Read Batak Angkola LUKAS 2 Bible Online

LUKAS 2 - Batak Angkola bible

LUKAS 2

¹Diparentahon Kesar Agustus ma hatiha i anso marsidaftarkon dirina be sude rayat na nirajaannia.

²On ma pandaftaran na parjolo dompak si Kirenius na gubernur di Siria.

³Markehean ma hatiha i sude halak tu kotana be laho mandaftar.

⁴Si Josep pe kehe ma sian Nasaret na di Galilea tu Betlehem na di Judea kota hasorangan ni Raja Daud. Harana pomparan ni si Daud do si Josep.

⁵Mandaftar ma si Josep rap dohot si Maria tunangannia i na dung denggan pamatangna.

⁶Jadi dung lalu halahi tu Betlehem, dapot ma hatihana mardiapi si Maria.

⁷Ditubuhon ia ma sada Anak halaklahi, i ma panggoarannia. Dibalut ia ma Dakdanak i dohot lampin, dipayakkon ia di palangka ni pahan-pahanan, angke nada dapotan inganan be halahi di parbornginan.

⁸Adong do angka parmahan di humaliangna i, na marborngin manjagoi angka biri-biri ni halahi.

⁹Ompot ma ro surusuruan tu halahi, jana marsinondang ma hasangapan ni Tuhan manorangi halahi, gabe mabiar ma halahi.

¹⁰Tapi didok surusuruan i ma, “Ulang hamu mabiar! Angke na maroban barita na denggan do au di hamu, barita na pajopkon roha ni sude bangso.

¹¹Madung sorang sadari on di Kota Ni si Daud, Sipalua i, i ma Kristus Tuhan i.

¹²Songon on ma tandana: Dapot hamu ma disi Dakdanak na baru sorang dibungkus dohot lampin, dipapodom di bagasan palangka ni pahan-pahanan.”

¹³Ompot muse ma ro bahat surusuruan na asing mandongani surusuruan i, mamuji Debata. Ninna halahi ma,

¹⁴“Hasangapan ma di Debata na di ginjang, dame ma di tano on di angka jolma halomoan i!”

¹⁵Dung ditinggalkon surusuruan i angka parmahan i giot mulak halahi tu banua ginjang, marsipandohonan ma angka parmahan i sama halahi, “Beta ma hita tu Betlehem anso taida na masa i, na nipaboa ni Tuhan i tu hita.”

¹⁶Manigor kehe ma halahi, dapot halahi ma antong si Josep dohot si Maria dohot Dakdanak i na topet hatiha modom di palangka ni pahan-pahanan i.

¹⁷Dung diida angka parmahan i Dakdanak i, dicaritohon halahi ma sude na dung dipaboa tu halahi taringot tu Dakdanak i.

¹⁸Halak pe homang ma rohana umbege carito ni angka parmahan i.

¹⁹Tapi anggo si Maria disimpan ia ma sudena i di bagasan rohania mamikirkon sanga aha arti ni sudena i.

²⁰Mulak ma parmahan i huhut mamuji jana dipasangap halahi ma Debata, hara ni sude na niida dohot na nibege ni halahi, songon na dung dipabotohon tu halahi.

²¹Dung marumur salapan ari, angkon nisunat ma Dakdanak i. Dibaen halahi ma goarNia Jesus, i ma goar na nilehen ni surusuruan tuSia dompak so di kandungan dope Ia.

²²Jadi dung salpu angka ari pangiasan ni halahi, mangihuthon Tona Ni si Musa, dioban halahi ma Dakdanak i tu Jerusalem pasahatkon Ia tu Tuhan.

²³Harana tarsurat do antong di Tona Ni Tuhan songon on: “Sude anak halaklahi panggoaran, angkon nipasahat do tu Tuhan.”

²⁴Dohot na giot pasahatkon haul songon na dung di Tona Ni Tuhan i ma sapasang balom dohot dua darapati na poso.

²⁵Jadi di hatiha i adong ma sahalak di Jerusalem na margoar si Simeon. Halak na burju do ia, na mabiar tu Debata jana na sai paintehon hatihana paluaon ni Debata halak Israel. Didongani Tondi Parbadia do ia.

²⁶Madung dijagit ia baga-baga sian Tondi Parbadia, na paboahon tusia bahaso na so mate dope ia anggo so jolo diida ia Kristus na nimiahan ni Tuhan.

