Read Batak Angkola LUKAS 18 Bible Online

LUKAS 18 - Batak Angkola bible

LUKAS 18

¹Dung i dipaboa Jesus muse ma sada umpama laho mangajar angka siseanNia anso tongtong martangiang halahi jana ulang mandele.

²Ninna Jesus ma, “Di sada kota adong ma sada panguhum na so mabiar mida Debata, jana na so mangargahon jolma.

³Di kota i laing adong muse do sada halak ina na mabalu na sai ro tu panguhum i, mangidohon anso dibela parkaronia. ‘Tolong ma au maradopkon alongku,’ ninna ina na mabalu i.

⁴Tarhonok do inda ra panguhum i manolong na mabalu i. Tapi ujungna didok panguhum i ma di bagasan rohania, ‘Haru so mabiar pe au tu Debata jana inda huargahon jolma,

⁵tapi dibaen sai ro na mabalu i mangganggu au, dumenggan ma hubela parkaronia i, anso ulang sai ro be ia mangganggu au.’ ”

⁶Jadi didok Jesus ma, “Parrohahon hamu ma pandohan ni panguhum na geduk i!

⁷Anggo sai pio-pio do bangso ni Debata arian dohot borngin tu Debata nada he belaon ni Debata muse parkaro ni bangsoNa i? Adong he dipalolot-lolot Ia laho manolong halahi?

⁸Hudok ma di hamu! Manigor belaonNia do parkaro ni halahi! Tapi laing adong dope he haporsayaan di portibi on saulahon muda ro Anak Ni Jolma i.”

⁹Dicaritohon Jesus muse dope umpama on tu halak na mangetong hum dirina sajo do na nihalomohon ni Debata jana halak na asing i siapasanna.

¹⁰Didok Jesus, “Adong ma dua halak na kehe tu Bagas Ni Debata giot martangiang disi. Halak Parise do sada jana na sada nari sijagit pajak.

¹¹Jadi tanda sajo ma dibaen Parise i parjongjongnia jana martangiang ma ia, ‘O ale Debata, mandok tarimakasi ma au tu Ho, angke nada sarupa au dohot angka halak na asing i, na manyamun, na so jujur dohot na mangalangkup. Tarimakasi ma hudok dibaen nada tudos au dohot halak sitagi pajak indi.

¹²Puaso do au dua noli di bagasan saminggu, jana hulehen do saparsampulu sian pangomoanku.’

¹³Tapi anggo sitagi pajak i jongjong ma ia mandao-dao jana inda puluk ia mardongak adop langit. Ditompuhi ia andorania i didok ia ma, ‘O ale Debata, ibo ma rohaMu mida au pardosa on!’ ”

¹⁴Jadi Hudokkon ma tu hamu: “Mulak ma halak on songon halak na nipatigor ni Debata jana halak na asing i nada. Dibaen barang ise na paginjangkon dirina, nipatutoru do muse; tapi na patutoruhon dirina, dipatuginjang do muse.”

¹⁵Adong ma halak na maroban dakdanakna be tu Jesus anso diampehon Jesus tanganNia tu angka dakdanak i. Jadi dung diida angka sisean ni Jesus songon i, digorahon halahi ma angka jolma i.

¹⁶Tapi dipio Jesus ma angka jolma i didok Ia ma tu halahi, “Padiar hamu ma marroan angka dakdanak i tu Au! Ulang larang hamu halahi, angke halak sisongon on ma na gabe anggota ni Harajaan Ni Debata.

¹⁷Tutu do na Hudokkon di hamu: Barang ise na so manjagit Harajaan Ni Debata songon dakdanak on, nada tarbaensa masuk tu bagasanna.”

¹⁸Ro ma sahalak pamimpin marsapa tu Jesus, “Guru na denggan roha, aha dehe na angkon baenonku anso hutean hangoluan na so mantak i?”

¹⁹Disapai Jesus ma tusia, “Biasi didokkon ho Au na denggan roha? Nada adong halak na denggan roha asing sian Debata.

