Read Batak Angkola ZAKARIA 5 Bible Online

ZAKARIA 5 - Batak Angkola bible

ZAKARIA 5

¹Hupamanat ma mangulahi, jana huida ma balunan ni pustaha na habang di awang-awang i.

²Mangkuling ma ia tu au, “Aha dehe na niidamu? Hualusi ma: Sada balunan ni pustaha na habang di awang-awang i. Sambilan meter ginjangna jana opat satonga meter bidangna.”

³Jadi didok ia ma tu au, “On ma angka bura na ro maradopkon sude luat; harana marhite hata bura i ganop panangko na adong dison gabe malua ma sian uhuman, jana ganop halak na marsumpa pargabus pe laing malua do sian uhuman.

⁴Madung Husuru ia haruar, ninna TUHAN Na Markuaso, anso hona ma i tu bagas ni panangko dohot tu bagas ni na marsumpa pargabus marhite goarKu, jana anso marborngin i di bagas ni halahi, pangabisonna ma angka hayuna bope angka batuna.”

⁵Tarida ma mangulahi surusuruan i jana didok ia ma, “Ligi ma! Aha dope he na ro an!”

⁶“Aha do i?” ningku manyapai. “Sada karanjang,” ning ia mangalusi. “I ma gambaran ni dosa sian sude tano on.”

⁷Sian simbora do tutup ni karanjang i. Jadi taran hupamanat-manat, mungkap ma tutupna i, hapengani adong do sahalak dadaboru juguk di bagasan karanjang i.

⁸Didok surusuruan i ma, “Manggambarkon hajahatan do anak boru on.” Lalu dionjarkon ia anak boru i mangulahi tu bagasan karanjang i jana ditutupkon ia.

⁹Manaili ma au tu ginjang jana huida ma dua dadaboru na habang adop au. Tohong do habong ni halahi songon habong ni sibarung. Dibuat halahi ma karanjang sinangkin lalu dihabangkon halahi.

¹⁰Husapai ma tu surusuruan i, “Tu dia do obanon ni halahi karanjang i?”

¹¹Ning ia ma mangalusi, “Tu Babel do i; pajongjongon ni halahi ma disi bagas pamelean disia. Muda dung sidung pamelean i, baenon ma karanjang i disi anso disomba.”