Read Batak Angkola LUKAS 1 Bible Online

LUKAS 1 - Batak Angkola bible

LUKAS 1

¹Ale Teofilus, na niparsangapan! Madung bahat nian angka dongan mangusahohon sadenggan-dengganna laho manyuratkon taringot tu angka na tarjadi di tonga-tonganta.

²Sarupa do na nisurat ni halahi i dohot carito na dung lalu tu hita sian angka na midaan sandiri sude na masa i sian mulana jana na manjamitahon Hata i.

³Tapi saonnari, dibaen madung tangkas hupamanat sudena i sian mulana, gabe laing denggan ninna rohangku laho manyuratkon sada laporan na taratur di ho.

⁴Nibaen pe songon i, anso singkop do diboto Tuan i sude na sintong na dung diajarkon tu ho.

⁵Hatiha si Herodes gabe raja di Luat Judea,[1] adong ma sada malim na margoar si Zakaria. Masuk tu horong ni Malim Abia do ia. Dadaborunia margoar si Elisabet, laing sian pomparan ni malim muse.

⁶Jop do roha ni Debata marnida ngolu ni halahi na saripe. Rap sipangoloi do halahi na dua di parenta dohot paraturan ni Tuhan.

⁷Nada mardakdanak halahi angke na so maruntungan do si Elisabet, boti rap matobang do halahi.

⁸Jadi di na sanoli, topet ma si Zakaria mandalankon karejo hamalimon di jolo ni Tuhan.

⁹Jadi songon dia na somal dibaen angka malim, laing dipadalan ma undian. Gabe si Zakaria ma hona undi masuk tu Bagas Ni Debata laho manutung hamonyan disi.

¹⁰Jadi dompak na manutung hamonyan i, martangiang ma halak na bahat di ruar, marjongjongan.

¹¹Jadi ro ma hatiha i sahalak surusuruan mandapotkon si Zakaria. Jongjong ma surusuruan i sabola siamun ni meja panutungan ni hamonyan i.

¹²Jadi dung diida si Zakaria surusuruan i, tarsonggot ma ia boti gabe mabiar.

¹³Tapi ninna surusuruan i ma tusia, “Ulang ho mabiar Zakaria! Madung dijagit Debata tangiangmi. Sorang ma sada anakmu sian dadaborumu si Elisabet. Angkon si Johannes do goarna baenonmu.

¹⁴Gabe jop sajo ma rohamu boti halak pe bahat do na marjop ni roha muda dung sorang dakdanak i sanoli on!

¹⁵Gabe halak na godang do dakdanak i mangihutkon parnidaan ni Tuhan. Nada tola ia minum anggur, sanga siinumon na koras. Mamungka di bortian dope ia, Tondi Parbadia do mangarajai ia.

¹⁶Toguonnia do bahat halak Israel anso mulak tu Debata, Tuhan ni halahi.

¹⁷Angkon gabe suruan ni Debata do ia, na gogo jana markuaso songon si Elia. Padameonnia ma ama tu anakna, toguonnia ma halak na so pangoloi anso mulak tu dalan na sintong. Dibaen ia pe sudena i, na laho paradehon sada bangso do na dung singkop di Tuhan i.”

¹⁸“Bia do parbinotongku taringot tusi bahaso na tutu do i tarjadi?” ning si Zakaria manyapai surusuruan i. “Ma matobang au, songon i muse dadaborungku na dung matobang muse do.”

¹⁹Dialusi surusuruan i ma, “Si Gabriel do au. Mangoloi Debata do karejongku. Ia do na marsuru au paboahon Jamita Na Denggan on tu ho.

²⁰Sude na hudokkon on, pasti do angkon tarjadi muda dung dapot hatihana songon na dung ditontuhon Debata. Tapi hara ni na so porsaya ho, nada tarbaen ho be annon mangkatai. Torus noma ho ngungu lopus tu hatihana tulus sude na hupaboa i.”

²¹Jadi laing tarpainte-inte ma halak i di si Zakaria. Homang ma halahi biasi songon i honokna ia di bagasan Bagas Ni Debata.

²²Jadi ujungna di na ruar ia, nada malo be ia mangkobari tu halahi. Dohot tangannia sajo noma ia mambaen tanda-tanda, jana laing ngungu. Gabe tarboto ma tu angka halahi na niidania do sanga aha parnidaan di bagasan Bagas Ni Debata.

