Read Batak Angkola MARKUS 14 Bible Online

MARKUS 14 - Batak Angkola bible

MARKUS 14

¹Dua ari nari noma anso Ari Pesta Paskah — dohot Roti Na So Marragi. Manjalak-jalahi dalan ma angka sintua ni malim dohot angka Siboto Surat laho manangkup Jesus sip-sip anso dibunu halahi Ia.

²“Tapi ulang ma di ari pesta on tabaen, anso ulang masa hagaoron,” ninna halahi.

³Hatiha di Betania Jesus, di bagas ni si Simon na huliton i hian do Ia. Dompak mangan Jesus disi, ro ma sada dadaboru mandapotkon Ia maroban sada botol pualam na marisi miak na huskus. Sigodang arga do miak na huskus i, i ma na nitanak ni halak sian urat-urat na huskus. Ditaporkon anak boru i ma botol i laho mangusehon miak na huskus i tu ulu ni Jesus.

⁴Jadi adong ma halak na disi i muruk-muruk. Didok halahi ma sama halahi, “Aha ma he gunana diparsayang miak na huskus i?

⁵Harana sugari nigadis miak i, ma mararga i lobi tolu ratus hepeng perak. Madung tarlehen hepengna i tu angka halak na pogos!” Gabe dimuruhi halahi ma anak boru i.

⁶Tapi didok Jesus ma, “Padiar hamu ma songon i! Biasi diarsahi hamu ia? Na denggan do na nibaennia tu Au. Sipujion do ia disi.

⁷Anggo halak na pogos tongtong do adong di tonga-tongamunu. Sanga sadihari anggo na ra do hamu, tarurupi hamu do halahi. Tapi anggo Au nada tongtong di lambungmunu.

⁸Anggo anak boru on, ma dibaen ia intap ni na lobas gogonia. Dompak so dapot dope hatihana ma dihobasi ia hian Au dohot miak na huskus i tu hatiha hatatanomKu.

⁹Tutu do na Hudok on tu hamu! Sanga na di dia pe di tano on dibaritahon Jamita Na Denggan na sian Debata, angkon dibaritahon muse ma na nibaen ni anak boru on gabe songon parningotan tusia.”

¹⁰Si Judas Iskariot, i ma sahalak sian sisean ni Jesus sidua bolas halak i. Kehe ma ia mandapotkon angka sintua ni malim laho manghianati Jesus.

¹¹Jadi dung dibege halahi na songon i jop ma roha ni halahi. Marjanji ma halahi mangalehen hepeng tu si Judas. Si Judas pe antong dipungka ia ma manjalahi dalan laho manghianat tu Jesus.

¹²Ari parjolo di Ari Pesta Ni Roti Na So Marragi, didapotkon angka siseanNia i ma Jesus. Somalna di na sadari i ma disambol halak biri-biri Paskah. Jadi disapai angka siseanNia i ma Jesus, “Di dia do dipangido rohaMu paradeonnami panganon Paskah di Ho?”

¹³Dung i disuru Jesus ma dua halak sian halahi. “Kehe ma hamu tu kota, marsuo ma hamu annon disi rap dohot sada bayo na maroban gunci. Ihutkon hamu ma bayo i

¹⁴sanga tu bagas dia ia masuk. Dok hamu ma tu nampuna bagas i songon on, ‘Disapai Guru i, sanga na di dia do ingananNia rap dohot angka siseanNia mangankon sipanganon Paskah i.’

¹⁵Patuduhononnia ma tu hamu sada bilik na bidang di loteng parginjang di bagas i. Ma taratur hian disi singkop dohot angka juguhanna. Parade hamu ma sude disi di hita.”

¹⁶Dung i kehe ma siseanNia sidua halak i tu kota. Dapot halahi ma songon na nidok ni Jesus tu halahi. Diparade halahi ma panganon Paskah i.

¹⁷Jadi dung potang ari, ro ma Jesus rap dohot anak siseanNia na dua bolas halak i.

¹⁸Jadi hatiha na mangan i halahi di meja na disi didok Jesus ma, “Tangihon hamu ma on! Sahalak sian hamu na rap mangan dohot Au saonnari giot manghianat tu Au.”

¹⁹Gabe marsak ma angka anak sisean ni Jesus i. Pasada-sada ma halahi marsapa tu Jesus, “Tontu nada au na nidok ni Guru i, atehe?” ninna halahi.

²⁰Dialusi Jesus ma, “Anggo halakna, sahalak sian hamu na dua bolas on. Na mangan sapinggan dohot Au, i ma ibana.

²¹Tutu do nian, angkon mate do Anak Ni Jolma i songon na dung tarsurat hian di Buku Na Badia i. Tapi na jorbut do hamamago ni halak na manghianat tu Anak Ni Jolma i! Dumenggan hian do sugari indangkon sai jungada ia sorang!”

²²Jadi hatiha na mangan i halahi, dibuat Jesus ma roti, didok Ia ma tarimakasi tu Debata. Diponggoli Ia ma roti i, dung i dilehen Ia ma tu angka siseanNia i, didok Ia hataNa, “Pangan hamu ma, on ma pamatangKu.”

