Read Batak Angkola LUKAS 12 Bible Online

LUKAS 12 - Batak Angkola bible

LUKAS 12

¹Marribu halak na marsisohan jabat adong na tardege-dege patna i. Jadi taran marrongoman jolma i mandok hata ma Jesus, lumobi tu angka siseanNia i, “Jago ma hamu maradopkon ragi ni halak Parise, i ma pangalancapon ni halahi.

²Nada adong bagi aha na tutup na so ungkap muse, sanga na buni na so binoto muse.

³Na nihobarkonmunu di na golap, habegean do i di na torang; jana na nihusipkonmunu tu pinggol ni halak di bagasan bilik na nitutup, nibaritahon ma i sian bungkulan ni bagas.”

⁴“Ingot hamu ma ale angka dongan! Ulang pola mabiar hamu mida halahi sibunu pamatang jana na so bisa mambaen sanga aha pe dung i.

⁵Denggan ma Hupatuduhon di hamu, sanga ise do na angkon sihabiaranmunu. Habiari hamu ma Debata! Angke dung mamunu Ia markuaso muse dope Ia mangambungkon tu narako! Denggan ma ingot hamu; angkon habiaranmunu do Ia!

⁶Nada he digadis halak do lima amporik arga dua sen? Haru pe songon i, umpe sada sian i na ni halupahon ni Debata.

⁷Obuk na di ulumunu i pe madung dietong i sude, hara ni i ulang hamu mabiar; dao do ummarga hamu sian angka amporik!”

⁸“Tapi Hudok ma di hamu: Ganup halak na mangoku Au di adopan ni halak, okuan ni Anak Ni Jolma ma ia di adopan ni angka surusuruan ni Debata.

⁹Tapi barang ise na mamorso Au di jolo ni jolma, porsoon do ia di adopan ni angka surusuruan ni Debata.

¹⁰Halak na mandok sanga aha na maralo tu Anak Ni Jolma i, tarsesa do halakna i; tapi anggo halak na mangincahi Tondi Parbadia nada tarsesa be halahi.

¹¹Muda dioban hamu tu angka bagas paribadatan anso diuhumi di jolo ni pamarenta sanga parkuaso, ulang ma humolos rohamunu taringot tu alusmunu, sanga pe taringot tu hata sidokkononmunu,

¹²angke ajaran ni Tondi Parbadia do hamu sanga aha sidokkononmunu di hatiha i.”

¹³Adong ma sahalak sian halak na bahat i na mandok tu Jesus, “O Gurunami, dokkon ma jolo tu dangkang anso dilehen ia di au deba arta tean-teanan sian simatobangnami na nitadingkonnia di hami.”

¹⁴Dialusi Jesus ma, “Ise ma he dongan, na mambaen Au gabe panguhum sanga gabe pambagi arta tean-teanan ni hamu na dua?”

¹⁵Dung i didok Jesus ma hata tu sude halak na disi, “Manat jana jagohon hamu ma dirimunu, angke haru bahat sajo pe arta ni halak, nada marguru tu sinadonganna i anggo ngoluna.”

¹⁶Dung i dipaboa Jesus ma umpama on tu halahi, “Adong ma sada halak na kayo. Adong tanonia na napu na parohon suha bahat sajo.

¹⁷Marpikir ma ia di bagasan rohania, ‘Aha ma ulaning sibaenonku saonnari? So adong inganan panyimpanan ni sude suha ni artangki.

¹⁸Songon on noma hubaen: Hubungkar ma sude angka gudang i jana hupajongjong ma na gumodang. Disi ma husimpan suha ni tanongki dohot sude ni artangku na asing i.

¹⁹Dung sidung i hudok ma tu rohangku sandiri: Na maruntung ma da ho! Madung bahat angka na denggan disimpan ho; madung tuk i martaon-taon. Nada pola bahat be sipikiranmu! Aha dope, mangan minum ma ho marsonang-sonang!’

²⁰Tapi didok Debata ma tusia, ‘O na oto! Laing borngin on mate ma ho! Jana sude na dung dipasingkopmi giot di ho, gabe ise ma nampuna i?’ ”

²¹Laho paujungkon carito i didok Jesus ma, “Songon i ma pangalaho ni halak na sai torus palagut arta tu dirina sandiri sajo, tapi nada mamora di adopan ni Debata.”

²²Dung i didok Jesus ma tu angka siseanNia, “I do umbaen na Hudok, ‘Ulang humolos rohamunu hara ni angka parngoluonmunu, i ma taringot tu sanga aha na giot panganonmunu annon, sanga aha na giot pakeonmunu annon.’

²³Umporluan dope ngolu sian sipanganon, jana umporluan dope pamatang sian pakean.

²⁴Parrohahon hamu ma jolo unggas si gawak i! Nada manyabur same halahi, nada manyabi, nada adong muse gudang sanga talobat ni halahi. Hape dijagohon Debata do halahi! Ummargaan dope hamu sian angka unggas!

²⁵Ise ma he sian hamu na tarbaen patamba umurna sadari markite-hite holosna?

²⁶Muda so tarpatupa hamu do salang na songon i menekna, biasi ra hamu mangholoskon angka na asing-asing i?

²⁷Parrohahon hamu ma sanga na bia angka bunga singkut ari na tubu di padang-padang i, inda markarejo angka bunga-bunga i, nada martonun muse. Tapi Hudok ma di hamu, salang si Salomo di bagasan sude hasangapanna nada marabit ia songon jeges ni sada sian angka bunga i.

²⁸Jadi, muda diabiti Debata do angka duhut na di padang i, na jeges sadari on tapi ancogot diambungkon tu api, tarlumobi ma hamu, ale angka na hurang porsaya!

