tebe, kota sabungan ni Dewa Amon, na maringanan di topi ni Batang aek Nil, na dihuliangi aek, kota na martembok laut, jana na marbenteng aek?

⁹Etiopia ma hagogoanna, dohot Mesir na so marbatas: Put dohot Libia i ma gabe panolongna.

¹⁰Haru songon i pe, laing dioban do Tebe tu habuangan. Di sude sirpang ni dalan dibalbali do angka anakna lopus marmatean. Angka halak na godang na disi, ditambat dohot rante jana dibagi-bagi angka na manangkup i.

¹¹Ho pe, ale Ninive, lenong ma ho hara ni na mabuk. Laing usahahononmu ma anso malua ho sian angka musumu.

¹²Sandok bentengmi, gabe songon bona ni hayu ara na ramos marbatu jana malamun. Muda dihutur bonana i, marurus ma batuna i tu pamangan ni jolma na manghutur i.

¹³Gale-gale do angka paranganmu songon dadaboru jana harajaonmu saotik pe nada adong geldokna mangadopi musu. Panganon ni api ma sude angka goruk-goruk ni pintu ni horbanganmu.

¹⁴Timbai ma aek simpanan lopus tuk pakeonmu salolot hona hobuk ho, jana patogu ma angka bentengmu! Lonca-lonca ma bustak, mambaen batu bata, jana pasingkop ma tuanganna.

¹⁵Sanga aha pe na nibaenmu, nada adong guna ni i, angke laing na mate mosok noma ho sanga mate di bagasan porang. Sude ma ho songon suan-suanan di ladang na dingatngat ni siapor. Madung sopar ho songon siapor!

¹⁶Lobi sian bahat ni bintang na di langit i bahat ni angka parboniagamu. Hape mago do halahi saonnari songon siapor na pahirbang habongna habang lalu mago.

¹⁷Songon siapor do angka halak na godang sian ho, na marsiholip di angka tembok taran di ngali ni ari. Tapi dung bincar mataniari, manigor mago be ma halahi marhabangan; sahalak pe nada adong umboto sanga na tu dia halahi kehe.

¹⁸Ale raja ni tano Asur! Mapola marmatean angka gubernurmu, angka bupatimu pe ma pola modom salolot-lolotna. Rayatmu marserak di angka dolok, jana nada adong sahalak pe tarbaen maroban halahi mulak.

¹⁹Nada haubatan be gasamu, angka bugangmu pe nada tarpamalum be. Martopap be marjop ni roha sude halak na umbege hasesegomu. Angke madung sude halak marhancit patunda ni hajahatanmu na so marujung i.