²³Dung abis hatihania markarejo di Bagas Ni Debata, mulak ma si Zakaria tu bagasnia.

²⁴Inda sadia honok nari, denggan ma pamatang ni si Elisabet dadaborunia i. Sai di bagas ma ia lima bulan honokna.

²⁵Didok ia ma, “Ujungna hape ditolong Tuhan do au jana dibuat Ia habileanku.”

²⁶Dung onom bulan denggan pamatang ni si Elisabet, disuru Debata ma surusuruan Gabariel kehe tu sada kota na margoar Nasaret di Luat Galilea.

²⁷Na laho maroban barita tu sada bujing-bujing do umbaen na disuru si Gabariel tusi, i ma tu na margoar si Maria. Na dung martunangan do anak boru i tu sada bayo na margoar si Josep sian pomparan ni si Daud.

²⁸Jadi ro ma surusuruan i tu si Maria mandok, “Horas ma di ho, bujing-bujing na nipasupasu ni Tuhan! Sai rap do Tuhan i dohot ho!”

²⁹Tarsonggot ma si Maria umbege hata ni surusuruan i. Gabe sapa-sapa ma si Maria di bagasan rohania sanga aha do arti ni hata horas-horas i.

³⁰Dung i didok surusuruan i ma tusia, “O, Maria, ulang ho mabiar dibaen jop do roha ni Debata mida ho.

³¹Denggan ma pamatangmu jana sorang ma sada anakmu, jana angkon Jesus do baenonmu goarNa.

³²Gabe magodang ma Ia jana digoari ma Ia Anak Ni Debata Na Gumincat. Gabe raja ma Ia baenon ni Debata songon si Daud ompuNa i.

³³Jadi gabe raja ma Ia di angka pomparan ni si Jakob ro di salolot ni lolotna. Nada marujung be HarajaanNia.”

³⁴“Bia ma tarjadi ni i, salangkan au bujing-bujing dope?” ning si Maria tu surusuruan i.

³⁵Dialusi surusuruan i ma, “Tondi Parbadia do mangarajai ho jana kuaso ni Debata ma manggohi ho. Hara ni i ma da umbaen nigoaran Dakdanak i na Badia i, Anak Ni Debata.

³⁶Jana parate-atehon ma on: Si Elisabet edami pe madung pola onom bulan denggan pamatangnia haru pe didok halak ia na so maruntungan boti umurnia pe madung ginjang.

³⁷Angke nada adong na so tarpatupa anggo di Debata.”

³⁸Dung i ninna si Maria ma, “Naposo ni Tuhan do au, sai tulus ma di au songon na nidokmi.” Dung i kehe ma surusuruan i maninggalkon ia.

³⁹Dung i manigor kehe ma si Maria manangkok tu sada kota di Luat Juda.

⁴⁰Kehe ma ia tu bagas ni si Zakaria. Di na masuk ia tu bagas i ditabi ia ma si Elisabet.

⁴¹Disi dibege si Elisabet hata horas-horas ni si Maria i, manggulot ma manigor dakdanak na di bagasan pamatangnia i. Gabe digohi Tondi Parbadia ma si Elisabet.

⁴²Dung i mangkuling ma ia marhite sora na gogo, “Dipasupasu do ho sian sude dadaboru jana dipasupasu muse ma parbatu ni butuhamu.

⁴³Ise dehe au on umbaen na ro ina ni Tuhanku mandapotkon au?

⁴⁴Disi hubege nangkin hata horas-horas na nidokmi, manigor manggulot ma dakdanak na di bagasan pamatangku hara ni mogana.

⁴⁵Martua ma ho, hara ni na porsaya ho angkon tulus do na nidok ni Tuhan i tu ho!”

⁴⁶Ning si Maria ma, “Dipuji rohangku do Tuhan i,

⁴⁷marmoga-moga rohangku hara ni Debata Sipatorkiskonku.

⁴⁸Angke diingot Ia do au, naposoNa na bile on! Mamungka saonnari sude ma halak mandokkon au na martua,

⁴⁹hara ni Na Markuaso i, na dung mambaen angka pangalaho na godang tu au. Na Badia do goarNa.

⁵⁰Sian sundut tu sundut do holong ni rohaNia maradopkon halak na mabiar tuSia.

⁵¹Dohot tanganNia na gogo i diparsuakkon Ia angka halak na sombong, jana dipasarsar Ia tahi ni halahi.

