Read Batak Angkola LUKAS 11 Bible Online

LUKAS 11 - Batak Angkola bible

LUKAS 11

¹Sanoli di sada inganan martangiang ma Jesus. Dung sidung Ia na martangiang i, didok sahalak sian anak siseanNia i ma tuSia, “Tuhan, ajari ma hami martangiang songon si Johannes diajari Ia do martangiang angka anak siseanNia i.”

²Dung i didok Jesus ma tu halahi, “Muda martangiang hamu songon on ma dok hamu, ‘Ale Amangnami. Pinarbadia ma goarMu. Ro ma HarajaanMu.

³Lehen ma ganop ari sipanganon na porlu di hami.

⁴Sesa ma angka dosanami, songon hami manyesa dosa ni sude na marsala di hami. Ulang pamasuk hami tu bagasan pandugaan.’ ”

⁵Didok Jesus ma tu halahi, “Sugari adong sian hamu na kehe tu bagas ni donganna tonga borngin, mandok tusia, ‘Painjamkon ma jolo dongan tu au tolu kibung roti,

⁶harana ro do donganku sian pardalanan, on dope lalu di bagasnami, hape nada adong sipanganon lehenonku disia!’

⁷Sugari didok donganmu na nitopotmi songon on, ‘Ulang ho pasusa-susahon tu au! Madung nigoruk pintu jana madung modom au dohot angka dakdanakku. Nada tarbaen au be ngot laho mangalehen sanga na aha di ho.’ ”

⁸Hudok ma di hamu: “Haru pe dongannia ho, nada ra be ia ngot laho mangalehen bagi aha di ho. Tapi hara ni sai torus do ho mangido tusia, gabe ngot muse ma ia laho mangalehen tu ho sanga aha na nihaporluhonmi.

⁹Jadi, Au pe Hudok ma di hamu: Pangido hamu ma, lehenon do di hamu; jalahi hamu ma, dapotan do hamu; tektehi hamu ma, ungkapon do pintu tu hamu.

¹⁰Angke sai manjagit do sude halak na mangido; dapotan do halak na manjalahi, jana ungkapon do pintu di na manektek pintu.

¹¹Ise ma he sian hamu angka ama, na mangalehen ulok tu anakmunu, muda dipangido ihan?

¹²Sanga, ra ma he hamu mangalehen hala tu dakdanakmunu, muda dipangido ia pira?

¹³Haru na bia pe jahatmunu, laing diboto hamu do patupa na denggan tu dakdanakmunu, mur ma hape Ama na di banua ginjang i. Laing na lehenonNia do tondiNia di halak na mangido diSia!”

¹⁴Sanoli dipaorot Jesus ma tondi na jahat na mambaen ngungu sada halak. Dung ruar tondi na jahat i, mamungka ma na ngungu i mangkatai. Homang-komang ma halak,

¹⁵tapi adong ma deba mandok, “Umbaen na tarpaorot Ia pe tondi na jahat i, hara ni na dung dilehen si Beelsebul kapala ni angka setan i do kuaso diSia.”

¹⁶Adong muse do angka jolma i na giot manguji Jesus. Dipangido halahi ma tu Jesus anso dibaen Ia jolo hahomangan tanda na sian banua ginjang.

¹⁷Tapi diboto Jesus do maksud ni halahi. Gabe didok Ia ma tu halahi, “Harajaan na marsalisi di bagasan, nada sadia honok tahan i. Songon i muse ma parsaripeon na marbadai sarsar ne ma i.

¹⁸Muda masa parbadaan di bagasan harajaan ni Sibolis, na sada tu na asing, tarbia ma partahanna harajaan i? Didok hamu, hara ni pangurupi ni si Beelsebul do Hupaorot begu i.

¹⁹Jadi, muda marhite kuaso ni si Beelsebul do Hubaen i, antong mangasahon kuaso na sian ise do angka na mangihutkon hamu paorotkon angka setan i? Hara ni i, halahi do na gabe panguhumimu!

²⁰Tapi muda Huusir tondi na jahat markite-hite kuaso ni Debata, i ma tandana bahaso na dung ro do Harajaan Ni Debata tu hamu.

²¹Muda dijagoi sada halak na gogo na singkop sinjatana do bagasnia sandiri, nada mahua sinadongannia i.

²²Tapi muda adong sada halak na gumogo sian ia jana manaluhon ia, buatonnia ma sandok sinjata na dipakenia i, jana bagi-bagionna ma sude tabanna i.

²³Sanga ise na so mandongani Au, alongKu do i, jana sanga ise na so rap dohot Au palagutkon na paserakkon do i.”

²⁴“Muda dung ruar tondi na hodar sian sada-sada halak mardalani ma tondi na hodar i di inganan na hiang laho manjalak-jalahi inganan paradianan. Jana muda nada dapot di inganan i, ning ia ma di bagasan rohania, ‘Mulak noma au mangulahi tu inganan na hutinggalkon i!’

²⁵Jadi dung mulak ia mangulahi tu bagas i, madung ias jana maratur bagas i didapot ia.

²⁶Dung i dipio ia ma pitu nari tondi na hodar na dao jumahat sian ia. Dung i ro ma halahi jana maringanan di bagasan halakna i mangulahi. Ujungna mur jumatjat ma pangalahona sian na parjolo i.”

²⁷Dung didokkon Jesus songon i, mangkatai ma sada anak boru sian halak na bahat i. Didok ia ma tu Jesus, “Martua ma dadaboru na manubuhon dohot na pasusuhon Ho!”

²⁸Tapi dialusi Jesus ma, “Sanga ise na umbege hata ni Debata jana na mandalankonsa, halahi do na martua situtu!”

