Read Batak Angkola MARKUS 10 Bible Online

MARKUS 10 - Batak Angkola bible

MARKUS 10

¹Dung i morot ma Jesus sian i, kehe ma Ia tu Luat Judea dohot tu luat na di bariba ni Batang aek Jordan. Marroan ma mangulahi halak na bahat marrongom humaliang Jesus. Dung i diajari Jesus ma halahi songon na somal.

²Jadi ro muse ma halak Parise tusi laho manjalahi hasalaan ni Jesus. Dibaen halahi ma sapa-sapa ni halahi on, “Dokkon ma jolo di hami, tola do halak manyirangkon dadaboruna?”

³Dialusi Jesus ma dohot sapa-sapa muse. Ning Ia ma, “Aha do ditonahon si Musa tu hamu?”

⁴“Anggo si Musa, dipatola ia do manyirangkon dadaboru, asal ma jolo dibaen surat sirangna,” ninna halahi mangalusi.

⁵“Disurat si Musa pe tona i hara ni maolna do hamu ajaran,” ninna Jesus tu halahi.

⁶“Tapi anggo di mulana di na manompa jolma Debata didok do, ‘Halaklahi dohot dadaboru do halahi dibaen Debata.

⁷Hara ni i ma umbaen na nitinggalkon ni halaklahi amangna dohot inangna, kehe ma ia marsada dohot dadaborunia i,[9]

⁸anso gabe sada na dua i.’ Antong inda dua be halahi. Tapi sada noma.

⁹Hara ni i ma umbaen na so tola sirangon ni jolma halak na dung dipadomu ni Debata!”

¹⁰Jadi dung mulak halahi tu bagas, disapai angka siseanNia i ma tuSia taringot tusi.

¹¹Didok Jesus ma tu halahi, “Sanga ise halaklahi na manyirangkon dadaboruna gabe marbagas ia dohot dadaboru na asing, na markarosuan do ia maradopkon dadaborunia i.[10]

¹²Laing songon i muse do dadaboru na maninggalkon halaklahina gabe marbagas ia tu halaklahi na asing, ia pe na markarosuan do i.”

¹³Jadi adong ma na maroban angka dakdanak mandapotkon Jesus anso dipasupasu Ia angka dakdanak i. Tapi dimuruhi angka sisean ni Jesus i ma halahi.

¹⁴Jadi marnida i muruk ma Jesus didok Ia ma tu angka anak siseanNia i, “Padiar hamu ma marroan angka dakdanak i tu Au! Ulang rarang hamu halahi. Angka halak sisongon i do na gabe nampuna Harajaan Ni Debata.

¹⁵Tutu do na Hudok on! Sanga ise na so manjagit Harajaan Ni Debata songon panjagit ni sada dakdanak, inda tarbaen halahi gabe anggota ni Harajaan Ni Debata i.”

¹⁶Dung didok Jesus songon i, dihaol Ia ma angka dakdanak i, diampehon Ia ma tanganNia jana dipasupasu Ia ma halahi.

¹⁷Jadi laho patoruskon pardalananNia Jesus, ro ma sada bayo marlojong-lojong mandapotkon Ia. Marsomba ma bayo i di jolo ni Jesus manyapai, “O Guru na burju, angkon aha do sibaenonku anso dohot au manean ngolu na so mantak i?”

¹⁸“Biasi didok ho Au na burju? Nada adong sahalak pe na burju, asing sian Debata sandiri.

¹⁹Tontu diboto ho do tona ni Debata na mandok, ‘Ulang ho mamunu, ulang markarosuan, ulang manangko, ulang margabus, ulang paoto-otohon, pasangap ma amangmu dohot inangmu!’ ”

²⁰“Anggo i do, sian naposo dope au madung hudalankon do sude tona i.”

²¹Dipanotnoti Jesus ma bayo i hara ni holong ni rohaNia midasa. Didok Ia ma, “Hum sada nari noma pangalaho na porlu di ho. Kehe ma ho manggadis sude sinadonganmu. Lehen ma hepengna i tu angka halak na pogos, dung i gabe adong ma dapot ho arta na di banua ginjang. Dung i ro ma ho mangihutkon Au!”

²²Umbege hata ni Jesus na songon i marsak ma pangkilalaan ni bayo i. Ditinggalkon ia ma inganan i kehe ia, marsak sajo rohania angke na kayo situtu do ia.

²³Dung i dipanotnoti Jesus ma angka siseanNia i didok Ia ma tu halahi, “Na maol do anggo halak na kayo masuk tu Harajaan Ni Debata!”

²⁴Homang ma roha ni angka siseanNia i umbege na nidok ni Jesus i. Hape didok Jesus muse, “Hamu angka dakdanakKu! Tutu do i, na maol do laho masuk tu Harajaan Ni Debata!

²⁵Ummura dope unto masuk tu lubang ni jait ulang pado halak na kayo masuk tu Harajaan Ni Debata.”

²⁶Tarsonggot ma angka sisean ni Jesus i umbege hata na nidokNia i. Gabe marsisapa-sapaan ma halahi sama halahi, “Anggo songon i do, ise noma na tarbaen malua?”

²⁷Jadi dipanotnoti Jesus ma halahi sude, dialusi Ia ma, “Anggo di jolma do, inda tarbaen i. Tapi anggo di Debata tarbaen do i. Angke nada adong sanga aha pe na so tarbaen Debata.”

²⁸Dung i didok si Petrus ma, “Madung hami tinggalkon sasudena jana hami ihutkon Ho.”

