Read Batak Angkola PANGARATAION 12 Bible Online

PANGARATAION 12 - Batak Angkola bible

PANGARATAION 12

¹“Angka on ma aturan na angkon sioloanmunu salolot mangolu hamu di tano na giot silehenon ni TUHAN di hamu, i ma Debata na nisomba ni ompumunu. Parate-atehon hamu ma angka aturan i!

²Muda dung masuk hamu tu luat i, angkon roncohononmunu do angka inganan pamelean, inganan ni bangso na maringanan disi mamele angka debata ni halahi di ginjang ni angka dolok na timbo, di angka tor, dohot di toru ni angka hayu na rumbun.

³Parrumpakkon hamu ma angka langgatan ni halahi jana ropuhi hamu angka tiang batu na nietong ni halahi keramat. Tutungi hamu ma angka na manggambarkon Asera debata ni halahi jana sarsarkon hamu ma angka patung ni halahi, lopus nada tarbaen be marsomba tu barang-barang i di inganan i.

⁴Muda marsomba hamu tu TUHAN Debatamunu i, ulang tiru-tiru hamu pambaen ni halahi di na mamele angka debata ni halahi.

⁵Sian sude luat na masuk tu angka marga ni Israel, pilion ni TUHAN ma sada inganan maribadat di bangsonta anso tarbaen hita ro tu adopan ni TUHAN laho manyomba Ia.

⁶Angkon tu inganan i ma obanonmunu angka haul situtungon dohot angka haul na asing, haul parsampuluan maradu angka haul na asing, haul panggarar ni haulmu haul sian na nionjar ni rohamunu dohot lombu sanga biri-biri na parjolo sorang.

⁷Laing di inganan i muse, di adopan ni TUHAN Debatamunu na dung mamasumasu hamu, hamu rap dohot dongan sabagasmunu, disi ma mangan mandai rasoki sian pandapotan ni karejomunu.

⁸Muda dung dapot hatiha i, ulang be baen hamu songon na saonnari. Lopus saonnari sude hamu marroha-roha dope na maribadat i,

⁹dibaen nada masuk dope hamu tu tano na giot silehenon ni TUHAN Debatamunu tu hamu, i ma ingananmunu, disi ma tarbaen hamu mangolu di bagasan sonang.

¹⁰Dung ditaripari hamu Batang aek Jordan, urupan ni TUHAN ma hamu mambuat dohot mangingani tano na di bariba ni batang aek i. OndihononNia do hamu sian sasude musumunu, jana di bagasan sonang ma hamu mangolu.

¹¹Angkon tusi ma hamu kehe maroban sude na dung huparentahon: Haul situtungon dohot haul na asing, haul parsampuluan dohot haul na marhapunjungan na dung nijanjihonmunu tu TUHAN.

¹²Sai marjop ni roha ma hamu di inganan i, di adopan ni TUHAN, rap dohot angka dakdanakmunu, angka naposomunu dohot angka halak Levi na maringanan di hutamunu, dibaen nada dapot bagian angka halak Levi di tanomunu i.

¹³Nada tola obanonmunu haulmunu tu sandok inganan na nipilimunu sandiri,

¹⁴tapi haulkon hamu ma di sada inganan sajo na ditontuhon ni TUHAN di luat ni sada sian margamunu. Hum tusi sajo do tola obanonmunu haul situtungon dohot patuluskon angka na asing na huparentahon tu hamu.

¹⁵Tapi anggo manyambol pahan-pahananmunu hamu dohot mangankon juhutna i tola do sanga na di dia ingananmunu. Tola do panganonmunu sabahat ni na nilehen ni TUHAN di hamu. Hamu sude, na ias dohot na so ias mangihutkon aturan ni ugamo, tola do mangankon juhut i, tudos songon na mangankon juhut ni hije sanga ursa.

