Read Batak Angkola LUKAS 22 Bible Online

LUKAS 22 - Batak Angkola bible

LUKAS 22

¹Dapot ne ma Pesta Paskah, i ma na manghagodangkon Roti Na So Marragi.

²Sai dijalak-jalahi angka sintua ni malim dohot angka Siboto Surat Jahudi ma dalan mamatehon Jesus; angke mabiar do halahi mida halak na bahat i.

³Dung i disonggopi Sibolis ma si Judas na nigoaran muse si Iskariot, i ma sahalak sian sidua bolas halak sisean ni Jesus.

⁴Si Judas pe kehe ma martahi dohot angka panjago Bagas Ni Debata, sanga tarsongon dia baenonnia laho pasahatkon Jesus tu halahi.

⁵I noma jop ni roha ni halahi jana marjanji ma halahi laho mangalehen hepeng tusia.

⁶Dung dioloi si Judas, dipungka ia ma manjalahi dalan laho pasahatkon Jesus tu halahi, di na so pamotoan ni halak.

⁷Dapot ma arina parningotan di Roti Na So Marragi angkon nisambol ma biri-biri Paskah.

⁸Dung i disuru Jesus ma si Petrus dohot si Johannes. Didok Jesus ma tu halahi, “Kehe ma hamu pasingkopkon panganon Paskah di hita.”

⁹“Di dia do dipangido rohaMu hami pasingkop?” ning halahi manyapaisa.

¹⁰Dialusi Ia ma, “Tangihon hamu ma jolo! Muda masuk hamu annon tu kota, marsuo ma hamu dohot sada halak na maroban sada gunci na marisi aek. Ihutkon hamu ma ia sanga na tu bagas dia ia masuk,

¹¹dung i dokkon hamu ma tu nampuna bagas i, ‘Didok Guru i: Di dia dehe inganan ni angka siseanKi dohot Au na giot mangan sipanganon Paskah i?’

¹²Dung i dipatuduhon nampuna bagas i ma tu hamu sada kamar na bidang di loteng na dung singkop. Pasingkop hamu ma disi sudena.”

¹³Dung i kehe ma si Petrus dohot si Johannes jana dapot halahi ma sudena songon na dung dipatorang ni Jesus nangkin. Dipasingkop halahi ma panganon Paskah i.

¹⁴Dung dapot hatihana mangan sipanganon Paskah i, juguk ma Jesus rap dohot angka siseanNia i.

¹⁵Dung i didok Ia ma tu halahi, “Lungun sajo do rohangKu mangankon sipanganon Paskah on rap dohot hamu taran so manaon parkancitan Au!

¹⁶Angke Hudok ma di hamu: Nada panganonKu be sipanganon on lopus dipatulus arti ni parjamuan on di na nipajongjong Debata HarajaanNia.”

¹⁷Jadi dibuat Jesus ma panginuman ni anggur, didokkon Ia ma tarimakasi tu Debata, dung i didok Ia ma, “Buat hamu ma jana parbagihon hamu ma;

¹⁸angke Hudok ma di hamu, mulai saonnari nada inumonKu be anggur on lopus di haroro ni Harajaan Ni Debata.”

¹⁹Dung i dibuat Jesus ma roti. Dung didokkon Ia tarimakasi tu Debata, dibola-bola Ia ma roti i, dung i diparleheni Ia ma tu halahi jana didok Ia ma, “On ma pamatangKu, [na nilehen di hamu. Baen hamu ma songon i laho marningot Au.”

²⁰Laing songon i ma dung sidung mangan, dilehen Ia ma panginuman i, tu halahi jana didok Ia ma, “Anggo anggur on, i ma parjanjian na imbaru sian Debata, na nicap dohot mudarKu, mudar na niduruskon hara ni hamu].”

²¹“Tapi ligi hamu ma! Anggo halak na manghianat tu Au, dison do ia rap dohot Au di meja on!

²²Tutu do i nian, angkon mate hian do Anak Ni Jolma i songon na dung ditontuhon ni Debata hian; tapi marjaya ma halak na manghianat Ia!”

²³Jadi mamungka ma halahi marsisapaan sama halahi, sanga ise ibana sian halahi na gabe panghianat i.

²⁴Masa ma partongkaran di angka sisean ni Jesus taringot tu sanga ise sian halahi na nietong angkon gumodang.

