Read Batak Angkola LUKAS 3 Bible Online

LUKAS 3 - Batak Angkola bible

LUKAS 3

¹Di taon palima bolaskon dung mamarenta Kesar Tiberius, si Pontius Pilatus ma na gabe gubernur di Judea, jana si Herodes mamarenta di Galilea. Si Pilipus dongan saama ni si Herodes mamarenta di Luat Iturea dohot Trakhonitis, jana si Lisanias mamarenta di Abilene.

²Na gabe Malim Godang, i ma si Hanas dohot si Kayafas.[2] Hatiha i ma mangkatai Debata tu si Johannes anak ni si Zakaria di halongonan i.

³Si Johannes pe kehe ma mandalani sude angka luat na di Batang aek Jordan pabolkaskon barita na sian Debata disi. Didok si Johannes ma, “Pauba hamu ma rohamunu sian angka dosamunu, jana lehen ma dirimu nididi anso disesa Debata hamu.”

⁴Tarsurat do di buku ni Panurirang Jesaya songon on: “Adong do sora na pio-pio di halongonan, ‘Pahornop hamu ma dalan ni Tuhan, patigor hamu ma dalan diSia.

⁵Angkon nibuta ma sude holbung, sudena dolok dohot tor nipahornop. Angkon nipatigor ma dalan na so tigor, jana nipahornop ma dalan na manangkok-manuat.

⁶Idaon ni halak na satano on ma haluaan na sian Tuhan!’ ”

⁷Bahat do halak marroan mandapotkon si Johannes anso dididi. Didok si Johannes ma tu halahi, “Hamu angka pomparan ni ulok! Ise ma he na mandok tu hamu laho palua diri sian hamumuruk ni Debata na giot ro i?

⁸Patidahon hamu ma jolo pangalahomunu paboa na dung muba hamu sian angka dosamunu i! Dung i ulang pola dok hamu di bagasan rohamunu, ‘Si Abraham do ompungnami! Angke angkon ingotonmunu do: Sian angka batu on pe tarbaen Debata do pinompar di si Abraham!’

⁹Madung singkop kampak laho manaba angka hayu lopus tu angka uratna i. Angkon tabaon noma sandok hayu na so marbatu na denggan jana ambungkononkon tu bagasan api.”

¹⁰“Antong, aha noma sibaenonnami?” ning halahi tu si Johannes.

¹¹Ning si Johannes ma mangalusi, “Halak na marbaju dua angkon lehenonnia ma sada tu halak na so adong bajuna; songon i muse halak nampuna sipanganon, angkon bagihononnia ma i tu halak na asing.”

¹²Ro muse angka sitagi pajak mandapotkon si Johannes anso dipandidihon. Disapai halahi ma si Johannes, “Aha dehe sipatupaonnami ninna guru i?” Ning si Johannes ma mangalusi,

¹³“Ulang pangido hamu lobi sian na dung diaturkon.”

¹⁴Adong muse do tentara na manyapai, “Bia do taringot tu hami? Aha do sibaenonnami?” Dialusi si Johannes ma, “Ulang jagiti hamu hepeng sanga sian ise pe hara ni na nipaksa bope markite-hite adu-aduan na so tutu tusia. Gajimi ma hangoluhon!”

¹⁵Sai dipainte-inte halak do haroro ni Kristus i. Jadi mamungka ma sapa-sapa roha ni halahi betak na si Johannes on do Kristus i.

¹⁶Hara ni i ma umbaen didok si Johannes tu halahi sude, “Dohot aek do hudidi hamu, tapi ro ma sanoli on Sada halak na gumodang sian au. Mangkarhari tali sipatuNa pe nada tarpake dope au. DidihononNia ma tu hamu Tondi Parbadia dohot api.

¹⁷Madung rade Ia mamiari, laho paiaskon eme sian lapung. PalagutonNia ma eme tu talobat, tapi anggo lapungNa i tutungonNia ma tu api na so ra mintop!”

¹⁸Songon i ma marragam-ragam dalanna dibaen si Johannes paingotkon angka halak, di na nijamitahonnia Jamita Na Denggan na sian Debata tu halahi.

¹⁹Bope si Herodes, gubernur ni Galilea i laing digorahon si Johannes do hara ni na nibuatnia si Herodias dadaboru ni anggina bope hara ni sude hajahatannia na asing na nibaennia.

²⁰Hape mur jumahat muse dope si Herodes, dipamasuk ia ma si Johannes tu hurungan.

²¹Dung dipandidihon sudena halahi, dipandidihon muse ma Jesus. Jadi hatiha martangiang Ia, mungkap ma langit,

²²jadi mijur ma Tondi Parbadia tuSia songon darapati. Dung i tarbege ma sora sian banua ginjang na mandok, “Ho do Anak haholonganKu. Jop do rohangKu mida Ho.”

²³Di na baru mamungka karejoNia Jesus, marumur ma Ia tar tolu pulu taon. Anggo pandok ni halak, anak ni si Josep do ia, i ma anak ni si Eli,

²⁴anak ni si Matat, anak ni si Levi, anak ni si Malkhi, anak ni si Janai, anak ni si Josep,

²⁵anak ni si Mattatia, anak ni si Amos, anak ni si Nahum, anak ni si Hesli, anak ni si Nagai,

²⁶anak ni si Maat, anak ni si Mattatia, anak ni si Simei, anak ni si Josek, anak ni si Joda,

²⁷anak ni si Johanan, anak ni si Resa, anak ni si Zerubabel, anak ni si Sealtiel, anak ni si Neri,

²⁸anak ni si Malkhi, anak ni si Adi, anak ni si Kosam, anak ni si Elmadam, anak ni si Er,

²⁹anak ni si Josua, anak ni si Elieser, anak ni si Jorim, anak ni si Matat, anak ni si Levi,

³⁰anak ni si Simeon, anak ni si Juda, anak ni si Josep, anak ni si Jonam, anak ni si Elyakim,

³¹anak ni si Melea, anak ni si Mina, anak ni si Matata, anak ni si Natan, anak ni si Daud,

³²anak ni si Isai, anak ni si Obed, anak ni si Boas, anak ni si Salmon, anak ni si Nahason,

³³anak ni si Aminadab, anak ni si Admin, anak ni si Arni, anak ni si Hesron, anak ni si Peres, anak ni si Juda,

³⁴anak ni si Jakob, anak ni si Ishak, anak ni si Abraham, anak ni si Terah, anak ni si Nahor,

³⁵anak ni si Serug, anak ni si Rehu, anak ni si Peleg, anak ni si Eber, anak ni si Salmon,

³⁶anak ni si Kenan, anak ni si Arpaksad, anak ni si Sem, anak ni si Noak, anak ni si Lamekh,

³⁷anak ni si Metusala, anak ni si Henokh, anak ni si Jaret, anak ni si Mahalalel, anak ni si Kenan,

³⁸anak ni si Enos, anak ni si Set, anak ni si Adam, anak ni Debata.