Read Batak Angkola HABAKUK 1 Bible Online

HABAKUK 1 - Batak Angkola bible

HABAKUK 1

¹On ma tona na nipatorang ni TUHAN tu Panurirang Habakuk.

²Sadia honok nari ale TUHAN pio-pio au, tapi inda dibege Ho, mangido tolong au tu Ho, “Parkancitan!” Tapi nada ditolongi Ho au?

³Biasi dipadiar Ho au paida-ida hajahatan na songon i bahat? Tahan dehe Ho lakna paida-ida songon i bahat ni pangalaosion? Sanga na di dia masa hasegoan, na mangasahon gogo, parbadaan dohot parsalisian.

⁴I do umbaen nada margogo be uhum jana hatigoran nada unjung dihajongjongkon. Sumurung ma halak na jahat maradopkon halak na burju, jadi gabe diputar-balikkon ma hatigoran.

⁵Dung i didok TUHAN ma tu bangsoNia i, “Parrohahon ma angka bangso na humaliang hamu, jadi gabe homang ma hamu jana tarhalonong. Angke na giot adong do patupaonKu na so dihaporsayai hamu anggo hum dicaritohon sajo do tu hamu.

⁶Angke satutuna Au do pabangkitkon halak Kasdim, bangso na barani dohot na lingkas, na margogo di sandok tano on laho manyoluk angka inganan na so nampuna ni halahi dope.

⁷Jorbut jana sihabiaran do bangso i, hasintongan dohot habonggalon ia do na manontuhon.

⁸Humipas do kudo ni halahi sian babiat jana gumanas do sian sorigala na malean borngin-borngin. Marroan do angka paranganna na markudo sian angka luat na dao; marroan halahi songon halihi na manyoro soroanna.

⁹Ro do sude bangso i laho mambaen hakejamon, songon haroro ni alogo sian Habincaran do pangaroro ni tentara i jana dipalagut halahi ma angka na tartaban i songon bahat ni pasir.

¹⁰Dipacia-cia halahi do angka raja jana dipartatai halahi do angka pagawe tinggi. Layas do diida halahi angka benteng. Dipambaeni halahi do angka benteng panghobuhan lalu mangarampassa.

¹¹Dung i songon hipas ni alogo markehean ma angka jolma i na mardebatahon hagogoonna sandiri.”

¹²O TUHAN, nada he sian najolo Ho do Debatangku? Na badia jana na manongtong[1] do Ho Debata. TUHAN, Debatangku jana pangondianku, ditodo Ho do bangso Babel i jana dibaen Ho margogo situtu laho manguhumi hami.

¹³Na badia situtu do mataMu, hara ni i nada tarpaida-ida Ho hajahatan jana nada tarligi Ho hakejamon. Biasi sai paligi-ligionMu angka jolma na jahat i, jana sai hohom Ho taran diabisi halak na jahat i angka halak na dumenggan sian ia?

¹⁴Biasi songon ihan na di bagasan laut i hami dietong Ho jana songon porkis na so marpamimpin?

¹⁵Ditangkup bangso Babel do angka jolma dohot hail, songon dia ihan halahi pambaenna. Lalu disarat ma halahi di bagasan jala, dung i dipamasuk tu bagasan hadang-hadanganna; gabe marmoga-moga ma bangso Babel hara ni doharna.

¹⁶Dung i disomba halahi ma jala i jana dihaulkon halahi haul tu hadang-hadanganna, angke hara ni jala i madung mardohar halahi marlobi-lobian.

¹⁷Padiaron ma he sai torus halahi manyintak podangna mamunui angka bangso, nada adong ampunna?