Read Batak Angkola PANGARATAION 16 Bible Online

PANGARATAION 16 - Batak Angkola bible

PANGARATAION 16

¹“Pagodang hamu ma Pesta Paskah di bulan Abib laho pasangap TUHAN Debatamunu, angke di bulan i do antong, taran borngin-borngin dipalua TUHAN hamu sian Mesir.

²Kehe ma hamu tu inganan paribadatan i laho manyambol sada sian biri-biri sanga lombumunu gabe panganon Paskah laho pasangapkon TUHAN Debatamunu.

³Ulang pangan rap dohot roti na marragi panganon Paskah i. Pitu ari lolotna hamu angkon mangankon roti na so marragi, laing songon di na morot hamu sian tano Mesir maradu mopop. Pangan hamu ma roti i — na margoar roti pardangolan — anso salolot mangolu diingot hamu ari i di na morot hamu sian Mesir, ingananmunu diparhatoban.

⁴Pitu ari lolotna di sude luat na niingananmunu sahalak pe nada tola manyimpan ragi di bagasna. Juhut ni pahan-pahanan na nisambol di borngin ni ari parjolo, angkon laing di borngin i do i panganon.

⁵Angka pahan-pahanan na nipake tu Pesta Paskah i angkon disambol di inganan paribadatan na sada i do i jana nada tola di inganan na asing di sandok tano na giot silehenon ni TUHAN di hamu. Angkon patupaonmunu ma i di halulusut ni mataniari, laing songon di hatiha na manadingkon Mesir hamu.

⁷Angkon bolgangon do juhut ni pahan-pahanan i, jana angkon di inganan paribadatan i do i panganon, jana ancogotna i angkon mulak hamu.

⁸Na onom ari na mangihut i, angkon roti na so marragi do panganonmunu. Di ari papituhon angkon marlagut do hamu laho manyomba TUHAN Debatamunu. Ulang ma markarejo anggo di ari i.”

⁹“Sian ari parjolo hamu mamungka manyabi gandum, etong hamu ma pitu minggu,

¹⁰dung i pestahon hamu ma Pesta Gotilon laho pasangapkon TUHAN Debatamunu. Oban hamu ma di ari i haul sian na nionjar ni roha tuSia marguru tu bahat ni rasoki na nilehenNia di hamu.

¹¹Marjop ni roha ma hamu di adopan ni TUHAN, di inganan paribadatan na sada i, rap dohot angka dakdanakmunu, angka naposomunu dohot halak Levi, halak na asing, na so marama dohot angka na mabalu na tinggal di hutamunu.

¹²Sian situtu ni rohamunu ma oloi hamu angka parenta i, ulang hamu lupa na hatoban hamu najolo di Mesir.”

¹³“Dung sidung sude diduda gandummunu i, jana batu ni anggurmunu abis diporo, pestahononmunu do Pesta Undung-undung Bulung Rata pitu ari honokna.

¹⁴Marmoga-moga ma hamu rap dohot angka dakdanakmunu, angka hatobanmunu, halak Levi, halak sileban, dakdanak na so marama dohot angka na mabalu na maringanan di hutamunu.

¹⁵Pitu ari honokna angkon hagodangkononmunu pesta on laho pasangapkon TUHAN di inganan paribadatan na sada i. Marjop ni roha ma hamu hara ni na nipasupasu ni TUHAN panen dohot karejomunu.

¹⁶Angkon ro do sude halaklahi ni Israel manyomba TUHAN di inganan paribadatan na sada i tolu noli sataon: Di Ari Pesta Paskah, Pesta Gotilon dohot di Pesta Undung-undung Bulung Rata. Angkon ganop be marsioban haulna,

¹⁷marguru tu gogona be, hombar tu bahat ni rasoki na nilehen ni TUHAN Debatamunu tu sada-sada be.”

¹⁸“Di ganop kota na nilehen ni TUHAN Debatamunu tu hamu angkon angkatonmunu do panguhum dohot angka parkarejo na asing laho manguhumi rayat i di bagasan na sintong.

¹⁹Di na mambuat haputusan, nada tola halahi mambaen roha-rohana sanga na teleng sabola. Nada tola muse halahi manjagit sisip angke mambaen mapitung do angka silua, bope di halak na bisuk dohot na tigor, lopus gabe dibaen halahi haputusan na sala.

²⁰Sai tongtong ma hamu tigor, anso tarbuat jana taringani hamu salolot-lolotna tano na giot silehenon ni TUHAN i di hamu.

²¹Muda mambaen sada langgatan hamu di TUHAN Debatamunu, ulang baen hamu di lambungna i patung hayu ni Debata Asera,

²²jana ulang pajongjong hamu muse tiang batu laho mamele debata na asing, dibaen magigi do TUHAN di pangalaho i.