²⁹“Tutu do i,” ninna Jesus, “antong ingot hamu ma on: Halak na dung maninggalkon dongan saripena, sanga kahanggina sanga ibotona, sanga inangna bope amangna, sanga dakdanakna, sanga pe sabana, hara ni Au dohot hara ni Jamita Na Denggan na sian Debata,

³⁰jagiton ni halahi ma umbahat sian di hatiha saonnari. Dapot ia ma saratus noli umbahat bagas, kahanggi, iboto, dakdanak, saba dohot ladang, dohot parkancitan. Dung i di hatiha na giot ro jagiton ni halahi ma hangoluan na so mantak.

³¹Tapi bahat do halak na parjolo saonnari gabe parpudi, jana bahat do na parpudi saonnari gabe parjolo.”

³²Hatiha di tonga dalan Jesus rap dohot angka siseanNia i laho tu Jerusalem. Di jolo ni angka anak siseanNia i ma Jesus mardalan. Madung songon na adong biar ni angka siseanNia i, jana angka halak na mangihutkon i pe sian pudi madung mabiar. Dung i dipio Jesus ma angka siseanNia i sajo laho paboahon tu halahi sanga aha na giot masa tuSia.

³³“Tangihon hamu ma, saonnari manangkok ma hita tu Jerusalem. Pasahaton ma disi Anak Ni Jolma tu angka sintua ni malim dohot angka Siboto Surat. Dabuhonon ni halahi ma uhuman mate tuSia. Dung i pasahaton ni halahi ma Ia tu tangan ni angka halak na so Jahudi.

³⁴Incahan ni halahi ma Ia, tijuranna, loncinganna baru ma dibunu. Tapi dung tolu ari, mulak mangolu ma Ia mangulahi.”

³⁵Jadi ro ma si Jakobus dohot si Johannes, i ma angka anak ni si Zebedeus mandapotkon Jesus, “Gurunami! Pangidoan ni rohanami patulusonMu ma na hami pangido sian Ho!”

³⁶“Aha ma por ni rohamunu sibaenonKu di hamu?” ninna Jesus manyapai.

³⁷Dialusi halahi ma, “Muda dung lalu Ho saulahon juguk marsangap di karosi harajaan i di Harajaan Ni Debata, sugari nian patola ma hami rap juguk dohot Ho. Sahalak di siamun, dung i sahalak nari di siambirangMu.”

³⁸Tapi didok Jesus ma, “So diboto hamu sanga aha na nipangidomunu. Tarinum hamu ma lakna siinumon parkancitan na giot inumonKi? Tolap hamu do lakna masuk tu sitaonon na giot sitaononKi?”

³⁹“Tarbaen hami do i,” ning halahi. Dung i didok Jesus ma mangulahi tu halahi, “Tutu do i nian angkon inumonmunu do siinumon parkancitan na giot inumonKi, jana angkon masuk do hamu tu bagasan sitaonon na giot taononKi.

⁴⁰Tapi anggo na manontuhon sanga ise na juguk di siamunKu sanga di siambirangKu, inda marguru di Au i. Debata do na manontuhon sanga na ise do na juguk disi.”

⁴¹Jadi dung tarboto pangalaho i tu anak sisean na sampulu halak nari, dimuruhi halahi ma si Jakobus dohot si Johannes.

⁴²Jadi, gabe dipalagut Jesus ma halahi sude. Didok Ia ma tu halahi, “Diboto hamu do angka na nidok pamarenta ni angka bangso, na mamarenta rayatna marhite tangan bosi, jana angka parkuasona mandalankon karejona marhite hakejamon.

⁴³Tapi anggo hamu, nada tola songon i! Sanga ise na giot godang sian hamu, angkon gabe pangoloimunu ma ia.

⁴⁴Dung i halak na giot sumangap di tonga-tongamunu, angkon gabe pangoloi ma ia di hamu sude.

⁴⁵Angke Anak Ni Jolma i pe, nada na giot dioloi Ia umbaen na ro. Tapi na giot mangoloi do, dohot mangalehen hosaNia gabe dalan laho paluahon bahat halak.”

⁴⁶Lalu ma halahi di Jeriko. Jadi dung laho kehe Jesus rap dohot angka anak siseanNia i, songon i dohot halak na bahat i, adong ma sada halak na mapitung juguk di topi dalan i mangido-ido. Si Bartimeus do goarna, i ma anak ni si Timeus.

⁴⁷Jadi dung dibege ia Jesus halak Nasaret i do na mamolus i, marsurak ma ia, “O Jesus Anak ni si Daud! Ibo ma rohaMu mida au!”

⁴⁸Digorahon halak ma ia anso sip. Tapi mur dipagogo ia dope marsurahi, “O, Anak ni si Daud, ibo rohaMu di au!”

⁴⁹Gabe maradian ma Jesus, didok Ia ma, “Piohon hamu jolo ia.” Jadi dipiohon halak ma bayo na mapitung i. Didok halahi ma tusia, “Patogu ma rohamu! Madung dipio Jesus ho. Jongjong ma ho!”

⁵⁰Dung i ditalduskon ia ma gobak-gobaknia i, diompoti ia ma jongjong, kehe ma ia mandapotkon Jesus.

⁵¹“Aha do lakna dipangido rohamu baenonKu tu ho?” ninna Jesus manyapai ia. Dialusi bayo na mapitung i ma, “Marnida ma nian au, Guru!”

⁵²“Kehe ma ho,” ninna Jesus. “Madung dipamalum haporsayaanmi ho.” Manigor marnida ma bayo i. Lalu diihutkon ia ma Jesus di dalan i.