Read Batak Angkola LUKAS 9 Bible Online

LUKAS 9 - Batak Angkola bible

LUKAS 9

¹Dipiohon Jesus ma siseanNia sidua bolas halak i marlagut. Dilehen Ia ma gogo dohot kuaso tu halahi giot mangusir tondi na jahat dohot pamalum nyae.

²Dung i disuru Ia ma halahi anso kehe pasarkon barita taringot tu Harajaan Ni Debata dohot pamalumkon halak na marnyae.

³Jadi ninna Jesus ma tu halahi, “Ulang oban hamu sanga aha di pardalananmunu, sanga tungkot, sanga huncang, sanga sipanganon, sanga hepeng, sanga dua pakean pe.

⁴Jana muda dijagit do hamu di sada-sada bagas, tinggal ma hamu disi lopus tu na kehe hamu muse.

⁵Dung i, muda nada dijagit halak hamu, paspaskon hamu ma abuan na di patmunu i di na laho morot hamu sian kota i anso gabe tanda ma i laho paingotkon halahi.”

⁶Kehe ma halahi mangaliati angka huta laho manjamitahon Jamita Na Denggan, jana pamalum angka na marnyae.

⁷Dibege si Herodes, gubernur ni Galilea ma taringot tu sude na masa i, gabe sak ma rohania. Harana adong do halak na mandok, “Madung mulak mangolu si Johannes Pandidi!”

⁸Adong muse halak na asing mandok, madung tarida si Elia mangulahi. Na asing muse mandok, sahalak sian angka panurirang narobi madung mulak mangolu.

⁹Ning si Herodes ma, “Madung hugotap ulu ni si Johannes. Tapi ise do satutuna Indon? Madung bahat nian na hubege taringot tuSia.” Gabe diusahahon ia ma giot marnida Jesus.

¹⁰Mulak ma angka rasul ni Jesus i jana dicaritohon halahi ma tu Jesus sude na dung dikarejohon halahi. Dung i dioban Jesus ma halahi tu sada kota na margoar Betsaida.

¹¹Jadi di na tarboto pangalaho i di halak na bahat, diihutkon halahi ma Jesus. Dijagit Jesus ma halahi, lalu dihobarkon Ia ma taringot tu Harajaan Ni Debata tu halahi. Laing dipamalum Ia muse dope angka halak na marnyae.

¹²Jadi dung marayak borngin ari, ro ma siseanNia sidua bolas halak i tu Jesus jana didok halahi ma, “Suru ma halak na bahat i kehe, anso marsijalahi panganonna dohot parbornginanna be halahi di angka huta dohot pagaran na humaliang on. Angke inganan na lungun do on.”

¹³Didok Ia ma, “Nada, angkon lehenonmunu do halahi mangan.” Dialusi sisean ni Jesus sidua bolas halak i ma, “Hum limang kibung roti dohot dua ihan do na adong di hami; lobi sian i inda adong be. Asing ma rupani muda angkon kehe hami manobusi panganon di halak on sude!” (

¹⁴Adong do hira-hira lima ribu halaklahi disi.) Didok Jesus ma tu angka siseanNia i, “Suru hamu ma halahi juguk marsasapunguan, lima pulu halak sapunguan.”

¹⁵Dibaen sisean ni Jesus i ma songon na nidok ni Jesus i. Disuru halahi ma sude angka jolma i marjuguhan.

¹⁶Dibuat Jesus ma roti na lima i dohot ihan na dua i, ditatap Ia ma tu langit jana didok Ia ma tarimakasi tu Debata. Dibolai Ia ma dohot tanganNia roti i, songon i dohot ihan i, dung i dilehen Ia ma tu angka siseanNia i anso dibagihon tu halak na bahat i.

¹⁷Mangan ma halahi sude lopus butong be. Dung i dipalagut angka siseanNia i ma teba-teba na nitinggalkon ni halak na bahat i. Bubung ma dua bolas ampang sude.

¹⁸Di sada ari hatiha martangiang Jesus sada Ia, ro ma angka siseanNia mandapotkon Ia. Disapai Jesus ma tu halahi, “Ise dehe Au, didok halak?” ning Ia.

¹⁹Dialusi halahi ma, “Si Johannes Pandidi do Ho. Tapi adong muse do na mandok, si Elia do Ho. Laing adong muse dope na mandok, sahalak sian angka panurirang narobi na mulak mangolu do Ho.”

