Read Batak Angkola MALEAKI 3 Bible Online

MALEAKI 3 - Batak Angkola bible

MALEAKI 3

¹Dialusi TUHAN Na Markuaso i ma, “SuruonKu ma utusanKu laho paradehon dalan di Au. Jadi ompot ma ro Au, TUHAN na nijalahanmunu ro tu bagasan BagasKi. Ro ma i utusanKu na nihalungunkonmunu i jana pabotohononna ma parjanjianKi.”

²Tapi ise ma he na tahan di ari haroroNa i? Jana ise ma na tahan jongjong hatiha dipataridahon Ia diriNa? Angke songon api ni panopa do Ia, jana songon sabun ni panyabun.

³Jadi juguk ma Ia songon sada halak panopa perak; jana paiasonNia ma halak Levi songon na paiaskon sere dohot perak, anso gabe sioban haul halahi tu TUHAN di bagasan hasintongan.

⁴Jadi gabe sonang ma roha ni TUHAN baenon ni angka haul na nihaulkon ni halak Juda dohot Jerusalem maradopkon TUHAN laing songon sinajoloan.

⁵“Ro ma Au mandapotkon hamu laho manguhumi hamu. Manigor lehenonKu ma hasaksian mangalo angka pangajii, angka jolma panggampang na manyaksihon gabus, na mamogo upa ni halak pangomo, na manyosak angka na mabalu, na so marama so marina dohot halak sileban. Mangkuling ma Au laho mangalo sude halak na so pasangapkon Au, ninna TUHAN Na Markuaso i.”

⁶“Au do TUHAN, jana nada muba-uba Au. Jana hamu ale pinompar ni si Jakob, nada pusa hamu.

⁷Laing songon ompu na umpompar hamu najolo, songon i muse do hamu marbalik sian angka aturanKu jana nada dihaburjuhon hamu mandalankonsa. Mulak ma hamu tu Au, Au pe gabe mulak ma tu hamu. Hape disapai hamu dope, ‘Bia dehe baenonnami anso mulak hami tu Ho?’

⁸Tola ma he jolma paoto-otohon Debata? Tapi dipaoto-oto hamu do Au. Tapi didok hamu do, ‘Dohot dalan dia ma he hami paoto-otohon Ho?’ Taringot tu haul parsampuluan dohot haul na sumurung.

⁹Hona bura hamu sude, angke sude do bangso i paoto-otohon tu Au.

¹⁰Oban hamu ma parsampuluanmunu i tu BagasKu anso adong disi mardapot-dapot sipanganon. Uji hamu ma Au, jadi gabe idaonmunu ma Huungkap angka pintu ni banua ginjang jana pagukguhonKu sandok na denggan tu hamu, ninna TUHAN Na Markuaso.

¹¹SonggakonKu ma angka siapor na sompor, anso ulang dipangabis ia angka suha ni tanomu jana ulang jabat nada marbatu angka bona ni anggurmu, ninna TUHAN Na Markuaso.

¹²Jadi dokkonon ni sandok bangso ma hamu na martua, angke gabe tano siinganan na denggan do tanomunu.”

¹³Sai dipahata-hata hamu do Au ninna TUHAN. Tapi didok hamu do, “Aha ma he na hami hata-hatahon taringot tu Ho?”

¹⁴Didok hamu, “Nada adong gunana marsomba tu Debata. Aha ma he gunana taparate-atehon aha na angkon sikarejohonon maradopkon Ia jana mardalan mamake pakean paboa na marsak di adopan ni TUHAN Na Markuaso?

¹⁵Hara ni i do hita dokkon bahaso marsonang-sonang do angka halak na jungkat, angka na jahat, salang Debata pe diuji halahi do, tapi laing malua do halahi sian jaya.”

¹⁶Jadi marsipandohonan ma angka halak na manghabiari TUHAN i na sada tu donganna. Dibege jana diparrohahon TUHAN do sanga aha na nihataan ni halahi i. Disuratkon do angka goar-goar ni na pasangapkon TUHAN dohot na mabiar mida Ia, di bagasan sada buku panyuratan na adong di joloNia.

¹⁷Didok TUHAN Na Markuaso i ma, “Jadi gabe bangsongKu ma halahi. Di ari na Hutontuhon i, gabe hasudungan ni rohangKu ma halahi jana Au nampunasa. Ibo ma rohangKu mida halahi, songon panghasiani ni ama-ama tu anakna na marpangoloion tuSia.

¹⁸Mangulahi ma idaon ni bangsongKu na asing do bagian ni halak na burju sian na jahat, bagian ni halak na marpangoloion tu Au dohot halak na so mangoloi tu Au.”