Read Batak Angkola LUKAS 21 Bible Online

LUKAS 21 - Batak Angkola bible

LUKAS 21

¹Diida Jesus ma di Bagas Ni Debata angka halak na kayo pamasukkon hepeng tu poti parhaulan na di Bagas Ni Debata i.

²Laing diida Jesus muse do sahalak dadaboru na mabalu pamasukkon dua rimis tu poti parhaulan i.

³Dung i didok Jesus ma, “Tutu do na Hudok on tu hamu: Umbahat do na nilehen ni dadaboru na mabalu i sian sude halak na asing i.

⁴Angke sude halahi na mangalehen i nada gabe marhahurangan. Tapi anggo anak boru on, na pogos situtu do nian hape dilehen ia muse dope sudena na nihaporluhonnia di ngolunia.”

⁵Adong ma halak na manaringoti sanga na bia jegesna Bagas Ni Debata, na nibaen sian angka batu na jeges-jeges dohot angka barang-barang sihaulkonon. Gabe didok Jesus ma tu halahi,

⁶“Saulahon adong do hatihana, sudena na niidamunu on angkon segohononkon jana umpe adong sada batu pe na dison on na laing di ingananna hian!”

⁷Disapai angka sisean i ma Jesus, “Andigan ma i tarjadi Guru? Jana aha ma tandana paboa na dung dapot hatihana pangalaho i tarjadi?”

⁸Didok Jesus ma, “Jago ma hamu anso ulang tarpaoto-oto hamu. Angke bahat do halak na giot marroan mamake goarKu. Dokkonon ni halahi ma, ‘Au ma da Ia!’ dohot ‘Madung dapot hatihana.’ Ulang ihutkon hamu halahi.

⁹Ulang pola mabiar muse hamu umbege barita taringot tu angka porang dohot hagaoran. Angke angkon jolo masa do sudena i. Tapi i pe nada na giot ari parpudi dope.”

¹⁰Dung i didatdati Jesus ma pangkataionNia. Didok Ia ma, “Marsiporangan ma bangso na sada tu na asing jana marsiporangan ma harajaan na sada tu harajaan na asing.

¹¹Sanga di dia pe masa ma angka lalo na gogo. Masa ma haleon dohot nyae bala. Masa muse ma angka pangalaho na jorbut dohot angka hahomangan sian langit.

¹²Tapi taran so tarjadi dope i sudena, tangkupon ma hamu jana parkancitan. Adilan ma hamu di angka bagas paribadatan jana dipamasuk ma hamu tu hurungan. Jana saraton ma hamu tu jolo ni angka raja dohot angka parkuaso hara ni goarKu.

¹³Jadi i ma hatiha na denggan di hamu laho manyaksihon Jamita Na Denggan na sian Debata i.

¹⁴Paputus ma di bagasan rohamu, paboa na so humolos be ho hara ni angka hata sialuskononmu.

¹⁵Au sandiri do mangalehen angka hata sidokkononmu dohot habisuhon, lopus nada tarbaen sahalak pe sian angka musumunu i mangalo dohot mangalusi sanga aha na nidokmunu i.

¹⁶Jana dohot do natorasmunu, angka kahanggimunu, angka koummunu dohot angka ale-alemunu pasahat hamu. Matehonon ni halahi ma deba sian hamu.

¹⁷Sude ma halak margoyak ni roha tu hamu hara ni goarKu.

¹⁸Tapi sada obuk pe sian ulumunu i nada tola mago.

¹⁹Muda martahan hamu jana sobar, dapotan ngolu ma hamu.”

²⁰“Muda diida hamu dihobuk angka tentara kota Jerusalem, manigor botoonmunu ma sian i na so sadia lolot nari be, roncohononkon ma kota i.

²¹Jadi anggo disi angkon marlojongi ma tu angka dolok sanga ise halak na di Judea. Angka halak na maringanan di kota angkon markehean ma tu ruar jana halak na di ruar ni kota nada tola be masuk tu kota.

²²Angke anggo angka ari i, i ma, ‘Angka ari pamaloson.’ Jadi di na songon i ma tulus sanga aha na dung tarsurat di Buku Na Badia i.

²³Marjaya ma angka ina na topet denggan pamatangna jana topet pasusuhon di hatiha i! Manaon parkancitan na godang ma luat on, jana uhumon ni Tuhan ma bangso on.

²⁴Adong ma na dibunu dohot podang, adong muse ma i na dioban gabe taban tu angka luat ni halak; jana dege-degeon ni halak ma Jerusalem lopus abis hatiha na dung nitontuhon ni Tuhan i tu halahi.”

²⁵“Saulahon adong ma angka tanda tarida di mataniari, di bulan dohot di angka bintang i. Di tano on pe hempot be ma angka bangso jana mabiar be hara ni husasak dohot ombak ni laut.

²⁶Jadi tarkatos ma jolma manusia hara ni na mabiar painte-intehon sanga aha na giot tarjadi di portibi on sude. Angke gabe humutur ma sude angka hagogoon na di langit.

²⁷Jadi disi ma ro Anak Ni Jolma i di bagasan ombun mardongan hamuliaan dohot kuaso na godang.

²⁸Jadi muda dung mamungka tarjadi na songon i, jongjong ma ho jana padorgak hamu ma ulumunu, angke santongkin nari paluaon ma hamu.”

²⁹Dung i dicaritahon Jesus ma tu halahi umpama on. Didok Jesus ma, “Parrohahon hamu ma jolo bona ni gala-gala i dohot sude suan-suanan na asing i.

³⁰Muda diida hamu mamungka martunas angka hayu i, diboto hamu ma na giot dapot ma musim panas.

³¹Songon i muse muda diida hamu tarjadi angka na Hupardokkon i gabe botoonmunu ma madung donok Harajaan Ni Debata.

³²Tutu do na Hudok di hamu! Anggo so tarjadi dope sudena i, nada mate muse dope angka jolma na mangolu saonnari on.

³³Anggo langit dohot tano on mago do i, tapi anggo hatangKi indangkon na ra mago.”

³⁴“Jagohon hamu ma dirimunu, ulang jabat lalap-lalap marpestai jana minum-minum mabuk, sanga pe lalap mamikirkon angka na mardomu tu hangoluan, gabe inda hobas hamu di na tompu bincar ari i.

³⁵Angke songon tirangkap do parro ni ari i tu halak na satano on.

³⁶Hara ni i tongtong ma hamu marjago jana martangiang anso taradopi hamu sude pangalaho na giot tarjadi i, jana tarbaen hamu ma mangadop tu Anak Ni Jolma i.”

³⁷Di Bagas Ni Debata do Jesus arian i mangajari tapi dung borngin kehe ma Ia tu Dolok Zetun jana disi do Ia marborngin.

³⁸Ganop manyogot do marroan halak na bahat tu Bagas Ni Debata laho umbege Jesus mangajari.