²⁰“Muda pandokmunu ise ma Au?” ning Jesus manyapai. Dialusi si Petrus ma, “Ho do Kristus i na sian Debata!”

²¹Dung i didok Jesus ma tu angka siseanNia i, “Ulang paboa-boa hamu sanga aha taringot tusi sanga na tu ise pe.

²²Anggo Anak Ni Jolma i, tutu do Ia angkon markancit jana dialo angka pamimpin dohot angka sintua ni malim, songon i angka Siboto Surat Jahudi. Dibunu ma Ia, tapi mulak mangolu do Ia di ari patoluhon.”

²³Dung i mandok hata ma Jesus tu halak na bahat i, ning Ia ma, “Sanga ise na giot mangihutkon Au, angkon porsoonnia do dirina, angkon porsanonnia ma hayu parsilangnia ganop ari, jana torus mangihutkon Au.

²⁴Harana agoan ngolu do sanga ise na giot mampartahankon ngoluna. Tapi halak na agoan ngolu hara ni Au, i do na dapotan ngolu.

²⁵Aha ma he gunana di halak, muda sude portibi on gabe nampunania, hape gabe hararugi jana mambaen mago ia sandiri?

²⁶Muda adong na maila hara ni Au jana maila hara ni pangajaranKu di adopan ni halak na asing, maila muse ma Anak Ni Jolma i mangokui halak sisongon i di haroroNia saulahon mardongan hasangapanNia, jana mardongan hasangapan ni Amangnia, songon i dohot hasangapan ni angka surusuruan na badia!

²⁷Na tutu do na Hudok on tu hamu: Adong do sian angka na jongjong dison na so mate anggo so jolo marnida Harajaan Ni Debata.”

²⁸Dung adong tar sapoken dung diajarkon Jesus taringot tusi, dioban Ia ma si Petrus, si Johannes dohot si Jakobus tu ginjang ni sada dolok laho martangiang.

²⁹Dompak na martangiang Jesus disi muba ma tompaNia jana pakeanNia gabe bontar marsinondang.

³⁰Ompot ma tarida dua halak mangkatai dohot Jesus, i ma si Musa dohot si Elia.

³¹Di bagasan hamuliaonna do halahi na dua mangkatai, i ma taringot tu parkeheNa, na giot patulusonNia di Jerusalem.

³²Sinok do modom anggo si Petrus dohot angka dongannia. Jadi dung tarsunggul halahi, diida halahi ma hasangapan ni Jesus dohot bayo sidua halak i na jongjong dohot Ia.

³³Dung i di na laho kehe sidua halak i maninggalkon Jesus, didok si Petrus ma tu Jesus, “Gurunami, sonangna i hita dison! Hami baen ma tolu undung-undung; sada di Ho sada di si Musa jana sada nari di si Elia.” (Nada diboto si Petrus sanga aha na nidoknia i.)

³⁴Dompak na mangkatai songon i dope si Petrus, tarida ma ro ombun na mangalinggomi si Petrus, si Johannes dohot si Jakobus. Santak biar ni halahi di na nilinggoman ni ombun i halahi.

³⁵Dung i tarbege ma sian ombun i sada sora na mandok, “On ma AnakKu na Hutodo i. Tangihon ma Ia!”

³⁶Jadi, di na tarbege sora i, hum sasada Jesus do tarida. Dipahohom angka anak sisean i ma i, nada dipaboa halahi dompahi tu barang ise pe na niida ni halahi. Dipahohom halahi do taringot tusi.

³⁷Dung torang ari manuat ma halahi sian dolok i, marroan muse ma halak na bahat mandapotkon Jesus.

³⁸Adong ma sian tonga-tonga ni halak na bahat i sada bayo na marsurahi, mandok, “O Guru, tolong ma jolo ligi dakdanakku, angke hum sasada i do anakku!

³⁹Adong do begu manggosa ia, gabe sai ompot ma mangangguhi, martoltolan ma pamatangna i lopus margubo-gubo pamanganna i. Hancit dihilala ia. Nada ra morot begu i sian anakki!

⁴⁰Madung nian hupangido anso diusir anak siseanMi begu i, tapi nada tolap halahi.”

