Read Batak Angkola LUKAS 6 Bible Online

LUKAS 6 - Batak Angkola bible

LUKAS 6

¹Di sada hatiha, dompak Ari Sabat, mamolus ma Jesus di ladang gandum, jadi digotil anak siseanNia ma angka gandum, di puyu-puyu jana dipangan halahi ma i.

²Jadi didokkon deba sian halak Parise ma tu halahi, “Biasi dehe dibaen hamu na so jadi baenon di Ari Sabat i?”

³Dialusi Jesus ma, “Na so unjung dope disise hamu taringot tu na nibaen ni si Daud hatiha malean ia dohot angka dongannia i?

⁴Masuk ia tu Bagas Ni Debata, dibuat ia roti na dung dihaulkon tu Debata, dipangan ia. Dung i dilehen ia muse do roti i tu angka dongannia i. Hape nian anggo mangihutkon Tona ni ugamonta hum malim sajo do na tola mangankon roti i. Anggo halak na asing, nada tola.”

⁵Dung i didok Jesus ma tu halahi, “Anggo Anak Ni Jolma i Tuhan ni Ari Sabat do!”

⁶Di Ari Sabat na asing muse, kehe ma Jesus mangajari di bagas paribadatan. Adong ma disi sada halak na mate tangan siamunna.

⁷Tangkas ma diparrohahon deba Siboto Surat dohot halak Parise sanga na dipamalum Jesus do na marnyae i di Ari Sabat. Angke na manjalahi hasalaan ni Jesus do halahi anso taraduhon halahi Ia.

⁸Hape diboto Jesus do pikiran ni halahi i. Gabe didok Ia ma tu na mate tanganna sabariba i, “Ngot ma ho jana, jongjong ma ho di tonga-tonga!” Jongjong ma bayo i disi.

⁹Dung i didok Jesus ma tu halahi, “Saonnari Husapai ma hamu: Aha do na tola baenon di Ari Sabat mangihutkon Tona ni ugamonta i? Mambaen na denggan do sanga mambaen na jat? Paluahon jolma do sanga mangago?”

¹⁰Diligi Ia ma halahi sude humaliang, didok Ia ma tu bayo i, “Pahortang tanganmi!” Dipahortang ia tangannia i, gabe malum ma tangannia i.

¹¹Tapi anggo halak Parise i dohot angka Siboto Surat na disi, milas sajo ma roha ni halahi, martahi ma halahi sanga songon dia baenon ni halahi tu Jesus.

¹²Jadi manangkok ma Jesus hatiha i tu sada dolok laho martangiang. Martangiang ma Ia saborngin i tu Debata.

¹³Dung torang ari dipiohon Ia ma angka anak siseanNia i, dipili Ia ma sian halahi dua bolas halak. Digoari Ia ma na dua bolas i, rasul. I ma:

¹⁴Si Simon (na nigoarannia muse si Petrus), dohot si Andreas anggi ni si Simon; si Jakobus dohot si Johannes, si Pilipus dohot si Bartolomeus,

¹⁵si Mateus dohot si Tomas, si Jakobus anak ni si Alfeus dohot si Simon (na nigoaran halak Zelot),

¹⁶si Judas anak ni si Jakobus dohot si Judas Iskariot na manghianat i.

¹⁷Dung i manuat ma Jesus sian dolok i rap dohot angka rasul i, maradian ma halahi jongjong di sada inganan na hornop. Adong muse do disi angka anak siseanNia na asing songon i muse angka halak na marroan sian Judea, sian Jerusalem dohot na sian Tirus dohot Sidon dohot sian angka kota na di topi laut.

¹⁸Marroan ma halahi laho manangihon hata ni Jesus, boti anso dipamalum nyae ni halahi be. Sanga na hona setan pe halahi, laing dipamalum.

¹⁹Sude halak na disi marusaho be laho manjama Jesus, harana adong do kuaso na haruar sian pamatangNia na pamalumkon halahi.

²⁰Ditailihon Ia ma angka anak siseanNia i didok Ia ma, “Martua ma hamu angka halak na dangol, harana hamu do nampuna Harajaan Ni Debata!

²¹Martua ma hamu na male saonnari, harana pabutongon ma hamu muse! Martua ma hamu angka na tangis saonnari, harana gabe martata ma hamu muse!

²²Martua ma hamu muda goyak roha ni halak mida hamu jana nada dijagit hamu, boti dipalayas-layas jana didok halak na jahat hamu, hara ni Anak Ni Jolma i!

²³Muda masa songon i, angkon jop ma nian rohamunu manortori marmoga-moga, angke adong do upamunu na godang di banua ginjang. Angka panurirang pe najolo songon i do dibaen angka ompung ni halak on.

²⁴Tapi marjaya ma hamu na kayo saonnari on; harana madung didai hamu na tabo!

²⁵Marjaya ma hamu na butong saonnari on; harana, malean ma hamu! Marjaya ma hamu na martata saonnari on; harana, marsak ma rohamunu jana tangis.

²⁶Marjaya ma hamu muda sude halak mamuji hamu; angke songon i do angka panurirang panipu najolo dipapuji-puji angka ompung ni halahi.”

