Read Batak Angkola ZAKARIA 8 Bible Online

ZAKARIA 8 - Batak Angkola bible

ZAKARIA 8

¹Ro ma hata ni TUHAN Na Markuaso i, ninna ma:

²Songon on do hata ni TUHAN Na Markuaso i, “Por sajo do rohangKu nian mangurupi Jerusalem, angke holong situtu do rohangKu mida halak pangisina i, jana hara ni holong ni rohangKi gabe gilap do ate-atengKu paida-ida angka musu ni kota i.”

³Songon on do hata ni TUHAN Na Markuaso i, “Mulak noma Au tu Jerusalem tu kotangKu na badia i, jana maringanan ma Au disi. Tarbarita ma Jerusalem songon kota na tigor jana goaron ma Dolok Ni TUHAN Na Markuaso i,[2] Dolok Na Badia.”

⁴Songon on do hata ni TUHAN Na Markuaso: Angkon juguk dope muse angka ompu-ompu halaklahi dohot angka ompu-ompu dadaboru di alaman ni Jerusalem, na patiop-tiop tungkotna be di tanganna hara ni tobangna.

⁵Angka dalan na di kota i pe gabe ribur ma baenon ni angka halaklahi dohot dadaboru na marmayami.

⁶Songon on do hata ni TUHAN Na Markuaso: Songon na so porsaya do i anggo di angka na tinggal na mangolu sian bangso i, tapi gabe dohot ma lakna longang Au disi? ninna TUHAN Na Markuaso.

⁷Songon on do hata ni TUHAN Na Markuaso, “Ligi ma, paluaonKu ma bangsongKi sian tano Habincaran dohot sian tano Hasundutan ni mata di ari,

⁸jana Au mangoban halahi mulak, anso maringanan halahi di Jerusalem hara ni i gabe bangsongKu ma halahi jana Au Debata ni halahi di bagasan hatigoran dohot hasintongan.”

⁹Songon on ma hata ni TUHAN Na Markuaso, “Patogu ma rohamu, o angka jolma na dung mambege hata na nidokkon ni angka panurirang, mulai dipayakkon batu ojahan ni bagas ni TUHAN Na Markuaso, giot pajongjongkon Bagas Na Badia i.

¹⁰Hatiha dompak so dapot dope ari on, nada taruli halak di gogona, jana pahan-pahanan pe songon i do, jana nada adong jolma na malua sian musuna. Harana Hubaen do halahi marbadai.

¹¹Tapi anggo saonnari asing noma baenonKu tu angka jolma na mangolu dope sian bangso on sian na Hubaen na salpu i, ninna TUHAN Na Markuaso i.

¹²Di bagasan sonang noma halahi i manyabur same. Marbatui ma angka bona ni anggur ni halahi, lehenon ni tano i ma suhana, jana langit mangalehen aek ombun. LehenonKu ma pasupasu i tu angka jolma na mangolu dope sian bangso on.

¹³Jana na jolo madung manjadi bura hamu di tonga-tonga ni angka bangso, o hamu halak Juda dohot halak Israel. Jadi saonnari giot paluaonKu noma hamu, anso gabe pasupasu hamu. Ulang hamu mabiar, patogu ma rohamunu!”

¹⁴Didok TUHAN Na Markuaso i ma, “Taran muruk Au dibaen angka ompumunu, Huputuskon do disi laho manguhumi halahi posi. Nada Hupauba haputusanKi, tapi Hudalankon do i.

¹⁵Tapi saonnari giot pasupasuonKu ma halak Jerusalem dohot na maringanan di Juda. Jadi ulang be hamu mabiar.

¹⁶On ma angka parenta sidalankononmunu: Muda mandok hata, dok hamu ma na tutu tu donganmunu. Baen hamu ma haputusan na tigor na padumpangkon dame.

¹⁷Ulang ma baen hamu sangkap na jahat maradopkon hamu sama hamu, ulang dokkon sumpa na so tutu. Magigi do Au tu gabus dohot hageduhan bope na mangasahon gogo.”

¹⁸Dilehen TUHAN Na Markuaso i do tona on tu au sipalaluon tu bangsoNia songon on,

¹⁹“Gabe ari pesta na gok jop ni roha dohot hasonangan ma di halak Juda puaso na didalankon di bulan paopatkon, palimahon, papituhon dohot pasampuluhon. Haholongi hamu ma hatigoran dohot dame!”

²⁰Didok TUHAN Na Markuaso i ma, “Dapot do i hatihana, marroan ma angka halak na maringanan di bahat kota tu Jerusalem.

²¹Dokkonon ni halak kota na sada ma tu halak kota na asing, ‘Beta ma hita marsomba tu TUHAN Na Markuaso i jana tapangido ma pasupasuNa. Ihutkon ma hami!’

²²Jadi marroan ma bahat halak dohot bangso na gogo tu Jerusalem laho marsomba tu Au TUHAN Na Markuaso jana pangidoonna ma pasupasu sian Au.

²³Anggo di angka ari i ro ma sampulu halak sileban tu sada halak Jahudi jana dokkonon ni halahi ma, ‘Por do rohanami maruntung laing songon ho; angke hami bege do, bahaso dipasupasu Debata hamu.’ ” Madung didok TUHAN Na Markuaso i songon i.