Read Batak Angkola PANGARATAION 13 Bible Online

PANGARATAION 13 - Batak Angkola bible

PANGARATAION 13

¹Ampot adong sada panurirang sanga sada halak na sai tagi patorangkon nipi manjanjihon tanda hahomangan

²na martujuan anso marsomba hamu sanga mangoloi tu angka debata na so nisombamunu humani hatiha na salpu, haru pe tutu-situtu tarjadi na nijanjihonnia i,

³ulang ma lehen hamu saotik pe rohamunu tusi. Na nipake ni TUHAN Debatamunu do halakna i laho manguji hamu laho marnida sanga na tutu situtu do sian sandok roha dihaholongi hamu TUHAN.

⁴Angkon mate do halak na songon i, uhumonmunu, angke na giot mangaliluhon hamu do halakna i sian dalan na niparentahon ni TUHAN tu hamu. Halak na jahat do i na marsuru hamu mangalo tu TUHAN na dung paluahon hamu sian Mesir, ingananmunu di parhatobanan. Jadi angkon bunuon do i anso mago hajahatan i. Tapi angkon ihutkononmunu do TUHAN jana pasangaponmunu; oloi hamu ma Ia jana patulus hamu sude na niparentahonNia. Sai hot ma hamu tongtong marpangoloion jana burju tuSia.

⁶Ompot kahanggimu, sanga anakmu sanga borumu, sanga dongan saripe haholonganmu, sanga ale-alemu di na sip-sip mangelek-elek ho anso marsomba tu angka debata na asing, i ma tu angka debata na so jungada hian dope disomba ho dohot ompumunu,

⁷angka debata ni bangso-bangso na donok dohot na dao,

⁸ulang tangihon i jana ulang padiar dirimu dielek-eleksa. Ulang ibo rohamu di halak sisongon i sanga diondihon ho,

⁹tapi angkon bunuonmu do i. Angkon ho do parjolo mandanggurkon batu tusi, jana suru muse ma dongan na asing mambaen songon i.

¹⁰Angkon nidangguran do parsala i dohot batu lopus mate! Na giot padaoonnia ma hamu antong sian TUHAN Debatamunu na paluahon bangso on sian parhatobanan na di Mesir.

¹¹Jadi gabe habegean ma taringot tu na masa i di sude bangso Israel; mabiar ma halahi gabe nada adong sahalak pe na puluk be mambaen na songon i jahatna.

¹²Muda sanoli on diingani hamu angka kota na nilehen ni TUHAN Debatamunu i di hamu, ra do sar barita

¹³mandok adong piga-piga halak na jahat sian bangsomunu na mangaliluhon halak pangisi ni hutana i laho marsomba angka debata na so nisombamunu hian dope na saidanna i.

¹⁴Muda adong habegean hata-hata na songon i, angkon sihir do tangkasanmunu. Muda tutu do tarjadi hajahatan na songon i antong,

¹⁵angkon bunuon do sude halak kota i rap dohot sude pahan-pahanan ni halahi. Angkon nironcohon sude kotana i.

¹⁶Angkon palaguton sude sinadongan ni halak kota i, jana dipagukguk di tonga ni alamanna i, lalu disurbu ma sude kota i dohot sasude na di bagasanna songon haul tu TUHAN Debatamunu. Dung sidung i sudena angkon tinggalkonon do i songon lobu jana nada tola be ulahan mambangunsa.

¹⁷Nada tola simpanonmunu di hamu anggo barang na hona bura, tapi angkon roncohononmunu do i. Jadi gabe mombun ma rimas ni TUHAN jana patuduhononNia ma ibo ni rohaNia tu hamu. Basa ma rohaNia tu hamu jana baenonNia ma hamu gabe bangso na godang, songon na nijanjihonNia tu ompumunu,

¹⁸asalkon ma dioloi hamu sude parentaNia na hulehen tu hamu di ari sadari on, jana dipatulus hamu sandok hagiotNia.”