²⁷“Tapi anggo tu hamu angka na umbege hatangKu saonnari on, on ma tonangKu tu hamu: Haholongi ma angka musumu, jana denggan ma pangalahomu tu angka na mangkagigihon ho.

²⁸Pasupasu ma na mamurai ho. Jana tangiangkon ma angka na mambaen na so patut tu ho.

²⁹Muda ditampeleng halak sabariba hurummi, padiar muse ma ditampeleng ia hurummu na sabariba nari. Muda dirampas abitmu, lehen muse ma dohot bajumi.

³⁰Muda dipangido halak sanga aha tu ho, lehen ma i disia; muda dirampas sinadonganmu, ulang pola pangido be i mulak.

³¹Sanga aha por ni rohamu baenon ni halak tu ho, baen ma songon i tu halahi.”

³²“Muda hum na mangkaholongi hamu sajo do dihaholongi hamu, aha ma he labomu disi? Angke pardosa i pe dihaholongi do angka na mangkaholongi halahi!

³³Jana muda hum tu angka na mambaen na denggan tu hamu sajo do denggan dibaen hamu, aha ma he labomu disi? Halak pardosa pe malo do mambaen songon i!

³⁴Muda hum tu halak na tarbaen manggarar sajo do dipainjamkon hamu hepengmunu, aha ma he labomu disi? Halak pardosa pe dipainjamkon do hepengna tu angka pardosa, dung i ditunggu halahi mangulahi!

³⁵Anggo sapatutna nada songon i! Anggo hamu angkon suhar-suhar ni i do. Angkon haholonganmunu do musumunu jana baen hamu ma na denggan tu halahi. Angkon lehenonmunu do manginjam jana ulang pola arop rohamunu dapotan garar mangulahi. Godang do dapot hamu upa ni i jana gabe anak ni Debata Na Gumincat i ma hamu. Angke anggo Debata, denggan do dibaen Ia maradopkon angka na so malo mandok tarimakasi, songon i muse laing denggan do dibaen Debata maradopkon halak na jahat.

³⁶Gabe parasi roha ma hamu, laing songon Amangmunu na marasi roha i!”

³⁷“Ulang ma hamu manguhumi, anso ulang diuhumi Debata hamu muse. Ulang ma pasalahon halak, anso ulang dipasala hamu: Sesa ma, anso disesa hamu.

³⁸Lehen hamu ma tu halak na asing, anso laing dilehen Debata muse tu hamu; jagiton ni tanganmunu ma silehen-lehen maruse-use na dung nisuhat di hamu. Angke parsuhatan na nipakemunu tu halak na asing, laing i do parsuhatan na nipake tu hamu.”

³⁹Dung i dicaritohon Jesus ma tu halahi umpama on, “Tarbaen ma he na mapitung manogu na mapitung? Nada he madabu ma halahi na dua tu bagasan lubang?

⁴⁰Nada adong sisean na gumodang sian guruna. Tapi muda dung tammat marsiajar sisean i, na giot sarupa ma i dohot gurunia i.”

⁴¹“Biasi sai diparrohahon hamu silbak-silbak na di mata ni donganmu, hape na sabalok na di matamunu sandiri so diida hamu?

⁴²Bia ma pandokkonmu tu donganmu, ‘Santabi jolo dongan, anso hubuat na sansilbak na menek na di matami’, salang balok na godang na di matami sandiri so diida ho? O, pangalancap! Paruar ma jolo balok na godang na di matami sandiri, i pe anso tangkas diida ho laho mambuat na sansilbak na di mata ni donganmu.”

⁴³“Anggo hayu na denggan nada diparbatuhon i parbatu na so hasaya. Songon i muse hayu na jatjat nada diparbatuhon i parbatu na denggan.

⁴⁴Sude hayu, sian parbatuna do nitanda. Nada diputik halak gala-gala sian tadatada sanga pe anggur sian sihupi.

⁴⁵Sada halak na denggan sai pangalaho na denggan do ro sian i, i ma simpan-simpanan na adong di bagasan ate-ate na denggan. Tapi sada halak na jahat sai pangalaho na jat do ruar sian i, i ma simpan-simpanan na di bagasan ate-ate na jat i. Angke sanga aha na manggohi roha ni jolma di bagasan ate-atena, sai i do dipardokkoni.”

⁴⁶“Biasi dipio hamu Au, ‘Tuhan, Tuhan,’ hape so dioloi hamu na Hudok tu hamu?

⁴⁷Tu ise ma patudoson angka na ro tu Au jana na umbege hatangKu jana na patuluskonsa? Padiar ma Hupatuduhon tu hamu.

⁴⁸Songon na pajongjong bagas do i: Na mangkuar tano i bagas-bagas jana mambaen ojahanna di batu. Di na ro banjir ditondong aek magodang ma bagas i, nada tarunggalkon banjir bagas i, harana di ginjang ni ojahan na denggan do dipajongjong bagas i.

⁴⁹Tapi anggo halak na umbege hatangKi hape nada dipatulus ia, tudos ma halak sisongon i tu na pajongjong bagas di ginjang ni tano na so marojahan. Muda masa banjir manondong bagas i, nada pola maol unggal bagas i jana manigor ropuk do parsegona!”