²⁵Dung i didok Jesus ma tu halahi, “Anggo angka raja na di tano on di kuasoi do rayatna jana digoari do angka na maniop kuaso i, ‘Parlinggoman ni na torop.’

²⁶Tapi anggo hamu ulang ma songon i. Sabalikna do, halak na gumodang sian hamu angkon gabe ummenek do, jana giot gabe pamimpin angkon gabe songon pangoloi.

²⁷Ise ma he na gumodang: Halak na mangan di meja do, sanga halak na mangoloi ia? Tontu na juguk i do. Tapi anggo Au di tonga-tongamunu do gabe songon pangoloi.

²⁸Di bagasan sude hasusaanKu, sai tongtong do hamu rap dohot Au.

²⁹Songon dia pangalehen ni Damang di Au kuaso laho mamarenta, laing songon i ma Hulehen kuaso di hamu laho mamarenta.

³⁰Tola ma hamu rap dohot Au marsonang-sonang di HarajaanKi. Jana juguhanmunu ma dua bolas habangsa laho manguhumi halak Israel sidua bolas marga i.”

³¹“Simon, Simon, tangihon jolo! Madung diisinkon Sibolis i laho manguji hamu sude, songon partani na mamiari dahanon sian guapak.

³²Tapi madung martangiang Au hara ni ho Simon, anso ulang hambar haporsayaanmi. Jana muda dung mulak ho mangulahi tu Au, angkon patoguonmu do angka kahanggimu.”

³³Dialusi si Petrus ma, “Olo Tuhan, rade do au masuk tu hurungan jana mate rap dohot Ho!”

³⁴Tapi didok Jesus ma, “Au ma mandok di ho Petrus, dompak so martahuak dope manuk sadari on, tolu noli ma dokkononmu, na so ditanda ho Au.”

³⁵Dung i didok Jesus ma tu halahi, “Nabaruon dompak Husuru hamu na so Hupaloas do maroban dompet, huncang sanga sipatu, adong he bagi aha hurang di hamu?” “Nada adong na hurang,” ning halahi mangalusi.

³⁶“Tapi anggo saonnari, sanga ise na adong dompetna sanga huncangna, dioban ma; jana na so adong podangna, digadis ma baju jubana panobusi ni podang.

³⁷Angke Au mandok di hamu! Angkon tulus muse dope tu Au hata na tarsurat di Buku Na Badia na mandok, ‘Etongon ma Ia songon sada halak parjahat.’ Angke sanga aha na tarsurat di Buku Na Badia i taringot tu Au, saonnari ma tarjadi.”

³⁸Ninna halahi ma, “Ligi ma jolo Tuhan, madung adong dison dua podang.” “Tuk ma i!” ning Jesus mangalusi.

³⁹Dung i kehe ma Jesus ruar sian kota i songon na somal tu Dolok Zetun, jana dohot do angka siseanNia i kehe rap dohot Ia.

⁴⁰Dung lalu disi, didok Ia ma tu halahi, “Martangiang ma hamu anso ulang madabu hamu tu pandugaan.”

⁴¹Dung i dipadao Ia ma saotik sian halahi, hira-hira sandanggur batu daona, marsinggang ma Ia martangiang,

⁴²didok Ia ma, “Ale Amang, sugari ra ma Ho, pasalpu ma panginuman sitaonon on sian Au; tapi nada anggo hagiotKu na tulus, hagiotMu ma patulus!” [

⁴³Ro ma sada surusuruan tuSia margogoihon Ia.

⁴⁴Mabiar situtu do Jesus, gabe mur marsitutu ma Ia na martangiang i. Songon mudar noma hodokNia manetehi tu tano i.]

⁴⁵Dung sidung na martangiang i, mulak ma Ia mandapotkon angka siseanNia i. Didapot Ia madung modom be halahi hara ni marsakna.

⁴⁶Dung i didok Ia ma tu halahi, “Biasi dehe modom hamu? Ngot ma hamu, martangiang ma anso ulang madabu hamu tu pandugaan.”

⁴⁷Dompak na mandok hata i dope Jesus, ro ma halak sarombongan. Si Judas do na maroban halahi, i ma sahalak sian sisean ni Jesus. Dung i dipadonok ia ma tu Jesus, torus diumma ia ma Jesus.

