Read Batak Angkola ZEPANYA 2 Bible Online

ZEPANYA 2 - Batak Angkola bible

ZEPANYA 2

¹Marsitutu jana marlagut ma, hamu ale bangso na so marjohoman,

²painte so diayak dope hamu songon lapung na diombuskon, painte so ro dope tu hamu muruk ni TUHAN na marapi-purun, painte so ro dope ari hamumuruk ni TUHAN.

³Jalahi ma TUHAN, ale hamu angka na toruk roha di luat on, na mangoloi parentaNia; jalahi ma hatigoran, jalahi ma toruk ni roha; betak na adong dope di hamu parlinggoman di hatiha hamumuruk ni TUHAN.

⁴Harana giot tinggalkonon ni halak ma kota Gasa jana Askelon gabe mamolngit; ayakon ma rayat ni kota Asdod di hatiha tonga ari jana Ekron dipartunggalbalikkon.

⁵Marjaya ma hamu angka pangisi ni Topi Laut, hamu bangso Kreti! Maradopkon hamu ma hata ni TUHAN on, ale Kanaan tano ni halak Pilistin! AbiskononKu noma ho, lopus nada adong be pangisimu.

⁶Luat Topi Laut angkon gabe inganan ni angka parmahan dohot bara ni biri-biri.

⁷Luat Topi Laut angkon gabe nampuna ni halak Juda na bolas luncat. Marmahan ma halahi disi jana modom di angka kota ni halak Askelon muda borngin; harana TUHAN, Debata ni halahi mamparate-atehon halahi jana pasuangkon halahi songon na salpu i.

⁸Didok TUHAN Na Markuaso i ma, “Hubege do bangso Moab dohot Amon palayaskon dohot mangincahi bangsongKu. Salpu do hata ni halahi mandok na giot buaton ni halahi tano ni bangsongKi.

⁹Songon sintongna mangolu Au ninna TUHAN Na Markuaso, Debata ni Israel: Angkon songon Sodom do Moab sogot, jana songon Gomora angka anak ni Amon, gabe hatubuan ni latong, jana panombangan ni sira, jana mamolngit salolot ni lolotna. Na tading sian bangsongKi mangarampasi halahi sogot, jana mambuat tano ni halahi.”

¹⁰Songon i ma panguhumna baenon tu halak Moab dohot Amon hara ni haginjangon ni roha dohot bulbul ni halahi, boti muse hara ni layasna roha ni halahi mida bangso ni TUHAN Na Markuaso i.

¹¹Mabiar ma halahi baenon ni TUHAN. PatoruhonNia ma sahala ni angka debata na di tano on lopus nada adong be arga ni i sude. Jadi gabe marsomba tu TUHAN noma sandok bangso, di tanona sandiri be.

¹²Pangisi ni Etiopia pe mate noma uhuman ni TUHAN.

¹³Dung salpui pakeon ni TUHAN ma kuasoNia laho mangaropukkon Asur. Jana baenonNia Ninive gabe halongonan, gariang songon parhorsihan.

¹⁴Gabe inganan parpunguan ni binatang ma kota i. Modom-modom ma disi nasa ragam ni binatang harangan. Angka lali dohot barung pe marborngin ma di ginjang ni angka tiangna. Mangkuling ma si pauk sian jandela jana unggas gawak mangkuling di ginjang ni pintu. Madung disegoi sude parhayu ares.

¹⁵Songon i ma na masa i di kota na mangasahon hagogoonna i, jana na mangetong dirina sonang so haribo-riboan. Diambang halak kota i do kota ni halahi i ma na gumodang di sandok tano on. Santak lungun ni luat i, nada adong halak maringanan disi asing sian angka binatang harangan na marasari disi! Tarsonggot ma sanga ise na mamolus di kota i jana mabiar pangkilalaanna.