Read Batak Angkola LUKAS 19 Bible Online

LUKAS 19 - Batak Angkola bible

LUKAS 19

¹Lalu ma Jesus tu Jeriko, masuk ma Ia jana torus mardalan manyalpui kota i.

²Adong do di kota i sada halak kapala ni sitagi pajak na kayo, i ma na margoar si Zakeus.

³Sai por rohania mangaligi sanga na ise Jesus. Hape halak na pendek do ia gabe inda tarbaen ia mangaligi Jesus hara ni bahat ni halak.

⁴Jadi marlojong ma ia manjoloi angka jolma i, dipanaek ia ma sada hayu gala-gala, anso tarida ia Jesus na giot mamolus sian i.

⁵Dung lalu Jesus disi, ditailihon Ia ma tu ginjang jana didok Ia ma tu si Zakeus, “O Zakeus, pasigop ma mijur! Angke giot ro do Au tu bagasmu sadari on.”

⁶Diompoti si Zakeus ma mijur, jop ma rohania manjagit Jesus.

⁷Mungut-ungut ma sude halak marnida pangalaho i. Didok halahi ma, “Kehe do Ia masuk tu bagas ni halak pardosa!”

⁸Jongjong ma si Zakeus didok ia ma tu Tuhan i, “O Tuhan, satonga sian artangku hulehen ma tu halak na pogos; jana sanga ise na unjung hutipu, hugarar pe mangulahi tusia opat noli lompit!”

⁹Didok Jesus ma tusia, “Mamungka sadari on dapotan haluaon do pangisi ni bagas on, harana pinompar ni si Abraham do ia.

¹⁰Angke na giot manjalahi dohot paluahon angka halak na lilu do umbaen na ro Anak Ni Jolma i.”

¹¹Dompak manangi-nangihon pangkataion ni Jesus dope halak na bahat i, dicaritohon Jesus ma sada umpama. Jadi hatiha i, marayak lalu ma Ia tu Jerusalem jana ning roha ni halak manigor tarida ma Harajaan Ni Debata.

¹²Jadi didok Jesus ma tu halahi, “Adong ma sada halak na mora na kehe tu luat na dao manjagit pangangkatannia gabe raja disi, dung i mulak ma ia.

¹³Tapi dompak so kehe ia, dipiohon ia ma sampulu halak naposonia jana dilehen ia ma tu halahi sada be hepeng sere. ‘Marjagal ma hamu, hepeng on ma pake hamu salolot so dison au,’ ning ia tu halahi.

¹⁴Tapi goyak ma roha ni halak luat i tusia jana dung kehe ia, disuru halahi ma suruan tusia laho paboahon, ‘Nada ra hami anggo bayo on do gabe rajanami.’

¹⁵Tapi dung diangkat bayo i gabe raja mulak ma ia tu luatnia. Dung i dipiohon ia ma angka naposonia na dung manjagit hepeng i sian ia jana disuru ia ma halahi mangadop, harana giot botoonnia do sanga sadia labo na dapot ni halahi ganop be.

¹⁶Ro ma naposonia na parjolo i mandok, ‘Tuan dapotan labo do au sampulu hepeng sere sian na nilehenmi.’

¹⁷Didok tuan i ma, ‘Ma denggan i, ho ma naposo na burju! Angke haposan do ho di bagasan pangalaho na menek pe, hubaen noma ho gabe pangarajai tu sampulu kota.’

¹⁸Ro ma naposo na paduahon mandok, ‘Tuan, dapotan labo do au lima hepeng sere sian na nilehenmi.’

¹⁹Didok pangarajai i ma tu naposona i, ‘Gabe pangarajai ma ho di lima kota.’

²⁰Ro ma naposo na asing mandok, ‘Tuan indon ma hepengmi, hubungkus do di sapu tangan.

²¹Mabiar situtu do au di tuan i, angke huboto do tangkas parmuruk do tuan i. Dibuat tuan i do salang na so nampuna ni tuan i, jana disabi ho do na so nisuanmu.’

²²Didok raja i ma tusia, ‘Naposo na jahat do ho! Hombar tu hata na nipardokkonanmi, uhumanku ma ho. Diboto ho do antong parmuruk au; hubuati do angka na so au puna jana husabi angka na so jongada husuan.

²³Antong anggo songon i, biasi nada dilehen ho hepengki tu na padalankon hepeng?’ Jadi dung mulak au bisa ma i buatonku rap dohot anakna i.