⁴⁸Tapi didok Jesus ma tusia, “O Judas, hape markite-hite pangummami ma dihianati ho Anak Ni Jolma i.”

⁴⁹Dung diida angka sisean ni Jesus na adong disi sanga aha na giot masa, didok halahi ma, “Bia do Tuhan, hami rasip ma dohot podang on?”

⁵⁰Dung i ro ma sahalak sian halahi, ditampul ia ma naposo ni Malim Godang i dohot podang i, lopus ramping pinggol siamun ni naposo i.

⁵¹Tapi didok Jesus ma, “Madung i!” Dung i dijama Ia ma pinggolna i jana dipamalum Ia.

⁵²Dung i mandok hata ma Jesus tu angka kapala ni malim i dohot tu angka panjago Bagas Ni Debata, dohot tu angka bagian hatobangon ni halak Jahudi na marroan tusi laho manangkup Ia, ning Ia ma, “Panyamun dehe lakna Au umbaen marpodang dohot marumban-umban hamu ro laho manangkup Au?

⁵³Ganop ari do Au rap dohot hamu di Bagas Ni Debata, hape so ditangkup hamu Au. Tapi on ma lakna hatihana di hamu mambaen sibaenonmunu, jana hatihana ma kuaso hagolapan i mambaen hatontuan.”

⁵⁴Ditangkup halahi ma Jesus jana dioban ma tu bagas ni Malim Godang. Dipaihut-ihut si Petrus ma sian na dao.

⁵⁵Di tonga-tonga ni alaman i dipagara ma api jana dipadonok si Petrus ma tu lambung ni purunan i rap dohot halak na marjuguhan disi.

⁵⁶Jadi adong ma sahalak naposo dadaboru disi mida si Petrus na juguk donok tu api i, dimata-matai ia ma jana didok ia ma, “Dohot muse do bayo on nangkin rap dohot Jesus!”

⁵⁷Tapi diporso si Petrus do i. Didok ia, “Saotik pe nada hutanda Ia!”

⁵⁸Santongkin nari muse, diida halak na asing ma si Petrus jana didok ma, “Ho pe dohot do sada sian halahi!” Tapi dialusi si Petrus ma, “Nada le, inda au i!”

⁵⁹Dung adong tar sajom ro muse ma na asing sahalak nari manggogohon hatana, “Tutu do bayo on sisean ni Jesus, harana ia pe halak Galilea do!”

⁶⁰Tapi dialusi si Petrus ma, “Nada huastui sanga aha na nidokmi!” Laing di hatiha i, di na mandok hata i dope si Petrus martahuak ma manuk.

⁶¹Jesus pe humusor ma, manaili ma Ia tu si Petrus. Dung i tarsingot ma si Petrus hata na nidok ni Tuhan i tusia, “Painte so martahuak manuk di ari on, ma pola tolu noli ho mamorso Au.”

⁶²Jadi haruar ma si Petrus sian i, jana tangis panguncombopon.

⁶³Dipacia-cia jana dibalbali angka na manjago i ma Jesus.

⁶⁴Dibulang halahi ma mataNa i jana disapai halahi ma Ia, “Paboa ma jolo sanga ise do na mambalbali Ho?”

⁶⁵Bahat dope angka hata incak na dipardokkonan ni halahi tuSia.

⁶⁶Dung torang ari marlagut ma angka hatobangon ni halak Jahudi dohot ma angka sintua ni malim dohot angka Siboto Surat. Dung i dioban ma Jesus tu jolo ni Mahkamah Ugamo ni halahi.

⁶⁷Ninna halahi ma, “Paboa ma tu hami, sanga na Ho do Kristus i?” Dialusi Jesus ma, “Muda Au do paboahon tu hamu, bagi na bia pe so na ra hamu porsaya.

⁶⁸Jana muda marsapa pe Au tu hamu, laing na so ra do hamu mangalusi.

⁶⁹Tapi mamungka saonnari, juguk ma Anak Ni Jolma i di siamun ni Debata Na Markuaso i.”

⁷⁰Sude ma halahi mandok, “Antong anggo songon i, Anak Ni Debata do Ho lakna?” Dialusi Jesus ma, “Madung didokkon hamu, bahaso na Anak Ni Debata do Au.”

⁷¹Didok halahi ma, “Nada porlu be saksi! Madung tarbege sian pamanganNia sandiri!”