Read Batak Angkola MARKUS 3 Bible Online

MARKUS 3 - Batak Angkola bible

MARKUS 3

¹Dung i kehe ma Jesus mangulahi tu bagas paribadatan. Adong ma disi sahalak na mate tanganna sabariba.

²Topet muse adong disi halak na giot manjalahi hasalaan ni Jesus, anso taraduhon halahi Ia. Jadi torus ma sai diparate-atehon halahi Jesus sanga na ra do Ia pamalumkon hatiha Ari Sabat.

³Didok Jesus ma tu na mate i tanganna sabariba, “Di tonga-tonga on ma ho jongjong.”

⁴Jadi disapai Ia ma angka halak na disi i, “Mangihutkon ugamonta, aha do na tola baenonta di Ari Sabat? Mambaen na denggan do sanga mambaen na jahat? Manolong halak do sanga mangago halak?” Tapi sip sajo do halahi.

⁵Marsak ma Jesus hara ni pir ni roha ni halahi. Jadi muruk ma Jesus marnida halahi na humaliang i, didok Ia ma tu bayo i, “Pahortang ma tanganmi!” Dipahortang ia ma tangannia i dung i gabe malum ma.

⁶Marmorotan ma angka halak Parise i, ditinggalkon halahi ma bagas paribadatan i. Manigor marpokat ma halahi dohot angka halak na saroha dohot si Herodes laho mamunu Jesus.

⁷Mandao ma Jesus dohot angka anak siseanNia tu Dano Galilea. Tapi bahat sajo do halak sian Galilea na kehe mangihutkon Jesus.

⁸Bahat muse do na ro sian Judea, sian Jerusalem, sian Luat Idumea dohot angka na sian ipar ni Batang aek Jordan dohot sian kota Tirus dohot Sidon. Marroan ma halahi tu Jesus hara ni na dung dibege halahi sude taringot tu angka pambaenanNia.

⁹Hara ni bahat ni jolma i, gabe disuru Jesus ma angka anak siseanNia paradehon parau diSia, anso ulang mur disosak halak na bahat i Ia.

¹⁰Ma songon i bahatna dipamalum Ia halak, jana sanga ise na adong nyaena marsiadu ma laho manjama Ia.

¹¹Angka halak na hona setan pe muda marsuo dohot Ia, angkon manigor manungkap marsomba-somba di joloNia mangangguhi, “Anak Ni Debata do Ho!” ninna be.

¹²Tapi dipaksa Jesus do anso ulang dipaboa-boa tu halak, sanga ise Ia.

¹³Dung i manangkok ma Jesus tu sada dolok, dipiohon Ia ma sanga ise na giot sipioonNia. Marroan ma halahi,

¹⁴dipili Ia ma dua bolas halak sian halahi. Digoari Ia ma halahi angka rasul, “Au do mamili hamu, anso rap hamu dohot Au.” Songon i ma pandok ni Jesus tu halahi. “SuruonKu ma hamu laho paboahon Jamita Na Denggan na sian Debata,

¹⁵jana dapotan kuaso ma hamu laho mangusir angka setan.”

¹⁶Angka on ma goar-goar ni halahi na dua bolas, na nitodo ni Jesus i: Si Simon (na nigoar ni Jesus si Petrus).

¹⁷Si Jakobus dohot angginia si Johannes, i ma angka anak ni si Zebedeus. (Digoari Jesus do halahi na dua na markaha-maranggi on, Boanerges. Boanerges astuanna “halak na songon ronggur”.)

¹⁸Si Andreas, si Pilipus, si Bartolomeus, si Mateus, si Tomas, si Jakobus anak ni si Alfeus, si Tadeus, si Simon sian Kana,

¹⁹dohot si Judas Iskariot na manjehehon Jesus.

²⁰Dung i masuk ma Jesus tu sada bagas. Tapi laing marlagut dope halak na bahat i, jabat inda sanga mangan Jesus rap dohot angka anak siseanNia i.

²¹Jadi tarbege ma tu sisolkotNia na masa i, gabe ro ma halahi laho mangalap Ia. Harana didok halahi, “Ma rintik Ia!”

²²Didok angka Siboto Surat na sian Jerusalem i ma, “Na susur do sibolis tuSia!” Adong muse na mandok, “Kapala ni setan i do na mangalehen kuaso tuSia laho mangusir setan i.”

²³Dung i dipiohon Jesus ma halak na bahat i, dicaritohon Ia ma piga-piga umpama tu halahi. “Bia ma pangusir ni Sibolis di Sibolis?

²⁴Muda so adong hasadaon di sada harajaan, sai marbadai rayat sama rayat disi, na giot maronco ma harajaan i.

²⁵Laing songon i muse do, muda so adong hasadaon di tonga-tonga ni na sabagas, sai marmusu na sada tu na sada nari, sego ma na sabagas i.

²⁶Songon i muse ma di bagasan harajaan ni Sibolis i. Muda masa parbolat-bolatan dohot parbadaan disi, paboa na so pola honok be kuaso ni i. Angkon mago noma i.

²⁷Nada tarbaen halak masuk tu bagas ni na gogo laho mangarampas sinadonganna i anggo so jolo ditambat ia na gogo i. Dung i pe, baru tarrampas ia sude sinadonganna i.

²⁸Tutu do na Hudok on! Sude dosa na nibaen ni jolma dohot sude hata na jahat na nipardokkonan, tarsesa do i.

²⁹Tapi anggo na mangalayasi Tondi Parbadia, bagi na bia pe, nada tarsesa i! Angke dosa na manongtong do dosa na nibaennia i.”

³⁰Hara ni na nidok ni halak do, adong tondi ni setan di bagasan Jesus umbaen na nidokNia songon i.

³¹Dung i ro ma inang ni Jesus dohot angka kahanggiNia. Dipainte halahi ma di ruar dung disuru halahi halak na asing mamiohon Jesus.

³²Jadi topet hatiha i bahat halak na mangarongomi Jesus. Didok halahi ma tuSia, “Di ruar do inanta dohot angka angginta. Giot marsuo dohot Ho.”

³³Dialusi Jesus ma, “Ise dehe Dainang? Ise ma he lakna kahanggingKu?”

³⁴Dung i diligi Ia ma tu angka na marjuguhan i na humaliang Ia, ning Ia ma, “On do Dainang dohot angka kahanggingKu!

³⁵Halak na mambaen lomo ni roha ni Damang, angka i do kahanggingKu dohot ibotongKu dohot Dainang.”