¹⁶Tapi anggo mudar ni binatang i ulang cubo-cubo hamu mangankonsa; tapi angkon diduruskon do i tu tano songon aek.

¹⁷Nada tola sanga na aha pe panganonmunu di bagas ingananmunu sian sude na nihaulkonmunu tu TUHAN: Haul parsampuluan sian gandummunu, anggurmunu, miak zetunmunu, lombu sanga biri-birimunu na parjolo sorang, haul panggarar ni haulmunu, haul sian na nionjar ni rohamunu, sanga hasil na asing pe.

¹⁸Hamu dohot angka dakdanakmunu, rap dohot angka naposomunu dohot angka halak Levi na maringanan di angka hutamunu, angkon di adopan ni TUHAN Debatamunu sajo panganonmunu angka haul i, i ma di inganan paribadatan na sada i na nitontuhon ni TUHAN Debatamunu. Jana angkon marjop ni roha do hamu di inganan i hara ni sude usahomunu.

¹⁹Denggan ma jagohon hamu anso ulang jabat tarlalap hamu tu horong Levi salolot mangolu hamu di tano i.

²⁰Muda dipabidang TUHAN Debatamunu parbalohan ni tanomunu i songon na nijanjihonNa i, tola ma hamu mangan juhut, sanga andigan giotmunu.

²¹Muda madao tu umpamana inganan paribadatan na sada i, tola ma hamu sanga na sadihari manyambol sada sian lombu sanga biri-biri na dung dilehen ni TUHAN di hamu, jana juhutna i pe tola ma panganonmunu di bagas, songon na dung hudok tu hamu.

²²Ganop halak, na ias sanga na so ias mangihutkon aturan ni ugamo, tola do mangankon juhut, tudos tu na mangankon juhut ni hije sanga ursa.

²³Hum juhut na laing marmudar do na so tola panganonmunu, angke di mudar i do hosa, jadi nada tola hamu mangankon ngolu i rap dohot juhutna.

²⁴Ulang cubo-cubo hamu mangankon mudar, tapi duruskon hamu ma i tu tano songon aek.

²⁵Muda dioloi hamu parenta i, sonang ma roha ni TUHAN jana sonang ma hamu dohot pomparanmunu.

²⁶Sude haul na dung dijanjihon hamu tu TUHAN, angkon obanonmunu do tu inganan paribadatan na sada i.

²⁷Angka haul na abis ditutung dohot angka haul na nipangan juhutna, angkon haulkononmunu do i di ginjang ni langgatan ni TUHAN jana mudarna i niduruskon tu ginjang ni langgatan i.

²⁸Muda dihaburjuhon hamu ma patuluskon sudena i na dung huparentahon tu hamu, gabe na patulus na denggan ma hamu na tumbuk di TUHAN Debatamunu, jana gabe sonang ma hamu rap dohot pomparanmunu ro di salolot-lolotna.”

²⁹“Di na mamorangi luat i hamu, abiskonon ni TUHAN Debatamunu i ma angka bangso na maringanan disi, gabe tarbuat hamu ma luat i jana taringani hamu.

³⁰Dung diabiskon TUHAN angka bangso i, angkon jamot-jamot do hamu. Ulang cubo-cubo hamu manangkas-nangkasi pambaen ni halahi manyomba debata ni halahi dohot maksud laho maniru halahi. Ulang ale! Mangalapi hamatean do pangalaho na songon i!

³¹Ulang cubo-cubo hamu maniru pambaen ni halahi marsomba tu angka debata ni halahi laho manyomba TUHAN Debatamunu, angke dompak marsomba, dipatupa halahi do angka pangalaho na jorbut na nihagigihon ni TUHAN. Salang angka dakdanak ni halahi sandiri pe antong ditutung halahi do di ginjang ni langgatan gabe songon haul tu angka debata ni halahi i.

³²Sai patulus hamu ma sandok na dung huparentahon tu hamu; ulang tambai sanga urahi hamu saotik pe.