²⁹Antong hara ni i, ulang ganggu rohamunu taringot tu sipanganon sanga siinumonmunu; ulang ma humolos rohamunu taringot tusi. (

³⁰Halak na so mananda Debata do na tongtong parayakkon angka na songon i.) Diboto Amangmunu i do na porlu di hamu angka na songon i.

³¹Tapi jalahi hamu ma HarajaanNia, dung i tambahononNia do sudena i tu hamu.”

³²“Ulang hamu mabiar, haru pe hum saotik sajo bilanganmunu! Angke jop do roha ni Amangmunu mangalehen HarajaanNia i tu hamu.

³³Gadis ma sude sinadonganmunu, jana lehen hamu ma i gabe asi-asi. Pature hamu ma di hamu angka huncang na so ra buruk, arta parbanua ginjang na so ra abis, na so hadonohan ni panangko jana nada tarpasego ngitngit.

³⁴Angke sanga di dia adong artamunu disi muse do dohot rohamunu!”

³⁵“Marjago-jago ma hamu mangadopi sanga aha na ro. Angkon totop do marhohos gontingmu jana gara palitomunu,

³⁶jana tudos ma hamu tu halak na painte-inte hamumulak ni tuanna sian horja haroan boru. Muda dung mulak tuanna i manektek pintu, manigor dibuka halahi ma pintu i.

³⁷Martua do angka naposo na nidapot ni tuanna sai painte-intehon harorona. Na tutu do na Hudokkon tu hamu, dihohosi ia ma gontingna, dung i dipajuguk ia ma halahi jana ro ma ia mangoloi halahi.

³⁸Jana muda ro ia di tonga borngin, sanga di andostorang, laing tong rade paintehonsa, jadi martua ma halahi.

³⁹Ingot hamu ma i! Anggo diboto nampuna bagas do sanga sadihari ro panangko, jago ma ia di bagasnia i, nada loasonnia buharon bagas i.

⁴⁰Hamu pe angkon tongtong do hobas, angke di hatiha na so panagamanmunu ro Anak Ni Jolma i, hape disi ma Ia ro.”

⁴¹“Tu hami do na nidokmu pangajaran i, Tuhan, sanga tu sude halak?” ning si Petrus manyapai.

⁴²Dialusi Jesus ma, “Ise ma he naposo na burju jana na marroha i! I ma da naposo na nisuru ni tuanna gabe pangarajai di angka naposo na asing i laho mangalehen halahi mangan di hatiha na ditontuhon.

⁴³Martua ma antong naposo na patulus karejona didapot tuanna na baru ro i.

⁴⁴Tutu do na Hudok on tu hamu: Pabangkitonnia ma ia mangarajai artania sasudena.

⁴⁵Tapi muda didok naposo i do di bagasan rohania, ‘Honok dope anso mulak tuanki,’ gabe dipungka ia ma mambalbali angka naposo halaklahi dohot dadaboru, gabe mangan minum ma ia lopus mabuk.

⁴⁶Di na sadari, hatiha na so ditagam roha ni naposo i, ompot ma mulak tuannia i. Gabe sijaljalan ni tuanna noma naposo i jana sarupa do bagiannia dibaen dohot angka halak na so porsaya.

⁴⁷Naposo na umboto hagiot ni tuanna, hape nada hobas ia jana nada dibaen ia hagiot ni tuannia i, sisambohon do i sagogona.

⁴⁸Tapi anggo naposo na so umboto hagiot ni tuanna, dung i dibaen ia na sala mambaen angkon nisambok ia, asok do panyambokna tu naposo i. Angke halak na dung dilehen bahat, bahat muse do dituntut sian ia. Jana halak na dung gabe hasahatan ni bahat pos ni roha, bahat muse do dituntut sian ia.”

⁴⁹“Madung ro Au maroban api tu portibi on, giot ni rohangKu nian gara ma apina i!

⁵⁰Laing adong dope pandidion na angkon sidalananKu. Jana susa sajo dope rohangKu salolot so tulus dope i.

⁵¹Ning rohamunu lakna na giot maroban dame Au tu tano on? Nada! Parbadaan do.

⁵²Mulai saonnari, muda adong lima halak di sada bagas, maralo ma na sada dohot na asing; tolu mangalo dua, sanga dua mangalo tolu.

⁵³Aloon ni amangna ma anakna jana anakna maralo tu amangna. Inangna maralo tu boruna jana boruna maralo tu inangna. Namboruna maralo tu parumaenna jana parumaenna maralo tu namboruna.”

⁵⁴Didok Jesus muse ma tu halak na bahat i, “Muda diida hamu ombun i manaek sabola Hasundutan, manigor didok hamu ma, ‘Na giot ro ma udan.’ Jana tutu do ro udan i.

⁵⁵Muda dihilala hamu ro alogo sian sabola Selatan, didok hamu do, ‘Milas ma ari.’ Jana tutu do malogo.

⁵⁶Hamu angka pangalancap! Diboto hamu do mangaligi tanda-tanda di langit an dohot di tano on. Biasi nada tarbaen hamu marnida angka tanda ni hatiha on?”

⁵⁷“Biasi nada ditontuhon hamu sandiri sanga aha na tutu?

⁵⁸Muda adong halak na mangaduhon hamu jana maroban hamu tu pangadilan, usahahon hamu ma da manyalosehon parkaro i dohot ia taran di tonga dalan hamu. Anggo inda songon i, saratonnia ma hamu tu jolo ni panguhum jana pasahatonnia ma hamu tu bagasan hurungan.

⁵⁹Porsaya ma hamu! Nada tarbaen hamu ruar sian hurungan i salolot so digarar hamu dope sudena.”