Read Batak Angkola LUKAS 7 Bible Online

LUKAS 7 - Batak Angkola bible

LUKAS 7

¹Dung sidung didok Jesus hataNia sudena i tu halak na bahat i, kehe ma Ia tu Kapernaum.

²Adong ma disi sahalak tentara Rom na pangkat. Adong muse do sahalak naposonia jana holong sajo do rohania midasa. Jadi marnyae ma naposonia i jabat giot mate.

³Jadi dung dibege parpangkat i taringot tu Jesus, disuru ia ma angka hatobangon ni halak Jahudi mandapotkon Jesus laho mangidohon anso ro Jesus pamalumkon naposonia i.

⁴Ro ma halahi tu Jesus, gomos ma dipangido halahi pangurupion sian Ia, ninna ma, “Tama do urupanMu ia,

⁵harana dihaholongi ia do bangsonta jana madung dipajongjong ia bagas paribadatan di hami.”

⁶Jadi kehe ma Jesus rap dohot halahi. Di na marayak lalu Jesus tu bagas i, disuru parpangkat i ma angka dongannia mandapotkon Jesus mandok tuSia, “Ulang pola jabat loja Tuan i! Hurang tama do au dapotkonon ni Tuan i di bagasku.

⁷Hara ni i au pe nada tama ro manopotkon Tuan i, tapi hum sahata pe dokkon anso malum naposongki.

⁸Harana au sandiri pe tunduk do tu parenta ni atasan, songon i muse adong do di torungku angka soridadu na tunduk tu parentangku. Muda huparentahon tu sada soridadu, ‘Kehe!’ angkon kehe do: Jana muda hudok tu soridadu na asing, ‘Ro tuson!’ ia pe angkon ro do. Jana muda hudok tu naposongku, ‘Baen on!’ angkon dibaen ia i.”

⁹Homang ma roha ni Jesus umbege i. Ditailihon Ia ma tu halak na bahat i na mangihutkon Ia, ning Ia ma, “Na hebat do bayo on. Salang di halak Israel nada unjung dope marsuo Au tu haporsayaan na songon haporsayaan ni bayo on!”

¹⁰Jadi dung lalu angka na disuru i mulak tu bagas ni parpangkat i, madung malum naposo ni parpangkat i.

¹¹Nada sadia honok dung i,[3] kehe ma Jesus tu kota Nain. Dohot angka anak siseanNia, songon i muse dohot halak na bahat kehe rap dohot Ia.

¹²Di na lalu Jesus di horbangan ni kota i, adong ma halak na maroban sada na mate tu balian. Anak sasada ni na mabalu do na jumolo i. Bahat do marroan halak kota i mangudurkon ina na mabalu i.

¹³Dung diida Jesus anak boru i, gabe ibo ma rohaNia midasa ning Ia ma, “Ulang be sai tangis ho inang!”

¹⁴Dung i mangalangka ma Jesus saotik tu jolo manjama poti ni bangke i. Halak na maroban poti i pe gabe so ma halahi. Dung i didok Jesus ma, “O doli-doli, Au marsuru, ngot ma ho!”

¹⁵Ngot ma doli-doli na mate i, juguk ia mangkobari. Dung i dipasahat Jesus ma ia tu inangna i.

¹⁶Sude ma halak mabiar, dipuji halahi ma Debata. Ninna halahi, “Madung tarida sada panurirang na godang di tonga-tonganta! Madung ro Debata laho paluahon bangsoNia!”

¹⁷Tarbonggal ma barita taringot tu Jesus di sude Luat Judea dohot di luat na humaliang i.

¹⁸Dipaboa angka sisean ni si Johannes ma sude na masa i tu si Johannes. Gabe dipiohon si Johannes ma dua halak anak siseanNia i,

¹⁹disuru ia ma halahi kehe mandapotkon Tuhan Jesus laho manyapai, “Ho do ulaning na giot ro i sanga adong dope halak na asing sipainteonnami?”

²⁰Sisean ni si Johannes na dua i pe kehe ma mandapotkon Jesus, jana didok halahi ma, “Na nisuru ni si Johannes Pandidi do hami manopot Ho, giot manyapai, Ho dehe na giot ro i, sanga halak na asing dope sipainteonnami?”

²¹Jadi hatiha i topet ma Jesus pamalumkon bahat halak sian nyaena be. Dipaorot Jesus angka tondi na jahat, na mapitung pe gabe marnida dibaen Ia mangulahi.

²²Jadi dialusi Jesus ma suruan ni si Johannes i, ning Ia ma, “Kehe ma hamu, paboa hamu ma tu si Johannes sanga aha na niida dohot na nibegemunu: Marnida do angka na mapitung, mardalan na pangpangon, malum na huliton, marbinege na maingol, na dung mate mulak dipangolu jana Jamita Na Denggan dibaritahon tu angka na pogos.

²³Jana martua ma halak na so marganggu ni roha marnida Au!”

²⁴Dung kehe suruan ni si Johannes i gabe dipungka Jesus ma marcarito taringot tu si Johannes tu halak na bahat i. Didok Ia ma, “Na giot mangaligi aha dehe dibaen na kehe hamu mandapotkon si Johannes di halongonan? Arung na dumaol-daol na ni ombus ni alogo dehe?