²⁹Hatiha dirongomi angka jolma i Jesus, laing ditoruskon Jesus ma pangkataionNia. Ning Ia ma, “Na lobi jahat do angka jolma sisaonnari on. Dipangido halahi ma antong giot mida tanda hahomangan. Hape sada tanda hahomangan pe indangkon na lehenon di halahi, asing sian hahomangan ni Panurirang Junus sajo.

³⁰Tarsongon Panurirang Junus na gabe sada hahomangan di halak Ninive, laing songon i muse ma Anak Ni Jolma i angkon gabe sada hahomangan tu angka jolma sisaonnari on.

³¹Saulahon di na manguhumi tano on Debata, jongjong ma ratu na sian Selatan pajojorkon hasalaan ni angka jolma sisaonnari on; angke na ro do ia sian suhi ni tano on manangihon hapistaran ni si Salomo. Ligi ma, adong do dison na gumodang ulang pado si Salomo!

³²Di ari paruhuman i jongjong ma halak kota Ninive patuduhon hasalaanmunu, angke dipauba halahi do rohana hara ni jamita ni si Junus. Ligi ma, adong do dison na gumodang ulang pado si Junus.”

³³“Nada adong halak na manutung lampu, jana ditabunihon ia lampu i sanga ditutupi dohot ampang.[11] Tontu tu inganan parlampuan do i dibaen anso torang idaon ni halak, muda masuk halahi.

³⁴Mata, i ma na gabe lampu ni pamatang. Muda torang matamu, pamatangmi pe gabe torang do. Tapi muda rambon matamu, gabe golap situtu ma sude pamatangmi.

³⁵Antong hara ni i manat-manat ma hamu anso ulang sanga golap na torang na di bagasan ho i.

³⁶Muda sude pamatangmi hona sinondang jana nada adong be deba na golap, gabe torang sajo ma sude pamatangmi, sarupa ma i tu hatiha na nisondangan ni cahaya ni lampu ho.”

³⁷Dung sidung Jesus mandok hata, diontang sada halak Parise ma Ia mangan tu bagasna; dung i masuk ma Ia, juguk jana mangan.

³⁸Homang ma roha ni halak Parise i dung diida Ia manigor mangan Jesus so jolo marbasu tangan.

³⁹Gabe didok Jesus ma tusia, “Tutu do i anggo halak Parise somal do dipaias hamu mangkuk dohot pingganmunu sian duru sajo tapi anggo di bagasan dirimunu sandiri gok dohot na nisamun dohot hajahatan do.

⁴⁰Na oto do hamu! Nada he Debata do manompa parduru i, jana laing Debata muse do na manompa bagian parbagasan i?

⁴¹Na adong di bagasan mangkuk dohot pingganmunu i, i ma nian silehenonmunu tu angka halak na pogos. Di pangalaho na songon i ma gabe ias sudena i di hamu.

⁴²Marjaya ma hamu angka halak Parise, dibaen dilehen hamu do parsampuluan sian angka suan-suanan na menek, inggu dohot ragam-ragaman ni simarata, tapi dilaosi hamu do tona dohot holong ni roha ni Debata. Angkon sikarejohonon do i, tapi ulang nitinggalkon na asing i.

⁴³Marjaya ma hamu halak Parise, harana jop do rohamunu manjuguhi juguhan na sumurung di bagas paribadatan dohot diparsantabi ni halak na di poken.

⁴⁴Marjaya ma hamu! Songon tanoman na so martanda do hamu, di dege-dege halak sian na so binotona!”

⁴⁵Jadi adong ma sahalak sian Siboto Surat i na mandok, “Guru, madung diincahi Ho hami markite-hite na nidokMi.”

⁴⁶Dialusi Jesus ma, “Marjaya ma dohot hamu angka Siboto Surat! Dipaporsankon hamu do boban na dokdok tu abara ni halak, hape hamu sandiri umpe ra mangantul boban i, hum mandaiskon jari-jarimunu sajo pe nada.

⁴⁷Marjaya ma hamu! Dibaen di pauli hamu do tanoman ni angka panurirang na nimatehon ni angka ompungmunu.

⁴⁸Hamu sandiri pe dioku hamu do na satuju hamu tu angka pambaenan ni angka ompungmunu i. Angke halahi ma antong na mamatehon angka panurirang i jana hamu ma na pajongjong angka tugu di ginjangna.

⁴⁹Hara ni i didok habisukon ni Debata i ma, ‘Husuru ma angka panurirang dohot angka rasul tu halahi, jana deba sian angka panurirang dohot sian angka rasul i bunuon jana parkancitan ni halahi ma.’

⁵⁰Anso tuntuton ma tu halak sisaonnari on mudar ni sude panurirang, na dung durus mamungka sian parmulaan ni tano on.

⁵¹Mamungka sian hamamate ni si Abel lopus tu hamamate ni si Zakaria, na nibunu di holang-kolang ni langgatan dohot Inganan Na Badia. Olo tutu, ‘Hudok ma tu hamu angkon tuntuton ma i tu halak sisaonnari on.

⁵²Marjaya ma hamu angka Siboto Surat, angke madung dibuat hamu anak kunci ni parbinotoan, hape hamu sandiri pe nada ra masuk tu bagasan, gariada tehe diolat hamu do angka na giot masuk tu bagasan!’ ”

⁵³Jadi dung ruar Jesus sian inganan i, disosak angka Siboto Surat dohot halak Parise i ma Ia, marragam do angka sapa-sapa dibaen halahi tuSia.

⁵⁴Jana manat ma dibaen halahi laho padapotkon sanga aha na sala sian pandohan ni Jesus.