Read Batak Angkola ZAKARIA 14 Bible Online

ZAKARIA 14 - Batak Angkola bible

ZAKARIA 14

¹Dapot ne ma ari paruhuman ni TUHAN. Rampason ma Jerusalem jana dibagi-bagi ma di jolo ni matamu na dapotna i.

²Palaguton ni TUHAN ma sandok bangso laho mamorangi Jerusalem. Taluhononna ma kota i, jana dirampasi angka bagasna i, jana angka dadaboru na disi paksaonna marmainan. Satonga sian halak kota i obanonna tu habuangan, tapi anggo na asing i tading do di kota i.

³Jadi kehe ma Tuhan marporang mangalo angka bangso i songon na nibaenNia narobi.

⁴Jongjong ma Ia di ari i di Dolok Zetun, sabola Habincaran ni Jerusalem. Jadi gabe mabola ma Dolok Zetun i mamungka sian Habincaran lalu tu Hasundutan baenon ni holbung na bidang. Manggulot sabola Utara ma satonga sian dolok i, jana satonga nari tu Selatan.

⁵Marlojongi ma hamu mamolus sian lombang na mambagi dolok i gabe marbola dua. Marlojongi ma hamu songon angka ompu na umpompar hamu di hamamasa ni lalo taran mamarenta si Usia raja ni Juda. Jadi ro ma antong TUHAN Debatangku, diudurkon Surusuruan sudena.

⁶Anggo di ari na sasada i nada adong be ari na ngali sanga pe es,

⁷tapi di sada ari — holan TUHAN do umbotosa — nada adong pargontian ni arian dohot borngin, jana borngin i gabe arian.

⁸Di ari i, mardalan ma aek na lan sian Jerusalem; satonga sian aek i kehe tu Laut Hamatean do jana na satonga nari kehe tu Laut Tonga. Mardalan do torus aek i sasataon, bope di ari nonat sanga pe di logo ni ari.

⁹Jadi mamarenta ma TUHAN gabe raja di sandok portibi on; sombaon ni ganop jolma ma Ia songon Debatana jana tandaon ni halahi ma Ia di bagasan goar na sarupa.

¹⁰Sandok luat mamungka sian Geba di Utara lopus tu Rimon di Selatan, gabe napa ma sudena i. Tapi anggo Jerusalem marsijongjong ma i diginjang adu i, gumincat sian tano na humaliang i; mabidang ma kota i mamungka sian Pintu Horbangan Benyamin lopus tu Pintu Horbangan Suhi-suhi, i ma inganan ni Pintu Horbangan na jolo dohot sian Menara Hananael lopus tu inganan pamoroan ni anggur nampuna ni raja i.

¹¹Marsonang-sonang ma angka jolma maringanan di kota i, nada adong hamamago na mangancam.

¹²Pamasaon ni TUHAN ma nyae na jorbut tu sude bangso na dung unjung marporang mangalo Jerusalem. Mata dohot sude pamatang ni halahi, busuk-busuk boti ma i mangolu-olu dope halahi.

¹³Di ari i, baenon ni TUHAN ma angka bangso-bangso i mardut ni roha jana mabiar situtu lopus ditangkup na sada donganna na di lambungna jana marsihantaman.

¹⁴Marporang ma angka halaklahi na adong di Juda laho mampartahankon kota Jerusalem. Songon barang na nirampas, pambuatan ni halahi ma sude sinadongan ni angka bangso i, isara ni sere, perak dohot pakean marbahat-bahat.

¹⁵Masa muse ma nyae na jorbut tu kudo, halode, unto, bagal dohot sude pahan-pahanan na adong di parbandaran ni musu.

¹⁶Dung i sandok jolma na laing mangolu dope sian tonga-tonga ni angka bangso na mamorangi Jerusalem i, markehean noma tu kota i laho marsomba tu Raja, TUHAN Na Markuaso i dohot laho manghagodangkon Pesta Undung-undung Bulung Rata.

¹⁷Muda adong bangso na so ra kehe tu Jerusalem laho marsomba tu Raja, TUHAN Na Markuaso i, gabe nada ro be udan di luat ni halahi.

¹⁸Jana muda nada ra halak Mesir manghagodangkon Pesta Undung-undung Bulung Rata i, gabe hona ma tu halahi nyae na niparo ni TUHAN tu ganop bangso na so ra kehe marsomba.

¹⁹I ma uhuman tu Mesir dohot tu sude bangso na so ra manghagodangkon Pesta Undung-undung Bulung Rata.

²⁰Di ari i, gorgahonon ma tu angka giring-giring na di abit ni kudo hata na mandok, “Dihapunjungkon di Tuhan.” Argahonon ma angka hudon na di Bagas Ni TUHAN songon angka mangkuk parhaulan na di jolo ni langgatan.

²¹Sude hudon na adong di Jerusalem dohot na di Juda sudena hapunjungkonon ma i baen sipakeon di bagasan paribadatan tu TUHAN Na Markuaso i. Pakeon ni halak na manghaulkon haul ma i pangalompaan ni juhut sihaulkononna i. Muda dung dapot hatiha i, nada adong be parjagal di Bagas Ni TUHAN Na Markuaso i.