²⁷Hara ni panyosoi ni Tondi Parbadia ro ma ia tu Bagas Ni Debata. Topet ma hatiha i dioban natorasna Jesus Dakdanak i laho patuluskon tuSia mangihutkon na dung niaturkon ni Tona i.

²⁸Dijagit si Simeon ma Dakdanak i jana diabing ia. Torus dipuji ia ma Debata ning ia ma,

²⁹“Saonnari ma o Tuhan dipatulus Ho baga-bagaMu. Padiar ma mate naposoMon di bagasan sonang.

³⁰Angke madung diida matangku sandiri haluaan na sian Ho.

³¹Na dung nipasingkopMu hian di sude bangso,

³²i ma sinondang na manyondangi angka bangso na asing, jana gabe hamuliaan di bangsoMu, Israel.”

³³Homang ma roha ni natoras ni Dakdanak i umbege na nidok taringot tu Dakdanak i.

³⁴Dipasupasu si Simeon ma halahi jana didok ia tu si Maria inang ni Dakdanak i, “Na dung ditodo Debata do Dakdanak on laho mangarorak dohot pajongjongkon bahat halak Israel. Baen sada tanda na parohon partangkangan,

³⁵jana sada podang na giot manusuk rohamu sandiri, anso gabe tangkas pikiran ni roha ni halak na bahat.”

³⁶Adong muse do sahalak panurirang dadaboru na dung matobang situtu, i ma na margoar si Hanna. Boru ni si Panuel do i Marga Aser. Dung adong pitu taon ia marbagas

³⁷mabalu ma ia torus mardangol salapan pulu opat taon honokna. Nada jungada ditadingkon ia Bagas Ni Debata. Arian na borngin disi sajo ma ia marsomba tu Debata martangiang dohot puaso.

³⁸Topet ma hatiha i laing ro ia mamuji Debata bope mangkobari taringot tu Dakdanak i tu sude halak na sai painte-intehon sanga andigan hatihana paluaon ni Debata Jerusalem.

³⁹Dung sidung dipatulus sude na niaturkon ni Tona Ni Tuhan, mulak ma halahi tu kota Nasaret na di Galilea.

⁴⁰Mur magodang ma Dakdanak i, jana mur gogo, gok hapistaran, asa didongani asi ni roha ni Debata do Ia.

⁴¹Ganop taon sai kehe do simatobang ni Jesus tu Jerusalem laho mamestahon Ari Pesta Paskah.

⁴²Jadi di na marumur dua bolas taon Jesus, laing kehe ma halahi songon na somal tu pesta i.

⁴³Dung abis pesta mulak be ma halahi, tapi anggo Jesus laing tinggal dope Ia di Jerusalem di na so pamotoan ni simatobangNia.

⁴⁴Diambang halahi madung rap dohot halak na asing i do Ia, i ma rombongan na mulak sian Jerusalem i. Dung parsadarian halahi na mardalan i baru pe anso dijalahi halahi Ia di tonga-tonga ni angka koum dohot sitandaan ni halahi.

⁴⁵Hape nada marsuo halahi tuSia. Gabe mulak ma halahi tu Jerusalem manjalahi Ia.

⁴⁶Dung tolu ari dijalahi halahi, dohot halahi ma Ia juguk-juguk manangihon dohot manyapa-nyapai angka Siboto Surat Jahudi di Bagas Ni Debata.

⁴⁷Homang-homang do sude halak na disi umbege angka alusNia na topet-topet.

⁴⁸Homang ma roha ni simatobangNia i midasa. Didok inangNia i ma tuSia, “Amang! Biasi songon on dibaen Ho tu hami? Ma jabat sak rohangku dohot amangMu manjalak-jalahi Ho!”

⁴⁹Dialusi Jesus ma, “Biasi pola jalak-jalahan ni amang dohot inang Au? Inda diboto amang dohot inang lakna paboa na angkon di bagas ni Damang Au?”

⁵⁰Tapi nada mangarti si Josep dohot si Maria sanga aha maksud ni Jesus.

⁵¹Dung i mulak ma Jesus rap dohot halahi tu Nasaret, mangoloi tu halahi. Sudena i disimpan inangNa i ma di bagasan rohania.

⁵²Mur honok mur magodang ma Jesus jana mur marbisuk boti jop roha ni Debata dohot jolma diSia.