²³Jadi dung sidung i dibuat Ia muse ma sada panginuman ni anggur. Didok Ia ma tarimakasi tu Debata, dilehen Ia muse ma panginuman i tu angka siseanNia i. Dung i sude ma halahi manginum anggur i.

²⁴Dung i didok Jesus ma tu halahi, “On ma mudarKu, na niduruskon di halak na bahat, i ma mudar na mambaen tulus parjanjian ni Debata.

²⁵Tutu do na Hudok di hamu, inda inumonKu be anggur on. Tapi saulahon inumonKu ma anggur na imbaru muda dung dipajongjong Damang HarajaanNia.”

²⁶Dung i diendehon halahi ma sada ende puji-pujian. Torus kehe ma halahi tu Dolok Zetun.

²⁷Dung i didok Jesus ma tu halahi, “Ganggu ma haporsayaanmunu sude. Angke adong do tarsurat di Buku Na Badia i, ‘BunuonKu ma parmahan i, gabe marserak ma angka biri-birina.’

²⁸Tapi dung dipangolu mangulahi, kehe ma Au tu Galilea manjoloani hamu.”

²⁹“Nada!” ning si Petrus, “Haru sude pe halahi maninggalkon Ho anggo au bagi na bia pe inda.”

³⁰“Tutu do na Hudok on, laing di borngin on painte so tahuak manuk padua nolihon, ma tolu noli diporso ho na so nitandamu Au,” ninna Jesus.

³¹Ninna si Petrus dope manggogohon mangulahi, “Haru pe angkon gabe mate au rap dohot Ho, bagi na bia pe nada parsoonku Ho!” Jadi sude ma anak siseanNia na asing i mangihut mandok songon i.

³²Lalu ma halahi tu sada inganan na margoar Getsemane. Didok Jesus ma disi tu angka anak siseanNia i, “Dison ma hamu juguk anso kehe Au martangiang santongkin.”

³³Dung i dipiohon Jesus ma si Petrus, si Jakobus dohot si Johannes kehe rap dohot Ia. Mamungka ma digohi biar dohot gamang rohaNia.

³⁴Dung i didok Ia ma, “Marsak sajo do rohangKu, songon na giot mate pangkilalaanKu. Dison ma hamu jolo, jonggor ma hamu!”

³⁵Dipadao Jesus ma kehe saotik, manungkap ma Ia tu tano laho martangiang. Dipangido Ia di bagasan tangiang sugari tarbaen indangkon sai ditaon Ia parkancitan i.

³⁶Didok Ia ma, “Abba, o Amang, inda adong na so tarpatupa Ho ale Amang. Buat ma parkancitan on sian Au. Tapi, ulang ma marguru tu lomo ni rohangKu tapi lomo ni rohaMu ma Amang.”

³⁷Dung i mulak ma Jesus, hape didapot Ia ma tarpodom anak siseanNia i. Dung i didok Ia ma tu si Petrus, “O, Simon! Na tarpodom do ho? Hum sajom sajo pe inda tarbaen ho be jonggor?”

³⁸Dung i didok Jesus ma tu halahi, “Jonggor ma hamu, tangiangkon hamu ma anso ulang talu hamu di ujian i. Tutu do nian sai giot mambaen na sintong do anggo tondimunu tapi nada margogo hamu patuluskonsa hara ni bako ni jolma na gale i.”

³⁹Kehe ma Jesus sanoli nari martangiang, laing hata ni tangiangNia sinangkinan i do didokkon Ia.

⁴⁰Dung i mangulahi ma didapotkon Ia angka anak siseanNia i. Laing tarpodom do halahi didapot Ia. Dokdok sajo mata ni halahi na mondok-ondok i. Gabe so diboto halahi be sanga aha sidohonon ni halahi tu Jesus.

⁴¹Dung i ro ma Ia patolunolihon, jana didokkon Ia ma tu halahi, “Modom ma hamu santongkin nari jana maradian. Tuk ma i, madung ro hatiha i. Ligi ma nipasahat ma Anak Ni Jolma tu tangan ni halak pardosa.

⁴²Ngot ma hamu anso kehe hita. Ligi ma madung ro indi na manghianat i tu Au!”

⁴³Jadi taran mandok hata dope Jesus, ompot ma si Judas ro. Sahalak sian sisean ni Jesus na dua bolas i do si Judas on. Ro muse do rap dohot ia halak na bahat marsioban podangna dohot umban-umban. I ma angka na nisuruhon ni angka sintua ni malim, angka Siboto Surat dohot hatobangon ni halak Jahudi.

⁴⁴Madung dipaboa panghianat i hian sanga aha tandana tu halahi. “Sanga ise na huumma, i ma ibana halakna. Tangkup hamu ma manigor, togu oban hamu.”

⁴⁵Jadi hatiha na ro i si Judas, manigor didapotkon ia ma Jesus, didok ia ma, “Gurunami!” dung i diumma ia ma Jesus.

⁴⁶Dung i ditangkup angka halak na bahat na rap dohot si Judas i ma Jesus, dirante halahi ma Ia.

