Read Batak Angkola LUKAS 20 Bible Online

LUKAS 20 - Batak Angkola bible

LUKAS 20

¹Di sada ari dompak mangajari Jesus di Bagas Ni Debata, jana dijamitahon Ia Jamita Na Denggan tu halak na bahat i, ro ma angka kapala ni malim dohot Siboto Surat dohot hatobangon tusi,

²jana didokkon halahi ma tu Jesus, “Paboa ma di hami markite-hite kuaso ni ise do dibaen Ho na songon i? Sanga ise do na mangalehen kuaso i di Ho?”

³Dialusi Jesus ma, “Au pe adong sada sisapaanKu tu hamu. Paboa hamu ma jolo tu Au,

⁴ise dehe na mangalehen kuaso tu si Johannes Pandidi laho mandidihon halak. Debata do sanga jolma?”

⁵Dung i rap dihatai halahi ma taringot tusi. “Aha ma alusta tuSia?” ninna halahi sama halahi. “Muda tadok, ‘Sian Debata,’ dohononNia ma tu hita, ‘Antong biasi nada porsaya hamu tu si Johannes?’

⁶Tapi muda tadok, ‘Sian jolma,’ sude ma halak na bahat on mandanggur hita, harana dihaporsayai halahi sudena do, sada panurirang do anggo si Johannes.”

⁷Jadi dialusi halahi ma, “Nada hami boto!”

⁸Dung i didok Jesus ma tu halahi, “Antong anggo songon i do, Au pe nada paboaonKu di hamu sanga dohot kuaso ni ise Hubaen i sudena.”

⁹Dipaboa Jesus dope umpama on tu angka jolma i, “Adong ma sada bayo nampuna kobun anggur. Dipabolahon ia ma kobun i tu piga-piga halak pamola di na laho kehe ia tu inganan na asing jana disi ma ia maringanan honok sajo.

¹⁰Dung dapot hatihana mamutik batu ni anggur i, disuru nampuna kobun anggur i ma naposonia mandapotkon angka na mamola kobun i, laho manjagit suha ni kobun i sian halahi. Tapi dibalbal angka na mamola kobun i ma naposo i jana disuru halahi ma ia mulak umpe bagi aha diobansa.

¹¹Dung i disuru nampuna kobun i muse ma sada nari naposonia na asing, tapi laing dibalbali muse do naposo i jana dipabile, dipaila angka pamola i, baru disuru halahi mulak umpe maroban bagi aha.

¹²Dung i disuru nampuna kobun i ma naposonia na patoluhon. Naposo on pe dibalbali angka pamola i muse dope baru dipamorot halahi sian kobun i.

¹³Ujungna didok nampuna kobun i ma, ‘Bia noma ulaning baenonku tusi? Anak haholongan ni rohangki noma da husuru tusi. Tontu anggo i pasangapon ni halahi ma!’

¹⁴Tapi dung diida angka na mamola kobun i anaknia i, didok halahi ma sama halahi, ‘On ma da ibana anak ni nampuna kobun on. Tamatehon ma on anso di hita artania i.’

¹⁵Dung i disarat halahi ma ia tu balian ni kobun i, dibunu halahi ma.” “Antong, aha dope sibaenon ni nampuna kobun anggur i maradopkon angka na mamola i?” ninna Jesus manyapai halak na manangihon umpama i.

¹⁶“Tontu ro ma ia, jana matehononnia ma sude angka na mamola i. Jana tu halak na asing noma pabolahononnia kobun i.” Dung dibege angka halak i na songon i, didok halahi ma tu Jesus, “Ah, sai dao ma na songon i!”

¹⁷Dipamanat Jesus ma halahi, ning Ia ma, “Anggo songon i, aha do astuan ni ayat na di Buku Na Badia on? ‘Anggo batu na niambungkon ni angka tukang bagas i, madung gabe batu parsuhi.’

¹⁸Sude halak na madabu tu batu i gabe maropuk, jana barang ise na didondoni ni batu i, maropuk ma halakna i baenon ni batu i.”

¹⁹Diboto angka Siboto Surat ni Jahudi dohot angka kapala ni malim i do na tu halahi tujuan ni Jesus di umpama i. Hara ni i giot tangkupon ni halahi ma Jesus, tapi mabiar halahi mida angka jolma i.

²⁰Jadi sai dijalahi halahi ma hatiha na denggan. Dilehen halahi ma hepeng sogok tu halak na gabe kaki tangan ni halahi jana disuru halahi ma angka kaki tangan i mangalancap songon halak na burju laho mangonjap Jesus markite-hite sapa-sapa, anso tarpasahat halahi Jesus tu toru ni kuaso ni gubernur.

