Read Batak Angkola LUKAS 17 Bible Online

LUKAS 17 - Batak Angkola bible

LUKAS 17

¹Didok Jesus ma tu angka siseanNia i, “Angkon sai adong do angka pangalaho na mambaen jolma gabe mardosa. Tapi marjaya ma na mambaen pangalaho sisongon i!

²Na dumenggan do nitambatkon losung batu tu rungkungna, anso diambungkon tu bagasan laut. Dumenggan ma songon i ulang pado dibaen ia gabe mardosa sahalak sian angka jolma na menek on.

³Manat ma hamu! Muda mardosa donganmu, paingot ia antong. Muda manyosal do ia hara ni na dung mardosa ia, ampuni ma.

⁴Muda pitu noli ia mardosa tu ho di bagasan sadari jana ganop noli ia ro tu ho mandok, ‘Mangido maap ma au,’ ampuni ma ia.”

⁵Didok angka rasul i ma tu Tuhan i, “O Tuhan, patogu ma haporsayaannami.”

⁶Dialusi Tuhan i ma, “Muda adong haporsayaanmunu sagodang ni batu ni sabi, tardok hamu ma tu bona ni gala-gala on, ‘Mumpat ma ho jana di laut ma panyuananmu,’ musti angkon mangoloi hayu i tu parentamunu.”

⁷“Sugari adong sada sian hamu nampuna naposo na mambajak sanga na marmahan biri-biri. Muda muli ma naposo i sian ladang, adong he didok hamu tusia, ‘Ompoti ma ro tuson anso mangan hita!’

⁸Tontu inda! Tapi suhar-suhar ni i do dohononmunu tusia, ‘Parade ma pangananku. Pakean na ias ma pake jana jagoi au hatiha mangan minum au; dung sidung, i pe anso mangan ho.’

⁹Adong ma he mandok tarimakasi ia tu naposo i hara ni na dung dikarejohon ia sikarejohononnia?

¹⁰Songon i muse ma hamu. Muda dung dioloi hamu sude na niparentahon tu hamu, dok hamu ma, ‘Anggo hami hum naposo na somal-somal i do hami; hum na patut baenon do na hami karejohon i.’ ”

¹¹Di na patoruskon pardalananNia Jesus tu Jerusalem mamolus ma ia sian parbalohan ni Samaria dohot Galilea.

¹²Laho masuk tu sada huta, ro ma tuSia sampulu halak na huliton. Jongjong ma halahi sian na dao,

¹³jana marsurak, “Jesus! Gurunami! Ibo ma rohaMu mida hami!”

¹⁴Dung diida Jesus halahi, didok Ia ma, “Kehe ma hamu patidahon dirimunu tu angka malim.” Dompak na mardalan i halahi malum ma nyaena i.

¹⁵Dung diida sada halak sian halahi na dung malum ia, mulak ma ia, dipuji-puji ia ma Debata marsora na gogo.

¹⁶Dung lalu di jolo ni Jesus, marsomba ma ia mandok tarimakasi tuSia. Halak Samaria do bayo i.

¹⁷Dung i didok Jesus ma, “Nada he sampulu halak do na nipamalum i? Ma di dia na sambilan halak nari?

¹⁸Biasi hum halak na asing on na mulak mandok tarimakasi tu Debata?”

¹⁹Dung i didok Jesus ma tu bayo i, “Jongjong ma ho, jana mulak ma ho. Haporsayaanmu do na palua ho.”

²⁰Jadi dung disapai halak Parise i Jesus, sanga andigan ma pajongjongon ni Debata HarajaanNia. Jadi dialusi Ia ma, “Nada adong tanda-tanda na bisa idaon ni jolma paboa na dung jongjong Harajaan Ni Debata.”

²¹Nada tarbaen halak mandokkon, “Ligi ma, dison do i sanga disi do i, harana di bagasan hamu do Harajaan Ni Debata.”

²²Dung i didok Jesus ma tu angka anak siseanNia, “Na ro ma hatihana, na malungun hamu sugari idaonmunu ma sada sian angka ari ni Anak Ni Jolma i, tapi nada idaonmunu i.

²³Jana dokkonon ni halak ma tu hamu, ‘Ligi da, disadu do i!’ sanga, ‘Ligi ma, disi do i!’, ulang kehe hamu tusi, ulang ihutkon i.

²⁴Songon parsinondang ni hilap di langit, na torang sian ujung tu ujung, songon i ma pangalaho ni Anak Ni Jolma i di ariNa i.

²⁵Tapi anggo mula-mulana angkon bahat do sitaononNia jana nada dijagit halak sisaonnari on Ia.

²⁶Jana songon pangalaho na masa di hatiha ni si Noak narobi, laing songon i muse ma pangalahona saulahon di hatiha ni Anak Ni Jolma i.

²⁷Na mangan minum do halahi, marbagas dohot na pabagaskon lopus di ari hamamasuk ni si Noak tu bagasan parau i; dung i ro ma aek na oto mangagohon halahi sudena.

²⁸Laing songon na tulus di hatiha ni si Lot, na mangan minum do halahi, na manobusi dohot manggadisi, na manyuan dohot pajongjong bagas halahi.

²⁹Tapi di na kehe si Lot manadingkon Sodom, mijur ma di ari i api dohot barerang sian langit manutung halahi sude.

³⁰Songon i ma pangalahona saulahon muda di ari hataridaan ni Anak Ni Jolma i.”

³¹“Jadi anggo di ari i, halak na topet di tarup ni bagasna, indangkon be mijur ia tu bagas i mambuat barang-barangnia na adong disi. Songon i halak na topet di balian, ulang pola mulak be ia tu bagas.

³²Ingot hamu ma na masa tu dadaboru ni si Lot!

³³Barang ise na manjagohon hosana, na mangago hosana do i; tapi barang ise na magoan di hosana, i do na pangoluhonsa.

³⁴Hudok ma di hamu: Di bornginna i, sian dua halak na sapodoman, sada ma i dioban jana sahalak nari ditadingkon.

³⁵Sian dua halak na rap manduda eme, sada ma halahi dioban, jana sahalak nari ditadingkon. [

³⁶Sian dua halak bayo na topet di ladang, sada ma i dioban jana sahalak nari ditadingkon.]”

³⁷Disapai angka sisean ni Jesus ma, “Di dia ma i Tuhan?” Dialusi Jesus ma, “Sanga na di dia adong bangke, disi do marlagut halihi.”