Read Batak Angkola LUKAS 14 Bible Online

LUKAS 14 - Batak Angkola bible

LUKAS 14

¹Sanoli topet Ari Sabat, kehe ma Jesus mangan tu bagas ni sada pamimpin ni angka Parise. Sai torus do dipamanat halak Jesus disi.

²Ompot ma ro sada halak na sigurbahon jongjong di adopanNia.

³Marsapa ma Jesus tu angka Siboto Surat dohot angka halak Parise na adong disi, “Mangihutkon ugamo Jahudi, tola dehe halak pamalum na marnyae di Ari Sabat?”

⁴Nada adong sanga aha pe alus ni angka Siboto Surat dohot halak Parise i. Mangkohom be halahi. Dipio Jesus ma bayo i jana dipamalum Ia, dung i disuru Ia kehe.

⁵Dung i didok Jesus ma tu halahi, “Muda adong sahalak sian hamu, adong dakdanakna sada, sanga lombuna sada, madabu tu sumur di Ari Sabat, nada he diompoti hamu do mangela tu ruar dakdanak i sanga lombu i laing di ari i muse?”

⁶Nada haalusan halahi hata i.

⁷Diida Jesus, adong sian angka na nipio i na marsiadu tu inganan na dumenggan. Jadi marumpama ma Ia tu halahi sude.

⁸“Muda diontang halak ho tu horja haroan boru, ulang ma kehe ho juguk tu karosi hasangapan. Harana betak na dung diontang halahi do na asing na dao sumangap ulang ho.

⁹Dung i ro ma tu ho suhut na mangontang hamu na dua mandok, ‘Lehen ma inganan on di halak on.’ Gabe ila ma rohamu kehe tu inganan na tumoruk.

¹⁰Jadi muda diontang halak ho, dumenggan ma juguk di inganan na tumoruk hian ho, jadi muda ro suhutna i mandok tu ho, ‘Tu juluan ma ho dongan juguk,’ gabe sangap ma ho di jolo ni tamu na asing i sude.

¹¹Angke sude halak na pagincatkon dirina sipatoruhon do, jana sude halak na patutoru dirina sipagincaton do.”

¹²Dung i didok Jesus ma tu suhut i, “Muda diontang ho halak mangan arian sanga mangan borngin, ulang ma ontang angka dongan-donganmunu sanga angka kahanggimunu sanga pe angka koum-koummunu sanga angka hombar bagasmu na kayo-kayo. Angke ontangon ni halahi do ho muse jadi dapotan balos do pambaenanmi muda songon i.

¹³Tapi muda mambaen pesta ho, halak na pogos ma da ontang, angka na martihas, angka na pangpang dohot halak na mapitung,

¹⁴jadi martua ma ho hara ni i. Angke nada tarbalos angka halak na songon i denggan ni rohami. Harana angkon dapotan balosna ma ho di ari hangongot ni angka na tigor roha i.”

¹⁵Umbege hata i mangkuling ma sahalak sian na niontang i tu Jesus, “Martua ma halak na mangan di Harajaan Ni Debata!”

¹⁶Tapi didok Jesus ma tu bayo i, “Sada hatiha adong ma sada halak na mambaen karejo na godang jana diontang ia ma bahat halak.

¹⁷Jadi mandapotkon ari na nitontuhon mamungka horja i, disuruhon ia ma angka naposonia mandapotkon angka tamu na niontang i mandok, ‘Ro ma hamu, madung singkop sude!’

¹⁸Tapi sude halahi, pasada-sada marsibaen sidalianna. Didok na parjolo i ma tu naposo i, ‘Na baru manobusi saba dope au. Jadi angkon ligionku jolo tano i. Mangido maap ma jolo au.’

¹⁹Na asing mandok, ‘Na baru hutobusi dope lima pasang lombu, jana giot mancubo angka lombu i jolo au. Mangido maap ma da au.’

²⁰Na asing muse mandok, ‘On dope au mambuat boru, jadi nada tarbaen au ro.’

²¹Jadi mulak ma naposo i paboahon sudena i tu tuannia. Muruk sajo ma tuan i. Didok ia ma tu naposonia i, ‘Antong ompoti ma kehe tu angka dalan dohot tu suhi-suhi ni kota on, oban ma tuson angka halak na pogos, angka na pangpang, angka na mapitung dohot angka na martihas.’

²²Didok naposo i ma, ‘Madung nipalalu parenta ni tuan i, tapi laing bahat dope inganan na so marisi.’

²³Jadi didok tuan i ma tu naposo i, ‘Kehe ma ho tu dalan godang dohot tu angka dalan na sompit di ruar ni kota, jana hara ma halak marroan anso gok sude bagaskon.

²⁴Ingot ma! Umpe sahalak sian tamu na dung niontang i hian mandai sipanganon na di horjangkon!’ ”

²⁵Bahat do halak na rap mangudurkon Jesus. Manaili ma Jesus tu halahi ning Ia ma,

²⁶“Muda adong halak na ro tu Au, hape holongan do rohania mida inangnia, amangnia, dadaborunia, dakdanaknia, kahangginia, angka ibotonia dohot dirinia sandiri pe tehe, nada tarbaen halak na songon i gabe siihutkon Au.

²⁷Barang ise na so mamorsan hayu parsilangna jana mangihutkon Au nada tarbaensa gabe anak siseanKu.

²⁸Muda adong sahalak sian hamu na giot pajongjong palas-palas, tontu jolo juguk do ia maretong harugiannia anso diboto ia sanga na dung tuk hepengnia pasidungkon palas-palas i sanga nada.

²⁹Angke muda inda tulus tarpasidungsa muse, hape madung sidung dibaen ojahanna, gabe sude ma halak mampartatai ia.

³⁰Dokkonon ni halak ma, ‘O ale, pajongjong bagas halak on hape so tarpasidungsa!’

³¹Muda adong sada raja na martentara sampulu ribu halak giot marporang mangalo raja na asing na martentara dua pulu ribu halak, tontu angkon juguk jolo raja i manimbang sanga na tuk do gogonia laho mangalo musunia i.

³²Anggo diboto ia do na so margogo ia, tontu tongosonnia do suruannia mangido mardame dompak dao dope musunia i.”

³³Ujungna ninna Jesus ma, “Laing songon i ma hamu. Umpe sahalak sian hamu tarbaen gabe siihutkon Au, anggo so tartinggalkon ia do sasude na adong disia.”

³⁴“Na marguna situtu do sira. Tapi muda hambar sira, nada adong be dalan laho paancimkon sira i mangulahi.

³⁵Nada adong muse be guna ni i. Tu ladang pe nada marguna, jana gabe napu pe nada marguna. Ambungkonon ni halak sajo noma sira na songon i. Barang ise na marpinggol laho marbinege, ditangihon ia ma!”