⁵²Dipaijur Ia angka raja sian juguhanna jana dipagincat Ia angka halak na bile.

⁵³Dipabutong Ia angka halak na male marhite angka na denggan, tapi anggo halak na kayo dipaorot Ia mardongan tangan na rumar.

⁵⁴Dilehen Ia pangurupion tu Israel, naposoNia i, angke giot digohi Ia janjiNia tu angka ompunta.

⁵⁵I ma janji na patuduhon haburjuonNia tu si Abraham dohot tu sude pomparannia sapanjangna.”

⁵⁶Adong tolu bulan si Maria tinggal rap dohot si Elisabet, i pe anso mulak ia tu bagasnia.

⁵⁷Dapot ma hatihana hipas si Elisabet. Sorang ma sada anaknia.

⁵⁸Dibege angka hombar bagasnia i ma songon i dohot koum sisolkotnia, songon i ma hape dengganna roha ni Tuhan maradopkon si Elisabet, gabe dohot ma halahi sude marjop ni roha.

⁵⁹Dung marumur dakdanak i salapan ari ro ma halahi laho pasunatkonsa. Ninna roha ni halahi si Zakaria ma baenon goar ni dakdanak i, mangihutkon goar ni amangna,

⁶⁰tapi ninna inangna i ma, “Nada le! Angkon si Johannes do goarna baenon.”

⁶¹“Nada adong koum sisolkotmu na margoar songon i,” ning halahi tusia.

⁶²Dung i dihilap halahi ma si Zakaria laho manyapai sanga ise do baenon goar ni dakdanak i.

⁶³Dipangido si Zakaria ma sada batu tulis, disuratkon ia ma disi, “Si Johannes do goarna.” Homang ma roha ni halahi sude.

⁶⁴Laing di hatiha i manigor malo ma si Zakaria mangulahi mangkatai jana dipuji-puji ia ma Debata.

⁶⁵Gabe mabiar ma sude angka hombar bagasnia, jana sar ma barita i tu sude luat dolok ni Judea.

⁶⁶Sude halak na umbege pangalaho i mamungka ma marpikir-pikir jana sapa-sapa di bagasan rohana, “Gabe aha ma ulaning dakdanak on saulahon?” Angke tangkas do kuaso ni Tuhan adong disia.

⁶⁷Digohi Tondi Parbadia ma si Zakaria amang ni dakdanak i gabe dipaboa ia ma tona ni Tuhan. Ning ia ma,

⁶⁸“Pinuji ma Tuhan Debata ni bangso Israel Madung ro Ia manopot bangsoNa, jana paluahon halahi.

⁶⁹Dilehen Ia do di hita tanduk haluaan, di bagasan pomparan ni si Daud, naposoNia.

⁷⁰Songon na dung dihatahonNia narobi markite-hite angka panurirang na nipiliNia,

⁷¹Na giot paluaonNia ma hita sian angka musunta dohot sian kuaso ni halak na magigi mida hita.

⁷²Anso markite-hite i ma dipatuduhon Ia haburjuon ni rohaNia tu angka ompunta jana digohi Ia do janjiNia na badia i.

⁷³Na dung marsumpa do Ia tu ompunta si Abraham, jana marjanji Ia laho paluahon hita sian musunta, anso taoloi Ia mardongan biar ni roha,

⁷⁴

⁷⁵di bagasan habadiaan dohot hatigoran di adopanNia, salolot ni lolotna.

⁷⁶O, ale anakku, goaron ma ho panurirang ni Debata Na Gumincat i. Jumolo do ho disuru Tuhan giot manastas dalan sibolusonNia.

⁷⁷Jana patuduhon tu bangsoNia pangastuion taringot tu haluaan, marhite na dung disesa angka dosa ni halahi,

⁷⁸hara ni asi dohot holong ni roha na sian Debatanta, jana marhite i do bincar di hita sinondang manyogot sian inganan na gincat.

⁷⁹Songon i ma dilehen Ia sinondangNia tu sude halak na mangolu di bagasan hagolapan dohot biar. Togu-toguonNia ma hita di dalan hadameon.”

⁸⁰Mur magodang ma anak ni si Zakaria i, tondinia pe mur margogo. Di halongonan do ia tinggal lopus dapot hatihana laho patidahon diri ia tu bangso Israel.