Read Batak Angkola LUKAS 24 Bible Online

LUKAS 24 - Batak Angkola bible

LUKAS 24

¹Sogot sajo dope di Ari Minggu i, kehe ma angka dadaboru i tu kuburan maroban angka parmasak na niparade ni halahi.

²Didapot halahi ma di kuburan i madung magulang batu panutup ni kuburan i.

³Jadi dung masuk halahi tu bagasan kuburan i, hape inda diida halahi be disi bangke ni Tuhan Jesus.

⁴Jadi di na lalap-lalap jongjong halahi disi, ompot ma jongjong dua halak na marpakean na marsirlak di lambung ni halahi.

⁵Sun ma biar ni halahi, gabe manungkap ma halahi tu tano. Jadi di na songon i, didok sidua halak i ma tu halahi, “Biasi dijalahi hamu na mangolu di inganan ni na mate?

⁶Inda adong dison Ia; madung mulak mangolu Ia! Ingot hamu ma na nidokNia tu hamu dompak di Galilea dope Ia.

⁷Didok Ia, ‘Angkon dipasahat do Anak Ni Jolma i tu tangan ni angka pardosa lalu dipakuhon ma tu hayu parsilang, dung i mulak mangolu ma Ia mangulahi di ari patoluhon.’ ”

⁸Dung i gabe tarsingot ma angka dadaboru i tu angka hata na nidok ni Jesus.

⁹Dung mulak halahi sian kuburan i, dicaritohon halahi ma i sudena tu rasul si sabolas halak i dohot tu angka sisean na asing i sudena.

¹⁰Angka on ma dadaboru na paboahon i sudena tu angka sisean ni Jesus: Si Maria Magdalena, si Johanna, si Maria inang ni si Jakobus dohot angka dadaboru na asing i na rap dohot halahi.

¹¹Tapi ning roha ni angka rasul i, carito na so martontu do na nipaboa ni angka dadaboru i, jana nada porsaya halahi disi.

¹²Tapi anggo si Petrus jongjong ma ia marlojong tu kuburan. Dipaunduk ia ma mangaligi tu bagasan, diida ia ma, hum kopen i sajo do na disi. Homang ma roha ni si Petrus, jana marragam ma sapa-sapa di bagasan rohania hara ni na masa i di na kehe ia mulak.[13]

¹³Laing di na sadari i, mardalan ma dua halak sisean ni Jesus tu sada huta na margoar Emmaus, hira-hira sabolas kilometer ma dao ni i sian Jerusalem.

¹⁴Di na mardalan i mangkobar-kobari ma halahi taringot tu sude pangalaho na masa i.

¹⁵Jadi dompak mangkata-hatai halahi martukar pikiran, ro ma Jesus mandonohi halahi jana sauduran ma halahi mardalan.

¹⁶Diida halahi do nian Jesus, tapi songon na rondaron halahi gabe inda ditanda halahi Ia.

¹⁷Didok Jesus ma tu halahi, “Taringot tu aha ma he na nihobaranmunu di na mardalan on?”

¹⁸Maradian ma halahi marsak sajo idaon. Jadi marsapa ma sahalak sian halahi tu Jesus, i ma na margoar si Kleopas, ning ia ma, “Hum sasada hamu noma ulaning halak ro di Jerusalem on, na so umboto na masa i di na piga-piga ari on?”

¹⁹“Aha na masa?” ninna Jesus. “I ma na masa tu Jesus halak Nasaret i,” ning halahi mangalusi. “I ma sada panurirang na markuaso situtu hataNa, dohot pambaenanNa pe margogo situtu — di jolo ni Debata dohot di jolo ni jolma pe.

²⁰Na dipasahat ni angka kapala ni malim dohot angka hatobangon ni bangsonta do Ia mate diuhum jana madung dipaku halahi Ia di hayu parsilang!

²¹Hape anggo hami arop hian do rohanami, Ia humani ma na paluahon Israel! Tapi madung salpu tolu ari na masa i!

²²Sada muse, madung gabe tarsonggot hami dibaen angka dadaboru dongannami i. Sogot dope nasogot ma kehe halahi tu kuburan,

²³hape inda diida halahi be disi bangke ni Jesus. Dung i mulak ma halahi jana dipaboa halahi ma na niida ni halahi surusuruan jana didok angka surusuruan i, na mangolu do Jesus.

²⁴Jadi adong ma sanga na piga halak sian hami na kehe tu kuburan i, hape diida halahi tutu do hape sude na nidok ni angka dadaboru i, hum i tutu, anggo Jesus inda diida halahi.”

²⁵Dung i mandok hata ma Jesus tu halahi ning Ia, “Otona i hamu! Na maol ma hamu manghaporsayai na nidok ni angka panurirang i!

²⁶Na he angkon taonon ni Kristus i do sudena parkancitan i, laho masuk tu hamuliaanNia i?”

