Read Batak Angkola ZAKARIA 13 Bible Online

ZAKARIA 13 - Batak Angkola bible

ZAKARIA 13

¹“Di ari i marbuldak ma sada mual ni aek laho paiaskon pomparan ni si Daud dohot halak na maringanan di Jerusalem sian dosa dohot parsombaan tu gana-ganaan na dung didalankon halahi.

²Di ari i, sesaonKu ma angka gana-ganaan i sian tano on, lopus nada adong be umpe sahalak marningotsa. SoadahononKu ma hagiot laho marsomba gana-ganaan. Sude jolma na mangoKu dirina panurirang, paorotonKu.

³Jana betak sai adong dope antong jolma na mandok, na palaluhon tonangKu ia, amangnia sandiri dohot inangnia mandok tusia angkon marutang hosa ia niuhuman, angke gabus do na nidoknia i. Muda laing dipupu ia do mandok panurirang ia, tihamon ni amang dohot inangnia sandiri noma ia lopus mate.

⁴Di hatiha i maila ma angka panurirang hara ni parnidaanna songon sada panurirang, nada adong be sian halahi na mamake baju juba na marimbulu giot margabus.

⁵Tapi balik noma dokkonon ni angka panurirang, ‘Nada panurirang au. Partani do au na markarejo di ladangku mamungka sian sihamenekonku.’

⁶Jana muda adong halak na sapa-sapa tusia, ‘Gasa ni aha dehe na di andorami?’ alusannia ma i, ‘Na dibugangi isi ni bagas ni haholonganku do au.’ ”

⁷Didok TUHAN Na Markuaso i ma, “Jongjong ma ho, ale podang, lancim ma parmahan na Husuru i! Matehon ma ia, gabe marserak ma angka biri-biri i. AloonKu ma bangsongKu.

⁸Dung i masa ma di sandok tano on, ninna TUHAN, mate ma dua partolu sian pangisi ni luat on.

⁹Hum sapartolu noma na mangolu sian i. Jana paiasonKu ma halahi songon perak na dipapita ni api. UjionKu ma halahi songon panguji ni halak di sere. Jadi martangiang ma halahi tu Au, jana alusanKu ma halahi. DokkononKu ma tu halahi, paboa na bangsongKu do halahi, jana okuon ni halahi muse ma, Au do TUHAN Debata ni halahi.”