⁴¹Dialusi Jesus ma, “O, hamu angka pomparan na so porsaya jana na lilu! Olat ni andigan pe angkon rap Au dohot hamu jana sai sobar tu hamu? Oban ma tuson anakmi!”

⁴²Jadi hatiha mardalan dakdanak i laho mandapotkon Jesus, digosa setan i ma ia, dung i martoltolan ma pamatangna i. Tapi disonggak Jesus ma begu i jana dipamalum Ia ma dakdanak i. Dung i dipasahat ma dakdanak i mangulahi tu amangna i.

⁴³Homang-komang ma sude halak marnida kuaso ni Debata na songon i godangna. Jadi hatiha homang-komang dope halahi marnida sude na nibaen ni Jesus i, didok Jesus ma tu angka siseanNia i,

⁴⁴“Tangkas ma parrohahon hamu na Hudok on: Pasahaton ma Anak Ni Jolma i tu kuaso ni jolma.”

⁴⁵Nada diastui halahi i sanga aha maksud ni Jesus. Nian na dirahasiahon do tu halahi taringot tusi umbaen na so diastui halahi maksudna. Tapi halahi pe mabiar laho manyapaisa tu Jesus.

⁴⁶Masa ma partongkaran di sisean ni Jesus taringot tu sanga ise na gumodang sian halahi.

⁴⁷Diboto Jesus do pikiran ni halahi, jadi dipiohon Ia ma sada dakdanak, dipajongjong Ia ma di lambungNia.

⁴⁸Dung i didok Ia ma tu halahi, “Sanga ise na manjagit dakdanak on hara ni Au, dos do i dohot na manjagit Au. Dung i, sanga ise na manjagit Au, sarupa do i na manjagit na marsuru Au muse. Angke sanga ise na ummenek sian hamu, ia do na gumodang!”

⁴⁹Didok si Johannes ma, “Hami ida adong halak na mangusir setan mamake goarMu, dung i hami antahi anso ulang didatdati ia, harana nada donganta ia.”

⁵⁰Didok Jesus ma, “Ulang antahi hamu halahi, angke halak na so mangalo hamu, na mamihak tu hamu do i.”

⁵¹Dung donok hatihana giot manaek Jesus tu banua ginjang, diadopkon Ia ma bohiNia tu Jerusalem laho kehe tusi.

⁵²Dung i disuru Ia ma angka suruan di joloNia, jadi dung kehe halahi, bolkas ma halahi tu sada huta ni halak Samaria laho mangkobasi sandok na porlu di Jesus.

⁵³Tapi nada ra halak huta i manjagit Jesus, hara ni na giot tu Jerusalem do Ia.

⁵⁴Jadi dung diboto angka sisean ni Jesus, i ma si Jakobus dohot si Johannes pangalaho na songon i, gabe didok halahi ma, “Bia do Tuhan, ra do Ho muda hami pangido anso madabu api sian langit manyurbu sude halak na sahuta on?”[7]

⁵⁵Ditailihon Jesus ma tu pudi, dimuruhi Ia ma halahi.[8]

⁵⁶Dung i gabe tu huta na asing ma halahi kehe.

⁵⁷Dompak na patoruskon sidalanan i Jesus dohot angka siseanNia i, adong ma sada halak na mandok tu Jesus. “Ihutkononku do Guru i, sanga tu dia pe kehe Guru i!”

⁵⁸Dialusi Jesus ma, “Marliang do sorigala, unggas pe adong do asarna, tapi anggo Anak Ni Jolma i, nada adong inganan hapayahan ni uluNa.”

⁵⁹Dung i didok Jesus ma muse tu sada bayo na asing, “Ihutkon ma Au.” Tapi didok bayo i ma, “Paloas ma au jolo mulak, laho mananom damang.”

⁶⁰Dialusi Jesus ma, “Padiar ma halak na mate mananom na matena sandiri. Tapi anggo ho, kehe ma ho pararatkon Harajaan Ni Debata.”

⁶¹Adong muse ma sahalak na asing mandok, “Au pe ra do mangihutkon Tuan i, tapi paloas ma jolo au markata partinggal tu dongan sabagasku.”

⁶²Tapi didok Jesus ma: “Halak na mangaluku, tapi huhut mangaligi tu pudi nada patut ia tu Harajaan Ni Debata.”