Read Batak Angkola LUKAS 23 Bible Online

LUKAS 23 - Batak Angkola bible

LUKAS 23

¹Jongjong ma sude na marrapot i, dioban halahi ma Jesus tu jolo ni si Latus.

²Dipungka halahi ma disi mangaduhon Ia. Didok halahi ma, “Madung tardapot hami bayo on palilu-liluhon halak. Jana diirangi-irangi Ia do halak anso ulang manggarar pajak tu Kesar; harana pandokNia, Kristus do Ia, sada halak Raja.”

³Dung i disapai si Latus ma tu Jesus, “Atehe, tutu do Ho Raja ni halak Jahudi?” Dialusi Jesus ma, “Songon na nidok ni tuan i, tutu do i.”

⁴Dung i didok si Latus ma tu angka sintua ni malim i dohot tu halak na bahat, “Nada adong dapot au sanga aha pe hasalaanNia.”

⁵Tapi laing disosak halahi ma. Ninna halahi, “Sian pangajaranNia i, digaori Ia halak na di Judea sude, mula-mula di Galilea do, hape saonnari madung lalu muse tuson.”

⁶Dung dibege si Latus songon i marsapa ma ia, ning ia, “Halak Galilea dehe Bayo on?”

⁷Jadi dung diboto ia na marasal sian Luat Galilea do Jesus, i ma luat na masuk tu kuaso ni si Herodes, disuru oban si Latus ma Jesus tu si Herodes na topet di Jerusalem hatiha i.

⁸Jop sajo do roha ni si Herodes dung diida ia Jesus, harana madung lolot dibege ia taringot tu Jesus jana malungun ia marnidasa. Laing arop muse do rohania tarbaen ia sugari manyaksihon hahomangan na nibaen ni Jesus.

⁹Jadi gabe bahat do sapa-sapania tu Jesus, hape umpe ra Jesus mangalusi ia.

¹⁰Mangadop muse do disi angka kapala ni malim dohot angka Siboto Surat manuhas Jesus dohot angka tuduan na borat-borat.

¹¹Dipacia-cia si Herodes dohot angka tentarana i ma Jesus, diincak-incahi, dung i diabitkon halahi ma tusia pakean hasangapan, dung i ditongos halahi ma Jesus mangulahi tu si Latus.

¹²Jadi laing di ari i gabe mardongan ma mangulahi si Herodes dohot si Latus na marsalisi hian sahonokna on.

¹³Dipalagut si Latus ma angka sintua ni malim, angka hatobangon dohot rayat.

¹⁴Dung i mandok hata ma ia tu halahi, “Madung dioban hamu Bayo on tu jolongku, jana didok hamu Ia paliluhon halak. Saonnari di jolomunu madung hupareso Ia, hape sada pe nada adong dapot hajahatan bagi aha pe na nituhaskonmunu i tuSia.

¹⁵Songon i muse do mangihutkon pandapot ni si Herodes, angke ia pe madung ditongos ia mangulahi Jesus on tu hami. Nada adong dibaen Bayo on sanga aha pe na mambaen Ia angkon niuhum tu hamatean.

¹⁶Hara ni i huajar ma jolo Ia, dung i baru hupalua.” [

¹⁷Ganop Pesta Paskah, angkon sai dipalua si Latus do sada halak na tarhurung di rayat i.]

¹⁸Jadi marsurak ma angka jolma na disi sudena, “Matehon i! Si Barabbas ma palua di hami!” (

¹⁹Umbaen na tarhurung pe si Barabbas hara ni hagaoran na di kota bope hara ni na mamunu do.)

²⁰Hara ni na giot paluaon ni si Latus do Jesus, gabe mandok hata ma ia sanoli nari tu halak na bahat i.

²¹Tapi marsurak muse ma halahi, “Parsilangkon i! Parsilangkon i!”

²²Dung i patolu nolihon marsurak ma si Latus tu halahi. Ninna si Latus ma, “Aha ma he hasalaanNia? Nada adong dapot au sada pe hasalaan diSia na patut uhumon Ia tu hamatean! Huajar ma Ia, dung i baru ma anso hupalua.”

²³Tapi marpupu ma halahi marsurahi sagogo-gogona, angkon laing dipaku Jesus tu hayu parsilang. Ujungna monang ma halahi.

²⁴Jadi didabuhon si Latus ma uhum mate tu Jesus hombar tu na nipangido ni halahi i.

²⁵Jana dipalua si Latus ma bayo na nipangido ni halahi i, i ma bayo na tarhurung hara ni na mambaen gaor dohot hara ni na mamunu. Dung i dipasahat si Latus ma Jesus tu halahi anso dibaen halahi roha-rohana tuSia.

²⁶Dung i dioban ma Jesus tu balian. Di tonga dalan marsuo ma halahi dohot sada halak na margoar si Simon, na marasal sian Kirene na topet laho tu kota. Ditangkup halahi ma ia jana dipaksa ma mamorsan hayu parsilang i dipudi ni Jesus.

²⁷Laing bahat do halak na mangudurkon Jesus, adong ma i deba angka dadaboru. Ditangisi jana diandungi angka dadaboru i ma Jesus.

²⁸Ditailihon Jesus ma tu halahi jana didok Ia ma, “Hamu angka boru Jerusalem! Ulang ma tangisi hamu Au. Dirimunu sandiri dohot angka dakdanakmunu ma tangisi hamu.