²⁰Madung diboto ho sude parenta ni Debata i: ‘Ulang ho markarosuan; ulang ho mamunu; ulang ho manangko; ulang ho margabus mangalo donganmu; jana pasangap ma amangmu dohot inangmu.’ ”

²¹Dialusi bayo i ma, “Sian na poso dope, madung huoloi sude parenta i.”

²²Umbege na songon i, didok Jesus ma tusia, “Laing adong dope sada nari na angkon sibaenonmu: Gadis ma sude na adong di ho, jana lehen ma i tu halak na pogos; anggo i dapot ho ma arta na di banua ginjang. Dung i beta ma ihutkon Au.”

²³Umbege na songon i, gabe marsak ma bayo i angke halak na kayo situtu do ia.

²⁴Dung i diligi Jesus ma ia, jana didok, “Na maol ma sahalak na mora masuk tu Harajaan Ni Debata!

²⁵Ummomoan do sada unto mamolus sian lubang ni jait ulang pado sada halak na kayo masuk tu Harajaan Ni Debata.”

²⁶Disapai angka halak na umbege na nidok ni Jesus i ma, “Anggo songon i, ise ma na tarbaen malua?”

²⁷Dialusi Jesus ma, “Na so tarbaen di jolma, tarbaen do anggo di Debata.”

²⁸Dung i didok si Petrus ma, “Madung hami tinggalkon sude na adong di hami; jana mangihutkon Ho.”

²⁹“Tutu do i!” ninna Jesus, “Tutu do na Hudok on tu hamu! Ganop halak na manadingkon bagasna sanga dadaboruna, sanga kahanggina sanga natorasna, sanga pe angka dakdanakna hara ni Harajaan Ni Debata,

³⁰angkon baloskonon do tu halahi marlompit ganda saonnari on jana lehenon ma ngolu na so mantak di hatiha na giot ro.”

³¹Dioban Jesus ma siseanNia sidua bolas halak i sajo, jana didok Ia ma tu halahi, “Saonnari manangkok ma hita tu Jerusalem, jana tarjadi ma sudena na nisuratkon ni angka panurirang taringot tu Anak Ni Jolma i.

³²Pasahaton ma Ia tu angka halak na so mananda Debata, jana incahan ni halahi ma Ia, pabileonna jana tijurkononna.

³³Loncingan ni halahi ma Ia jana bunuonna; tapi di ari patoluhon, mulak mangolu ma Ia mangulahi.”

³⁴Tapi sudena i saotik pe nada diastui angka siseanNia i. Nada tardodo halahi angka pandohan ni Jesus i. Nada diboto halahi sanga tudia lapatna na nidokkonNia i.

³⁵Dung lalu Jesus marayak Jeriko, adong ma sada halak na mapitung na juguk mangido-ido di topi dalan i.

³⁶Dung dibege bayo na mapitung i adong mamolus halak na bahat disi, disapai ia ma, “Aha dehe na masa?” ning ia.

³⁷Didok halahi ma, “Mamolus Jesus, halak Nasaret i.”

³⁸Dung i marsurak ma ia, “O Jesus Anak Ni si Daud! Ibo ma rohaMu mida au!”

³⁹Tapi digorahon angka halak na di jolo i ma ia, jana di pasip ma ia. Hape mur digogoi ia muse do na marsurahi i, “O Anak Ni si Daud! Ibo ma rohaMu mida au!”

⁴⁰Dung i maradian ma Jesus jana disuru alap Ia ma bayo na mapitung i tuSia. Dung lalu, disapai Jesus ma tusia,

⁴¹“Aha ma he giotmu baenonKu tu ho?” Dialusi bayo na mapitung i ma, “Giotku, sugari marnida ma au nian Amang.”

⁴²Didok Jesus ma tusia, “Marnida ma ho! Madung dipamalum haporsayaanmi ho.”

⁴³Jadi manigor marnida ma ia, asa diihutkon ia ma Jesus jana dipuji-puji ia ma Debata. Sude halak na midaan pangalaho i dohot muse ma mamuji-muji Debata.