⁴⁷Tapi adong ma sahalak na disi i, manyintak podangnia ditampul ia ma pinggol ni naposo ni Malim Godang i lopus ramping.

⁴⁸Didok Jesus ma tu halahi, “Adong he parjahat Au umbaen na maroban umban-umban hamu ro laho manangkup Au?

⁴⁹Ganop ari do Au mangajari di Bagas Ni Debata di jolomunu hape inda ditangkup hamu Au. Tapi angkon songon i do anso tulus na tarsurat di bagasan Buku Na Badia i.”

⁵⁰Kehe ma sude martabuni anak siseanNia i.

⁵¹Adong ma sahalak doli-doli na paihut-ihut Jesus, na mamake sada abit lenan sajo di pamatangnia i. Jadi giot ditangkup halak ma ia,

⁵²tapi disarsarkon ia ma abitnia i, kehe ia marlojongi marsaemara.

⁵³Dioban ma Jesus tu bagas ni Malim Godang. Madung marlagut hian disi angka sintua ni malim, hatobangon ni halak Jahudi dohot angka Siboto Surat.

⁵⁴Sian na dao dipaihut-ihut si Petrus ma Jesus lopus tu alaman ni bagas ni Malim Godang i. Disi ma ia marsisudu rap dohot angka na mangawal i.

⁵⁵Sude angka sintua ni malim dohot angka parrapot godang i, sude ma manggogo be laho padapotkon hasalaan ni Jesus anso bisa didabuhon halahi uhuman mamatehon Ia. Hape inda adong bagi aha dapot halahi.

⁵⁶Sude saksi na nipiohon i, hum gabus do bahat dipardokkoni halahi taringot tu Jesus. Hasaksian ni halahi i pe marsialoan ma i na sada tu na asing.

⁵⁷Dung i jongjong ma deba nari saksi na asing na mangalehen hatorangan na so tutu taringot tu Jesus.

⁵⁸Didok halahi, “Hami bege do didok bayo on, ‘Hurumpakkon ma Bagas Ni Debata na nibaen ni jolma on, dung tolu ari Hupajongjong ma mangulahi Bagas Ni Debata na so nibaen ni jolma.’ ”

⁵⁹Tapi taringot tusi pe laing marsialoan do hatorangan ni angka saksi i na sada tu na asing.

⁶⁰Dung i jongjong ma Malim Godang i di jolo ni halahi sude manyapai Jesus, “Na so taralusi Ho dehe hum sandok hata, sude angka na nipardokkoni ni halak i manuhas Ho?”

⁶¹Sip sajo Jesus. Sandok inda dialusi Ia. Dung i disapai Malim Godang i ma tuSia sanoli nari, “Tutu dehe Ho Kristus Anak Ni Na Tarpuji i?”

⁶²“Olo!” ninna Jesus. “Sude hamu angkon marnida Anak Ni Jolma i juguk di siamun ni Na Markuaso i. Dung i idaonmunu ma Ia ro di bagasan ombun sian langit an!”

⁶³Manigor disibakkon Malim Godang i ma pakeannia i. Didok ia ma, “Inda pola porlu be saksi.

⁶⁴Madung sude hamu sandiri umbege hataNia na jahat i. Saonnari, aha ma haputusanna?” Sude halahi mamutuskon bahaso marsala Jesus. Patut mate uhumon.

⁶⁵Jadi adong ma deba na mamungka manijuri Jesus. Adong muse ma na manutup mataNia, dung i dibalbali ma Ia. Didok ma tuSia, “Cubo ma jolo paboa sanga ise na mamukul Ho?” Angka pangawal i pe dohot do mambalbali Jesus.

⁶⁶Dompak na di alaman i si Petrus ro ma tusi sahalak anak boru, i ma naposo ni Malim Godang i.

⁶⁷Jadi dung diida ia si Petrus na marsisudu di lambung api i dipamanat ia ma bohi ni si Petrus. Didok ia ma, “Na he dohot do ho dongan ni Jesus halak Nasaret i?”

⁶⁸Tapi diporso si Petrus do. “Nada huboto jana nada mangarti au na nidokmi.” Dung i jongjong ma si Petrus tu horbangan ni bagas ni Malim Godang i. Jadi martahuak ma manuk disi.

⁶⁹Dung i diida naposo sinangkinan i ma mangulahi si Petrus disi, didok ia ma tu angka halak na disi, “Tutu do bayo on sahalak sian angka dongan ni Jesus i!”

⁷⁰Tapi laing diporso si Petrus do mangulahi. Inda sadia honok dung i, didok angka halak na disi i ma mangulahi tu si Petrus, “Tutu do ho sahalak sian halahi. Angke halak Galilea do ho!”

⁷¹Si Petrus pe marsumpa-sumpa ma ia. Didok ia, “Sai mate ma au muda tutu hutanda bayo na nidokmunu i!”

⁷²Martahuak muse ma manuk disi paduanolihon. Diingot si Petrus muse ma na jungada didok Jesus tusia, “Dompak so martahuak manuk paduanolihon dope ma tolu noli didok ho, na so ditanda ho Au.” Dung i kehe ma si Petrus sian i tangis panguncombopon.