²⁵Na mangaligi aha dehe hamu di balian i? Halak na marpakean na halus dehe? Anggo halak na marpakean na jeges dohot halak na mangolu marsonang-sonang di bagas godang ni raja do i.

²⁶Antong mangaligi aha do hamu umbaen na kehe hamu tu balian i? Sada panurirang do na niligimunu? Tutu, Hudok ma di hamu, na sumurung dope sian panurirang.

²⁷Angke taringot tusia adong do tarsurat, ‘Ida ma, suruonKu ma suruanKi patujoloMu, na pauli dalanMu.’ ”

²⁸“Ingot hamu ma on, sian sude halak na jungada mangolu di tano on, nada adong be na gumodang sian si Johannes Pandidi. Tapi halak na ummenek di bagasan Harajaan Ni Debata, gumodangan dope i sian si Johannes Pandidi.”

²⁹Sude halak na disi, na umbege na nidok ni Jesus i, dohot ma i angka sitagi pajak, dihaporsayai halahi do hatigoran ni Debata, harana madung dilehen halahi dirina dipandidihon si Johannes.

³⁰Tapi anggo halak Parise dohot angka Siboto Surat nada ra be halahi manjagit sangkap ni Debata tu halahi. Nada ra halahi dipandidihon si Johannes.

³¹Dung i mandok hata ma Jesus mangulahi. Ning Ia ma, “Tu aha ma ulaning Hupatudos halak na sasundut on? Tudos tu aha ma halahi?

³²Tudos tu angka dakdanak do halahi na juguk di onan jana na pio-pio tu donganna mandok, ‘Madung hami endehon ende ni na marbagas di hamu, hape so ra hamu manortori! Hami endehon pe ende ni na matean, hape so ra hamu tangis mangandungi!’

³³Ro ma si Johannes Pandidi — ia ma na puaso — jana na so minum anggur — hape didok hamu, ‘Na nisonggopan ni Sibolis do ia!’

³⁴Dung i ro ma Anak Ni Jolma i — mangan do Ia jana minum — gabe didok hamu, ‘Ligi ma jolo Ia, na songkal, parminum, dongan ni sitagi pajak jana dongan ni halak pardosa.’

³⁵Tapi diparhatutu sude halak na manjagitsa do hapistaran i.”

³⁶Adong ma sada halak Parise mangontang Jesus tu bagasnia. Kehe ma Jesus tu bagas ni halak Parise i jana juguk Ia jana mangan disi.

³⁷Adong muse do di kota i sada dadaboru pardosa. Jadi dung tarbege tusia ro Jesus jana topet mangan di bagas ni halak Parise, ro ma ia maroban sada galas pualam na marisi miak na huskus.

³⁸Jongjong ma ia di pudi ni Jesus di lambung patNa i, tangis ma ia disi, ditombur ia ma pat ni Jesus dohot ilunia, asa diapusi ia ma i dohot obukna, dung i diumma ia ma i jana diusehon ia ma miak na huskus i.

³⁹Dung diida halak Parise na mangontang Jesus i pangalaho i didok ia ma di bagasan rohania, “Sugari tutu panurirang Ia, tontu angkon diboto Ia do sanga ise satutuna dadaboru na manjama Ia i; tontu diboto Ia muse do ngolu ni dadaboru on, na mardosa sajo!”

⁴⁰Dung i ninna Jesus ma tu si Simon, “Adong na giot dohononKu tu ho Simon.” “Denggan, didok Guru i ma,” ning si Simon.

⁴¹Ninna Jesus ma, “Adong ma dua halak na marutang tu bayo parutangan. Na sada marutang ma tusia lima ratus hepeng perak, jana na sahalak nari lima pulu hepeng perak.

⁴²Nada targarar halahi na dua utang ni halahi i. Gabe disesa bayo parutangan i ma utang ni halahi na dua. Antong, ise ma sian halahi na dua na humolong rohana mida na painjamkon hepeng i?”

⁴³“Anggo ninna rohangku, bayo na umbahat i utangna!” ning si Simon mangalusi. “Tutu do na nidokmi,” ninna Jesus.

⁴⁴Dung i ditailihon Jesus ma tu dadaboru i, didok Ia ma tu si Simon, “Diida ho dehe anak boru on? Di na ro Au tu bagasmon, umpe adong aek diparade ho parbasuan ni patKu; hape anggo anak boru on madung dibasu ia patKu dohot ilu ni matania, jana dipahiang ia dohot obuknia.

⁴⁵Nada diumma ho Au, hape anggo anak boru on nada maradian ia mangummai patKu dung do ro Au tuson.

⁴⁶So adong dibaen ho miak tu ulungKu, hape anggo anak boru on miak na huskus do diusehon ia tu patKu.

⁴⁷Hudok ma di ho: Holong ni rohania na songon i godang na nipatuduhonnia, i ma tandana bahaso na dung disesa dosania na bahat i! Muda nisesa dosa ni sada halak jana otik sajo do dosania, laing otik muse do holong ni roha tarpatuduhon ia.”

⁴⁸Dung i didok Jesus ma tu dadaboru i, “Madung disesa sude dosami.”

⁴⁹Mamungka marsipandohonan ma angka halak na asing na dohot juguk mangan disi, “Ise dehe Indon jabat tarsesa Ia dosa?”

⁵⁰Tapi didok Jesus ma tu dadaboru i, “Haporsayaanmu do na paluahon ho, kehe ma ho di bagasan hahorasan!”