²¹Jadi disapai halahi ma Ia ninna ma, “Ale Guru, madung hami boto sintong do hataMu dohot pangajaranMu, nada na mangaligi bohi Ho, tapi dipodahon Ho do dalan ni Debata mangihutkon hasintongan i.

²²Tola dehe hami manggarar pajak tu Kesar sanga nada?”

²³Hape diboto Jesus do tipu akal ni halahi gabe didok Ia ma,

²⁴“Patidahon hamu ma jolo tu Au sangkibung hepeng perak. Gambaran ni bohi ni ise dohot goar ni ise do di hepeng i?” “Kesar i!” ning halahi mangalusi.

²⁵Dung i didok Jesus ma tu halahi, “Anggo songon i, lehen hamu ma tu Kesar i sanga aha na patut lehenon tu Kesar i, jana lehen ma tu Debata sanga aha na patut lehenon tu Debata.”

²⁶Jadi tangkas ma di jolo ni halak na bahat i, na so tarbaen halahi padapot hasalaan ni Jesus. Tarkohom jana homang be roha ni halahi hara ni alusNia.

²⁷Jadi ro ma sian golongan Saduse tu Jesus. (Nada porsaya halak Saduse on na mulak mangolu muse halak na dung mate.) Disapai halahi ma tu Jesus,

²⁸“O, Guru! Disuratkon si Musa do tu hita tona on: Muda maninggal sada bayo jana ditadingkon ia ma daborunia, jana nada adong dakdanakna, angkon patugincaton do i anso adong pomparan ni kahangginia i.

²⁹Jadi adong ma pitu halak na martinadohon. Mambuat boru ma siangkaan i hape mate ma ia so jolo mardakdanak.

³⁰Dung i dibuat na nitadohonnia i ma dadaboru na nitadingkon ni angkangnia i hape mate muse ma ia so mardakdanak.

³¹Dung i angginia na patoluhon pe laing dibuat ma dadaboru i jana laing songon i ma lopus tu na papituhon; sude halahi mambuat dadaboru i, jana mate punu.

³²Na parpudi situtu, mate muse ma dadaboru i.

³³Antong, di na nipangolu mangulahi halak na mate i, dadaboru ni ise ma anak boru i saulahon? Angke madung pitu-pitu halahi mambuat ia.”

³⁴Dialusi Jesus ma, “Anggo halak na mangolu saonnari marbagas do jana dipabagas,

³⁵tapi anggo angka jolma na patut dipangoluon mangulahi dung mate jana na mangolu saulahon, nada marbagas halahi jana nada dipabagas.

³⁶Songon surusuruan noma pangalaho ni halahi jana nada ra be mate. Gabe dakdanak ni Debata ma halahi, angke madung dipangolu halahi mangulahi, sian hamatean.

³⁷Si Musa pe tangkas do dipaboa ia, mulak dipangolu do mangulahi halak na mate. Di suratnia i, i ma taringot tu ramba-ramba na mosok i dipaboa ia do, anggo Tuhan i, i ma, ‘Debata ni si Abraham, Debata ni si Ishak dohot Debata ni si Jakob.’

³⁸Nada Debata ni halak na mate Tuhan i tapi Debata ni halak na mangolu do i! Harana anggo di Debata, na mangolu do sude jolma.”

³⁹Adong ma deba sian angka Siboto Surat i na mandok, “Denggan sajo do pangalusi ni Guru i.”

⁴⁰Gabe nada puluk be halahi manyapai bagi aha tu Jesus.

⁴¹Disapai Jesus ma tu halahi, “Biasi ma he didok halak pinompar ni si Daud Kristus i?

⁴²Hape si Daud sandiri mandok di Buku Masmur i, ‘Didok Tuhan do tu Tuanki: Juguk ma Ho di siamunKu,

⁴³lopus Hubaen sude angka musuMu gabe sidegean ni patMu.’

⁴⁴Muda ‘Tuhan’ do Ia didok si Daud, tarbia ma parjadina Kristus i pinompar ni si Daud muse?”

⁴⁵Jadi taran manangihon pangkataion ni Jesus dope angka jolma i, didok Jesus ma tu angka siseanNia i,

⁴⁶“Manat ma hamu maradopkon angka Siboto Surat. Na jopan roha ni halahi mardalani mamake baju juba na gabar gebur, na jopan muse roha ni halahi ditabi halak di pasar an. Na tagian halahi mamili-mili angka inganan ni halak na godang di angka bagas paribadatan dohot angka karosi ni halak na sangap di angka pesta.

⁴⁷Dirugii halahi do angka na mabalu jana dirampas halahi angka bagasna i, hape dipaula-ula halahi ma lolot-lolot martangiang! Musti angkon hona uhum na dokdok halahi!”