²⁷Dung i dipatorang Jesus ma tu halahi sanga aha na nidok taringot tuSia di bagasan Buku Na Badia i, mamungka sian Buku Ni si Musa lopus tu buku-buku ni angka panurirang.

²⁸Ujungna lalu ma halahi marayak huta sitopoton ni halahi i. Dipaula-ula Jesus ma songon na giot torus na mardalan i,

²⁹tapi diontang halahi ma Ia, “Rap ma hita jolo, borngin ne ma ari indon madung mamungka golap muse.” Dung i masuk ma Jesus laho marborngin disi rap dohot halahi.

³⁰Dung juguk halahi rap mangan, dibuat Jesus ma roti jana didok Ia ma tarimakasi tu Debata, dung i dibola-bola Ia ma roti i dohot tanganNia, dilehen Ia ma tu halahi.

³¹Hatiha i tarbuka ma mata ni halahi jana ditanda halahi ma Ia, tapi manigor buni do Ia morot sian halahi.

³²Jadi ninna halahi ma sama halahi, “Nangkin di dalan i, i noma gurgur ni rohanta, di na nipajojorNia torang isi ni Buku Na Badia i tu hita!”

³³Laing di na santongkin i manigor jongjong ma halahi laho mulak tu Jerusalem. Madung marlagut angka sisean ni Jesus sisabolas halak dohot na asing i didapot halahi disi.

³⁴Didok angka sisean i ma, “Tutu do na dung mulak mangolu Tuhanta i! Madung dipataridahon Ia diriNia tu si Simon!”

³⁵Dung i dipatorang sisean ni Jesus na baru ro i ma pangalaman ni halahi di tonga dalan i jana lopus ditanda halahi Tuhan i dung dibola Ia roti i.

³⁶Jadi taran na mangkobari i dope sudena halahi, ompot ma jongjong Jesus di tonga-tonga ni halahi, “Dame ma di hamu!”[14] ning Ia.

³⁷Tarsonggot ma halahi jana mabiar be, angke ning roha ni halahi, begu do na niida ni halahi i.

³⁸Tapi didok Jesus ma tu halahi, “Biasi he mabiar hamu, jana biasi ganggu rohamunu?

³⁹Ligi hamu ma tangankon dohot patkon. Au sandiri do i! Jama hamu ma jana pamanat hamu, angke nada marsibuk sanga marholi-holi anggo begu songon na niidamunu di Au.”

⁴⁰Di na nidok ni Jesus songon i dipatidahon Ia ma tanganNia dohot patNia.[15]

⁴¹Di na laing so porsaya halahi, hara ni jop ni roha ni halahi boti homang-homang be, disapai Jesus ma halahi, “Adong dehe sipanganon bagi aha di hamu dison?”

⁴²Dilehen halahi ma tuSia samponggol ihan.

⁴³Dijagit Jesus ma ihan i, laing di jolo ni halahi ma dipangan Ia.

⁴⁴Dung i mandok hata ma Ia tu halahi ning Ia ma, “Angka on ma na Hupaboa hian di hamu, dompak rap dope Au dohot hamu, angkon tarjadi do sudena sanga aha na tarsurat taringot tu Au di angka Buku Ni si Musa dohot buku ni angka panurirang dohot Masmur i.”

⁴⁵Dung i dibuka Jesus ma pikiran ni halahi anso diastui halahi na nidok ni Buku Na Badia i.

⁴⁶Dung i didok Jesus ma tu halahi, “Na dung tarsurat hian do di Buku Na Badia i, angkon manaon parkancitan do Kristus i, jana mulak mangolu Ia sian hamatean di ari patoluhon.

⁴⁷Sada muse, tarsurat hian do angkon nijamitahon do tu sude bangso markite-hite goar ni Kristus i bahaso na giot ampunan ni Debata ma angka dosa muda dipauba jolma i rohana sian angka dosa ni halahi. Jana mamungka ma barita i sian Jerusalem on.

⁴⁸Jadi hamu ma na gabe saksi ni sudena i.

⁴⁹Au sandiri pe tongosonKu do tu hamu sanga aha na dung dijanjihon ni Damang. Tapi angkon laing painteonmunu do di kota on lopus nisolukkon tu hamu hagogoan na sian ginjang i.”

⁵⁰Dung i dioban Jesus ma halahi tu balian, lopus tu Betania. Diangkat Ia ma disi tanganNia mamasumasu halahi.

⁵¹Jadi taran na mamasumasu Ia tu halahi, marsirang ma Ia sian halahi, manaek ma Ia tu banua ginjang.[16]

⁵²Dung i tungkap ma halahi marsomba tuSia, lalu mulak ma halahi tu Jerusalem mardongan jop ni roha situtu.

⁵³Jadi tongtong ma halahi di Bagas Ni Debata dipuji-puji halahi ma Debata disi.