²⁹Angke na ro ma hatihana dokkonon ni halak ma, ‘Martua ma angka dadaboru na so jungada maruntungan, na so unjung mangae mardakdanak jana na so jungada pasusuhon dakdanak!’

³⁰Dokkonon ni halak ma di hatiha i tu angka dolok, ‘Tinggangi ma hami!’ Jana tu angka partoran, ‘Lingkupkon ma hami!’

³¹Angke haru tu hayu na mangolu madung dibaen halak na songon on, mur tu hayu na punggur, bia muse noma ulaning baenon ni halahi!”

³²Adong muse dope dua halak nari na asing na nioban ni halahi anso diuhum rap dohot Jesus.

³³Dung lalu tu inganan na margoar “Partangkurahan”, dipaku halahi ma Jesus tu hayu parsilang i. Diparsilangkon muse ma dohot sidua halak na jahat i, sahalak ma i di siamun ni Jesus jana na sada nari di siambirangNia.

³⁴Dung i martangiang ma Jesus, “Ale Amang, sesa ma hasalaan ni halahi! Angke nada diboto halahi sanga aha na nibaen ni halahi.”[12]

³⁵Dibagi-bagi halahi be ma disi pakean ni Jesus, i ma markite-hite lotere. Marjongjongan do angka jolma i disi paida-ida sudena i, jana laing mangincak-incahi ma angka hatobangon ni halak Jahudi tu Jesus. Ninna halahi ma, “Anggo halak na asing madung dipalua Ia; padiar ma dipalua Ia diriNia sandiri, paboa na tutu situtu ma Ia Kristus na nitodo ni Debata i!”

³⁶Angka tentara i pe marsiincahi ma tuSia. Dipadonok halahi ma tu Jesus jana dilehen halahi ma anggur na mancom tuSia.

³⁷Dung i ninna halahi ma, “Muda tutu do Ho Raja ni halak Jahudi, antong palua ma diriMu!”

³⁸Di ginjang ni parsilang ni Jesus tarsurat do angka pandohan on, “On ma Raja Ni Halak Jahudi.”

³⁹Sada sian parjahat na diparsilangkon i disi mangincahi do tu Jesus. Didok ia, “Na he Ho do Kristus i? Antong anggo songon i, palua ma diriMu dohot hami!”

⁴⁰Tapi digorahon parjahat na sahalak nari ma ia. Ning ia ma, “Adong he na so mabiar be ho mida Debata? Rap hamatean do da uhuman i tu hita natolu.

⁴¹Anggo hita uhuman na patut do antong, hombar tu pangalahonta. Tapi anggo Bayo on saotik pe inda adong salaNia!”

⁴²Dung i didok ia ma tu Jesus, “O Jesus ingot ma Au, muda ro Ho saulahon dung gabe Raja!”

⁴³Gabe didokkon Jesus ma tusia, “Tutu do na Hudok on tu ho, sadari on rap ma ho dohot Au di Pirdaus.”

⁴⁴Dung hira-hira pukul dua bolas arian, manggolap ma mataniari. Gabe golap sajo ma luat i lopus tu pukul tolu andospotang,

⁴⁵jana maribak ma tire na di Bagas Ni Debata, gabe bola dua.

⁴⁶Dung i marsurak ma Jesus gogo, “Ale Amang! Tu bagasan tanganMu ma Hupasahat tondingKu!” Dung didok Ia songon i marujung ma ngoluNia.

⁴⁷Dung diida komandan ni tentara i na masa i, gabe dipuji ia ma Debata. Ning ia ma, “Tutu do! Halak na tigor do Bayo on!”

⁴⁸Angka halak na marroan i pe tusi laho marnida na masa i, laing diida halahi do sude na tarjadi i. Gabe marsak sajo ma halahi sude di na marmulahan tu bagasna be.

⁴⁹Jana mandao-dao ma sude halahi na mananda Jesus, dohot ma disi angka dadaboru na mangihutkon Ia sian Galilea paida-ida na masa i sudena.

⁵⁰Adong ma sada halak na margoar si Josep, sian Arimatea na di Luat Judea. Halak na burju do ia na nipasangap ni halak jana sai dipainte ia do sanga andigan hatihana Debata mamungka mamarenta songon Raja. Haru pe anggota ni Rapot Godang ni Ugamo ia, nada dohot-dohotan ia di haputusan dohot pambaenan ni Rapot Godang i.

⁵¹

⁵²Kehe ma si Josep on mangadop tu si Latus jana dipangido ia ma bangke ni Jesus anso dipasahat tusia.

⁵³Dung i dipaijur ia ma bangke i sian hayu parsilang i jana dikopeni ia ma. Dung i ditaruhon ia ma bangke i tu bagasan kuburan na nituhil di sada dolok batu na so jungada dope dipake kuburan i.

⁵⁴Ari parkobasan do dompahi; jana nada sadia honok nari mamungka ma Ari Sabat.

⁵⁵Diihutkon angka dadaboru na ro rap dohot Jesus sian Galilea i ma si Josep mangaligi kuburan i. Laing diida halahi do sanga tarbia parpayak ni bangke ni Jesus di bagasan kuburan i.

⁵⁶Dung i mulak ma halahi, dipature halahi ma angka parmasak dohot miak na huskus silapuhonon tu bangke ni Jesus. Ancogotna i, di Ari Sabat, maradian be ma halahi markarejo mangoloi angka Tona ni ugamo Jahudi.