²⁴Dung i didok raja i ma tu angka halak na marjongjongan disi, ‘Buat ma hepeng i sian ia jana lehen ma i tu naposo na maniop sampulu hepeng sere i.’

²⁵Didok angka jolma i ma tu raja i, ‘Tapi madung sampulu kibung hepeng sere disia.’

²⁶Dialusi raja i ma, ‘Hudok ma di hamu: Halak na maradong, lehenon muse dope tusia umbahat. Tapi anggo halak na so maradong, dibuat muse dope sian ia na adong disia.

²⁷Jana oban hamu ma tuson angka musungku na so ra manjagit au gabe raja ni halahi. Sambol hamu ma halahi di jolongku!’ ”

²⁸Dung didok Jesus sudena i, parjolo ma Ia sian halahi tu Jerusalem.

²⁹Dung marayak Betpage dohot Betania na di Dolok Zetun, disuru Ia ma parjolo dua halak siseanNia.

³⁰Didok Ia ma, “Kehe ma hamu tu huta na di jolomunu an. Muda dung lalu hamu disi, dapotonmunu ma sada anak ni halode na tambat jana na so jungada dope dilombut halak. Harkari hamu ma halode i jana oban hamu ma tuson.

³¹Muda disapai halak hamu, ‘Biasi diharkari hamu halode i?’ Dok hamu ma tu na manyapai i, ‘Na porlu do i di Tuhan.’ ”

³²Kehe ma sisean sidua halak na disuru parjolo i. Jana didapot halahi ma sudena songon na dung dipaboa ni Jesus.

³³Taran na mangharkari tali ni halode i halahi, didok nampuna i ma tu halahi, “Biasi diharkari hamu halode i?”

³⁴Dialusi halahi ma, “Na porlu do di Tuhan i.”

³⁵Dung i dioban halahi ma anak ni halode i tu Jesus. Dung i dibaen halahi ma pakean ni halahi tu tanggurung ni halode i jana dipalombutkon halahi ma Jesus tu tanggurungna i.

³⁶Jadi hatiha mamolus Jesus na marhalode i, diparpahembang angka jolma i ma pakean ni halahi di dalan i.

³⁷Jadi dung marayak lalu Jesus tu Jerusalem, di panuatan na di Dolok Zetun, marsurahi ma halak na bahat angka na mangihutkon Jesus mamuji-muji Debata dohot sora na gogo, hara ni sude hahomangon na niida ni halahi.

³⁸Jana didokkon halahi ma, “Dipasupasu ma Raja i na ro markite-hite goar ni Tuhan! Hasonangan ma di banua ginjang jana hamuliaon ma di inganan na gumincat i!”

³⁹Dung i adong ma halak Parise sian tonga-tonga ni halak na bahat i, didok halahi ma tu Jesus, “O Guru, pasip ma da angka siseanMi.”

⁴⁰Tapi dialusi Jesus ma tu halahi, “Hudok ma di hamu, muda sip halahi, marsurahi ma angka batu on.”

⁴¹Dung mur donok Jesus tu Jerusalem, diligi Ia ma kota i, tangis ma Ia marnidasa.

⁴²Humolos ma Ia, “Dengganna i sugari diboto hamu sadari on sanga aha na porlu di hamu laho manjagit hadameon i! Hape saonnari buni do i di jolo ni matamu.

⁴³Saulahon ro do hatihana, baenon ni angka musumu ma rungga humaliang ho, hobuhon ni halahi ma ho jana sosahanna ma ho humaliang.

⁴⁴Roncohonon ni halahi ma ho, songon i sude halak na adong di bagasan tembok ni kotami; nada dipadiar halahi umpe sada batu di ginjang ni donganna, hara ni na so diparrohahon ho sanga andigan Debata ro giot paluahon ho!”

⁴⁵Masuk ma Jesus tu Bagas Ni Debata jana manigor dipaorot Ia ma angka parjagal na disi.

⁴⁶Didok Ia ma, “Di Buku Na Badia i, adong do tarsurat, ‘Anggo bagasKu angkon gabe bagas partangiangan do.’ Tapi madung dibaen hamu i gabe inganan ni panyamun!”

⁴⁷Ganop ari do mangajari Jesus di bagasan Bagas Ni Debata. Tapi anggo kapala ni malim dohot angka Siboto Surat, songon i angka bagian hatobangon ni halak Jahudi i, dijalahi halahi do dalan laho mamunu Jesus.

⁴⁸Tapi nada dapot halahi sanga songon dia pambaenna, angke sude rayat tuSia do rohana jana por do rohana manangihon Ia.