Read Batak Angkola ZAKARIA 1 Bible Online

ZAKARIA 1 - Batak Angkola bible

ZAKARIA 1

¹Di bulan pasalapankon taon paduahon hatiha mamarenta Raja Darius, dipalalu TUHAN ma hataNa tu Panurirang Zakaria, anak ni si Berekia anak ni si Ido songon on,

²“Muruk situtu do TUHAN tu ompungmunu.

³Hara ni i dokkon ma tu halahi, ‘Songon on ma hata ni TUHAN Na Markuaso: Mulak ma tu Au, ninna TUHAN Na Markuaso, jana Au pe gabe mulak ma tu hamu ninna TUHAN Na Markuaso.’

⁴Ulang ma hamu songon angka ompumunu i. Narobi dipalalu angka panurirang do tonangKu tu halahi anso ulang be nian sai mambaen na jahat halahi dohot mambaen dosa. Hape nada diterge halahi jana nada ra halahi mangoloi Au.

⁵Ma di dia he angka ompumunu i saonnari? Jana angka panurirang, mangolu ma he lakna halahi salolot ni lolotna?

⁶Tapi sude hata dohot angka paraturanKu na dung Huparentahon tu angka naposongKu, angka panurirang, nada he madung lalu i tu angka ompumunu?” Jadi muba ma roha ni halahi, jana ninna ma, “Songon TUHAN Na Markuaso na marsangkap mambaen pangalaho maradopkon hita, tudos tu na hita karejohon, songon i ma dibaen Ia pangalaho maradopkon hita.”

⁷Di tanggal dua pulu opat bulan Sebat, i ma bulan sabolas di taon paduahon hatiha mamarenta Raja Darius, ro ma hata ni TUHAN tu Panurirang Zakaria anak ni si Berekia, anak ni si Ido songon on:

⁸Di sada parnidaan taran borngin-borngin, huida ma sada halak manaek sada kudo na rara. Maradian ma ia di sada holbung di tonga-tonga ni hayu dulang-dulang. Jongjong ma di pudina i angka kudo na asing, adong na rara, na mera jambu dohot na bontar.

⁹Marsapa ma au tusia, “Tuan, aha dehe arti ni kudo on sudena?” Dialusi ia ma, “Hupatuduhon pe tu ho astuan ni i.”

¹⁰Halak na jongjong di tonga-tonga ni hayu dulang-dulang i mulai manghatai, ning ia ma, “On ma halahi sude na nisuru ni TUHAN giot manghaliangi tano on!”

¹¹Dipaboa halahi ma sude tu Surusuruan i, “Madung hami bolusi sude sisik ni portibi on, hape na sonang do sude tano on hara ni na dung ditaluhon.”

¹²Dung i didok Surusuruan i ma, “O TUHAN Na Markuaso, pitu pulu taon honokna muruk Ho tu Jerusalem dohot tu angka kota na adong di Juda. Sadia honok nari sai tongtong Ho muruk jana nada ampunanMu halahi?”

¹³Mardongan hata apo-apo dialusi TUHAN ma surusuruan i

¹⁴jana disuru surusuruan i ma au palaluhon sanga aha na nidok ni TUHAN Na Markuaso i, “Holong situtu do rohangKu mida kota Jerusalem, jana Huparrohahon situtu do kotangKu na badia i.

¹⁵Tapi muruk situtu do Au maradopkon angka bangso na mandokkon dirina sonang. Angke taran muruk Au maradopkon bangsongKi ditambai halahi do parkancitanna.”

¹⁶Hara ni i songon on do hata ni TUHAN, “Madung marpangulahi rohangKu tu Jerusalem; angkon paulion muse BagasKu di tonga ni kota i, ninna TUHAN Na Markuaso, jana tarikon ma hotang pangukur humaliang Jerusalem.”

¹⁷Ulahi muse ma martingting mandok, “Songon on do hata ni TUHAN Na Markuaso, ‘Murrarat dope angka kotangKu baenon jana lobian dipasupasu, jana ulahan ni TUHAN Na Markuaso i ma mangapoi Sion jana mimili Jerusalem.’ ”

¹⁸Dung i manatap ma au adop gincat, huida ma opat tanduk ni lombu.

¹⁹Husapai ma tu surusuruan na manghobari i dohot au, “Aha dehe arti ni angka tanduk i?” Dialusi ia ma, “Gambaran ni angka harajaan na gogo do tanduk i na paserakkon halak na maringanan di Juda, Israel dohot Jerusalem.”

²⁰Jadi dipataridahon TUHAN ma tu au opat halak pande bosi.

²¹Jadi husapai ma, “Aha dehe lakna sibaenon ni halahi umbaen na ro?” Dung i dialusi ia ma songon on: “On ma angka tanduk na dung manyerakkon Juda, lopus nada tarbaen sanga ise padorgak uluna. Tapi ro do i sude giot manyonggoti halahi, i ma na giot mangambungkon angka tanduk ni angka na paginjangkon tandukna adop tano Juda laho paserakkonsa.”