Read Batak Angkola HAGAI 1 Bible Online

HAGAI 1 - Batak Angkola bible

HAGAI 1

¹Di taon paduahon dung bangkit Raja Darius, di ari parjolo di bulan paonomkon, ro ma hata ni TUHAN marhite Panurirang Hagai. Tu si Zerubabel, anak ni si Sealtiel pangarajai di Juda, dohot tu Malim Godang Josua anak ni si Josadak, na mandok,

²“Songon on do hata ni TUHAN Na Markuaso i: Didok bangso on do, na so hatihana dope mangulahi mambangun bagasKu.”

³Dung i markite-hite Panurirang Hagai, didok TUHAN ma songon on,

⁴“Ale bangsongKu biasi maringanan di bagasan bagas na tohong jana togu hamu, hape bagasKu sandiri laing tinggal sego-segona?”

⁵Hara ni i ninna TUHAN Na Markuaso i ma, “Pamanat hamu ma dirimunu.”

⁶Madung disabur hamu bahat same, hape saotik do suhana. Adong do nian panganon di hamu, tapi nada tuk pabutongkon siubeonmunu. Minum do hamu nian, tapi nada sombu nguasmunu. Adong do pakeanmunu, tapi nada tuk mambaen las pamatangmunu. Jana upa na nijagit ni pangomo nada tuk laho paudutkon ngolu ni halahi.

⁷Songon on ma hata ni TUHAN Na Markuaso, “Pamanat hamu ma dirimunu!”

⁸Saonnari manangkok ma hamu tu angka dolok laho martoktok, lalu pauli hamu ma BagasKu; jadi gabe sonang ma Huhilala jana pataridahononKu ma hamuliaonKu disi, ninna TUHAN.

⁹Sai diarop rohamunu do suha ni karejomunu marlobi-lobi, hape saotik sajo do dapot hamu; dioban hamu ma i mulak, hape Huombus suha ni na dapotmunu i gabe abis dioban alogo. Biasi Hubaen songon i? Songon on do alusna: “Dibaen laing tinggal sego-segona sajo dope BagasKu, hape hamu ma pola sude marsibangun bagasna be, ninna TUHAN Na Markuaso.

¹⁰I ma da boncirna umbaen na ditiopi langit i ombunna, jana ditiopi tano i suhana.

¹¹Ma pola Huparo hahiangon tu tano dohot tu angka dolok-dolok, tu angka gandum dohot angka kobun anggur maradu tu angka kobun zetun, dohot tu sude na tubu di tano on, salang tu jolma pe tehe dohot pahan-pahanan maradu sude na nikarejohon ni tanganmunu.”

¹²Dung i ditangihon si Zerubabel, anak ni si Sealtiel dohot Malim Godang Josua, anak ni si Josadak maradu sude halak Israel ma sora ni TUHAN Debata ni halahi, ditangihon muse dohot hata ni Panurirang Hagai, hombar tu sora ni TUHAN Debata ni halahi tusia, jadi mabiar ma bangso i maradopkon TUHAN.

¹³Dung i dipalalu si Hagai ma tu bangso i tona ni TUHAN i, mandok, “Au do mandongani hamu, ninna TUHAN.”

¹⁴Jadi disungguli TUHAN ma tondi ni si Zerubabel, anak ni si Sealtiel pangarajai ni Juda dohot tondi ni Malim Godang Josua, anak ni si Josadak maradu sude tondi ni bangso i, gabe marroan ma halahi mangaradoti karejo di bagas ni TUHAN Na Markuaso, Debata ni halahi i.

¹⁵Mamungka ma halahi markarejo di tanggal dua pulu opat bulan onom di taon paduahon mamarenta Raja Darius.