Read Batak Angkola LUKAS 15 Bible Online

LUKAS 15 - Batak Angkola bible

LUKAS 15

¹Di sada ari, marroan ma bahat angka sitagi pajak dohot angka halak na so ture dietong masarakat manangihon Jesus.

²Jadi mungut-ungut ma halak Parise dohot angka Siboto Surat i. Didok halahi, “Dipardongan Ia do angka halak na so ture, mangan muse dope Ia rap dohot halahi!”

³Jadi hara ni i dicaritohon Jesus ma tu halahi umpama on:

⁴“Ise dehe sian hamu nampunaan saratus biri-biri, jana muda mago sada sian i nada ditadingkon ia na sambilan pulu sambilan i jana kehe ia manjalahi na lilu i lopus dapot ia?

⁵Jadi muda dung dapot ia biri-biri i tontu marjop ni roha ma ia jana diporsan ia ma i diabarania,

⁶marobansa mulak. Dung i dipiohon ia ma angka dongannia, didokkon ia ma tu halahi, ‘Majop sajo rohangku dung dapot au mangulahi biri-biringku na mago i. Hara ni i tole ma marjop ni roha hita mamestahonsa!’

⁷Laing songon i ma pangalahona di banua ginjang i, tangkas ma Hupaboa di hamu! Jumop do roha ni Tuhan hara ni sada halak na jahat na pauba rohana sian angka dosana ulang pado sisambilan pulu sambilan halak na denggan roha na so porlu paubahon roha.”

⁸“Sanga sugari rupani adong ma sahalak dadaboru nampuna sampulu kamata hepeng perak, hape mago sangkamata — aha ma baenonnia? Tontu tutungonnia ma lampu jana disapu ia bagasnia i laho manjalahi hepeng i tangkas lopus dapot.

⁹Jadi dung dapot ia hepeng i, pioonnia ma angka dongannia dohot angka hombar bagasnia jana dokkononnia ma tu halahi, ‘Jop sajo do rohangku dung dapot au mangulahi hepengku na mago i. Beta ma tapestahon!’

¹⁰Hudok ma di hamu! Laing songon i ma angka surusuruan ni Debata. Marjop ni roha ma halahi muda adong sada halak na jahat paubahon rohana.”

¹¹Mandok hata ma Jesus muse. Ning Ia ma, “Adong ma sada bayo, dua anaknia.

¹²Didok sianggian i ma tu amangna, ‘Lehen ma tu au saonnari da amang bagianku sian artanta i.’ Gabe dibagi amangna i ma arta i tu anakna na dua i.

¹³Nada sadia honok dung i, digadis sianggian i ma sude arta bagiannia i jana kehe ma ia tu sihadaoan, dioban ia ma sude hepengnia i. Disi ma ia marroha-roha mangabur-aburkon hepengnia i.

¹⁴Dung abis sude hepengnia i, masa ma haleon potir di luat i, gabe mamungka ma ia marhancit.

¹⁵Jadi kehe ma ia markarejo tu sada halak na di kota i, jana disuru ma ia manjago babi di ladang.

¹⁶Dung i por ma rohania mangankon panganon ni babi i, tapi umpe adong halak na mangalehensa.

¹⁷Ujungna sadar ma ia, didok ia ma, ‘Sai bahat angka parkarejo na lobian sipanganon di jolo ni damang hape anggo au mate tangkuraparon ma dison!

¹⁸Jongjong noma au kehe manopot damang jana dokkononku ma tusia: Madung mardosa au adop Debata bope maradopkon damang.

¹⁹Na so tama be dohononmu au anakmu. Etong ma au amang songon sada parkarejomu.’

²⁰Dung i jongjong ma ia, torus mulak mandapotkon amangna. Sian na dao dope madung diida amangnia i ia. Ibo sajo ma roha ni amangna i midasa, marlojong ma amangna i mangalo-alo ia, dihaol jana diumma ma ia.

²¹Didok ia tu amangnia i, ‘O amang, madung mardosa au adop Debata bope maradopkon damang. Nada tama be didok au anak ni damang.’

²²Tapi dipiohon amangna i ma angka naposona jana didok ma, ‘Pasigop buat pakean na dumenggan jana pakehon manigor tusia. Baen tintin tu jari-jarina i dohot sipatu tu patna i.

²³Dung i buat ma anak ni lombu na nipamokmok, sambol ma i anso mangan hita jana marjop ni roha.

²⁴Angke madung mate do anakkon, saonnari mulak mangolu, madung lilu ia, hape mulak ia saonnari.’ Jadi dipungka halahi ma na marpesta marjop ni roha.

²⁵Topet do di ladang hatiha i anakna siangkaan i. Jadi di na mulak ia, dung donok tu lambung ni bagas i, dibege ia ma na marende dohot angka na manortor.

²⁶Dipiohon ia ma sahalak naposona i manyapai, sanga aha na masa i.

²⁷Dialusi naposo i ma, ‘Madung mulak anggi ni tuan i, jadi disamboli simatobangmu do anak ni lombu na nipamokmok i, hara ni na dung dapot ia mangulahi horas anaknia i!’

²⁸I noma murukna anak siangkaan i, gabe nada ra ia masuk tu bagas. Jadi ruar ma simatobangnia i laho mangkatai dohot ia.

²⁹Tapi didok ia ma tu amangnia i, ‘Martaon-taon ma honokna huoloi damang, na so jungada dope hulaosi parentamu. Tapi nada unjung dilehon damang di au umpe sada hambeng anso marpesta au dohot angka donganku!

³⁰Anggo anakmi, madung diabiskon ia sude artami rap dohot angka dadaboru na so ture, hape disi mulak ia manigor disambol ho ma lombu na nipamokmok i disia.’

³¹Dialusi amangna i ma, ‘O amang, anggo ho tongtong do dison rap dohot au. Sudena na adong di au, laing ho do nampuna i.

³²Tapi anggo saonnari na patut do hita mambaen pesta jop ni roha, angke na dung mate do anggimi, hape saonnari mulak mangolu; madung lilu ia, hape saonnari madung mulak.’ ”