Read Batak Angkola LUKAS 13 Bible Online

LUKAS 13 - Batak Angkola bible

LUKAS 13

¹Hatiha i, ro ma piga-piga halak mandapotkon Jesus, paboahon taringot tu halak Galilea, i ma na nicampur ni si Latus mudar ni halahi tu mudar na giot sihaulkonon.

²Umbege carito i didok Jesus ma, “Hara ni na nibunu songon i halak Galilea i, diambang hamu ma i gabe tanda paboahon na bahatan dosa ni halahi sian halak Galilea na asing i?

³Nada! Tapi ingot hamu ma, anggo so muba do hamu sian angka dosamunu, hamu pe laing mate do sude songon halahi.

⁴Bia muse ma sisalapan bolas halak na mate di Siloam, na nitinggang ni palas-palas halahi? Ning rohamunu i ma patuduhon na bahatan dosa ni halahi sian pado sude angka halak na asing na maringanan di Jerusalem?

⁵Nada! Tapi ingot hamu ma, hamu pe angkon laing mate do sude sarupa dohot halahi, muda so muba hamu sian angka dosamunu i.”

⁶Dung i didokkon Jesus ma umpama on tu halahi, “Adong ma sada halak nampuna gala-gala di kobunnia. Ro ma nampuna i manjalahi batu ni hayu i hape umpe sada dapot ia.

⁷Jadi didok ia ma tu panjago kobun i, ‘Ligi ma, madung tolu taon honokna ro au tuson laho manjalahi batu ni gala-gala on, hape sada pe nada adong dapot au. Aha dope, taba ma bonana i. Aha gunana laing torus ia disi mangolu mangabiskon napu ni tano i!’

⁸Tapi dialusi tukang kobun i ma, ‘Tuan, padiar ma jolo sataon on laing mangolu hayu i. Huhuar ma jolo lubang humaliang bonana i anso ninapuan.

⁹Betak marbatu ia di taon na ro. Tapi muda nada be, taba ma.’ ”

¹⁰Di sada hatiha mangajari ma Jesus di bagasan Sinagoge, topet di Ari Sabat.

¹¹Adong ma disi sada dadaboru na jabat salapan bolas taon honokna marnyae hara ni tondi na jahat ro tusia. Puhung noma pamatangna i jana nada tarbaen ia be tigor jongjong.

¹²Dung diida Jesus anak boru i, dipiohon ma ia. Didok Jesus ma tusia, “O inang, malum ma ho saonnari!”

¹³Dung i dipayakkon Jesus ma tanganNia tu anak boru i, jana laing di na santongkin i manigor tigor ma pamatang ni anak boru i, jana dipuji-puji ia ma Debata.

¹⁴Muruk ma kapala ni bagas paribadatan i, hara ni na nipamalum ni Jesus halak di Ari Sabat. Didok ia ma tu angka halak na disi, “Onom ari honokna markarejo hita, marroan ma di angka ari i na giot sipamalumon, ulang ma hatiha di Ari Sabat!”

¹⁵Dialusi Tuhan i ma kapala ni bagas paribadatan i songon on, “Angka pangalancap do hamu! Nada he dipalua hamu do lombu dohot halodemunu sian barana di Ari Sabat jana dioban hamu tu balian, mangaleheni minum?

¹⁶Antong, saonnari dison adong sada halak anak boru pinompar ni si Abraham, na dung pola salapan bolas taon honokna dirahuti Sibolis i. Na so tola dehe ia dipalua sian ihot-ihotnia di Ari Sabat?”

¹⁷Gabe maila ma sude angka alo ni Jesus hara ni alusNia i, tapi anggo halak na asing i jop do rohana mida sude hahomangan na nibaen ni Jesus i.

¹⁸Dung i didokkon Jesus ma, “Tudos tu aha ma Harajaan Ni Debata i? Tu aha ma patudosonKu?

¹⁹Songon batu ni sabi do i na nibuat ni sada halak jana disuan ia di ladangnia. Jadi tubu ma i gabe hayu na godang, dung i ro ma angka pidong marasar di ginjang ni dangkana i.”

²⁰Dung i didokkon Ia ma mangulahi, “Tu aha ma Hupatudos Harajaan Ni Debata?

²¹Tudos ma i songon ragi na nibuat ni sada dadaboru jana digaorkon ia ma i dohot opat pulu liter topung, lopus nipamancom sudena.”

²²Di pardalanan laho tu Jerusalem dibolusi Jesus do angka kota dohot angka huta jana mangajari disi.

²³Jadi adong ma halak na manyapai tuSia, “Otik dehe Tuhan halak na giot paluaon i?” Dialusi Jesus ma,

²⁴“Angkon usahahononmunu do masuk mamolus sian pintu na sompit. Angke ingot hamu ma! Bahat do halak na marusaho giot masuk mamolus pintu i tapi nada tarbaensa.

²⁵Sada hatiha jongjong ma nampuna bagas i jana ditutup ia ma pintuna i. Dung i jongjong ma hamu di ruar manektehi pintu i jana mandok, ‘Dibuka Tuan i ma jolo di hami pintu on!’ Alusan ni Tuan i ma, ‘Nada Huboto sanga sian dia hamu ro!’

²⁶Alusanmunu ma, ‘Madung mangan dohot minum do hami rap dohot Tuan i. Jana madung mangajari do Tuan i di kotanami!’

²⁷Tapi ulahan ni Tuan i ma mandok, ‘Nada Huboto sanga na sian dia hamu. Kehe ma hamu sian on, sude hamu na mambaen hajahatan!’

²⁸Dung diida hamu si Abraham dohot si Ishak dohot si Jakob dohot sude angka panurirang marsonang-sonang di Harajaan Ni Debata, gabe tangis ma hamu jana mardangol situtu angke anggo hamu sandiri ambungkonon do tu ruar!

²⁹Marroan ma halak sian Habincaran dohot Hasundutan, sian Utara dohot sian Selatan jana juguk ma halahi marsipanganon di Harajaan Ni Debata.

³⁰Angka halak na parpudi i ma na gabe na parjolo. Jana halak na parjolo saonnari, i ma na gabe parpudi.”

³¹Laing di hatiha i, adong ma marroan angka halak Parise tu Jesus, mandok, “Ulang Ho maringanan dison! Morot ma Ho tu inganan na asing, angke giot bunuon ni si Herodes ma Ho.”

³²Dialusi Jesus ma, “Kehe ma ho paboahon tu sorigala i, ‘Sadari on lopus tu ancogot mangusir setan do Au dohot pamalum angka na marnyae, tapi pasidungonKu ma i di ari patoluhon.’

³³Haru pe songon i angkon laing patorusonKu do pardalananKu sadari on, ancogot dohot haduan, angke nada denggan sada panurirang dibunu di ruar ni kota Jerusalem.

³⁴O ale Jerusalem, Jerusalem! Dibunu ho do angka panurirang dohot angka na nisuru tu ho, didangguri ho dohot batu! Madung jotjot sai giot paluhutonKu sude halak na mangingani ho songon sada inang ni manuk na manggobak angka anakna di toru ni habongna, hape nada ra hamu!

³⁵Angkon tarulang noma sude bagasmunu. Jana nada idaonmunu be Au, lopus tu hatihana dokkononmu, ‘Dipasupasu ma na ro markite-hite goar ni Tuhan.’ ”