Read Batak Angkola PANGARATAION 19 Bible Online

PANGARATAION 19 - Batak Angkola bible

PANGARATAION 19

¹“Dung diabisi TUHAN Debatamunu angka bangso i jana dilehen tu hamu tano i, gabe pambuatanmunu ma angka kotana i dohot angka bagas ni halahi lalu maringanan hamu disi,

²angkon bagi toluonmunu do luat i,

³ganup bagian adong be sada kota haporusan na momo topoton anso sanga ise na mamunu tola kehe tusi.

⁴Muda adong sada halak na so sangajo mamunu halak na asing na so musuna, tarbaensa ma paluahon dirina maporus tu sada sian kota i laho manjalahi parlindungan.

⁵Rupani, adong ma dua halak na rap kehe tu harangan martaba hayu. Di na martaba na sahalak, taldus ma mata ni patonia i sian suhulna i jana hona tu na sahalak nari gabe mate. Jadi tarbaen na mamunu sian na so sangajo i ma marlojong tu sada sian kota haporusan na tolu i anso malua ia.

⁶Sugari sura hum sada kota sajo, betak madaotu antarana i tusi, gabe sanga koum sisolkot na martanggung jawab laho mamalos parmatena i ro mangkojarsa jana di hatiha parpiar ni murukna dibunusa halak na so marsala i. Hape nian nada na sangajo ia mamunu halak na so musunia i hian.

⁷I ma dalanna umbaen na huparentahon hamu laho paindingkon tolu kota.

⁸Muda dipabidang TUHAN Debatamu luatmunu i songon na dung dijanjihonNia i tu ompumunu, jana dung dilehen tu hamu sude luat i,

⁹jadi angkon laing pilionmunu dope tolu nari kota haporusan. (Lehenon do tano i di hamu muda dipatulus hamu sandok na dung huparentahon tu hamu di ari sadari on, jana muda dihaholongi hamu TUHAN Debatamunu jana ngolumunu mangihutkon pangajaranNia.)

¹⁰Patulus hamu ma on anso ulang mardosa hamu hara ni na mandabu uhum hamatean tu halak na so marsala di tano na giot silehenon ni TUHAN tu hamu.

¹¹Tapi adong ma umpamana sada halak na mangadang musuna jana sangajo dibunu ia, lalu dilojongi ia tu sada sian kota i laho manjalahi parlindungan.

¹²Di bagasan pangalaho sisongon i, angkon pioon ni pamimpin ni kota do halakna i laho pasahatkonsa tu koum sisolkotna na martanggung jawab laho mamaloskon pamunuon i, anso bolas ia mate niuhuman.

¹³Ulang dibaen ibo ni roha tusia. Palua hamu ma Israel sian sibunu jolma i, anso sonang hamu.”

¹⁴“Muda dung lalu hamu di tano na giot silehenon ni TUHAN Debatamunu i di hamu, ulang paimbar hamu angka tanda ni parbalohan tu hombarmunu na ditontuhon narobi.”

¹⁵“Nada tuk sada halak sajo saksi laho patorangkon sada halak na hona tuhas marsala, na ummotikna dua saksi porlu di pangalaho i.

¹⁶Muda adong sada halak na giot mandabuhon halak marhite hata na dipatubu-tubu, jadi

¹⁷angkon kehe halahi na dua tu inganan paribadatan na dung ditontuhon TUHAN anso ditimbang angka malim dohot panguhum na topet markarejo di hatiha i.

¹⁸Angkon tangkasan ni panguhum torang parkaro i, jana muda tutu do antong halakna i patubu-tubu hata na so tutu tu donganna na rap Israel,

¹⁹angkon daion ni halakna i ma uhuman na patut sihonahonon tu na dipasala i. Songon i ma baenonmunu laho mangantak hajahatan i.

²⁰Begeon ni ganop halak ma na masa i jana gabe mabiar be ma. Jadi gabe nada adong be halak na puluk mambaen hajahatan na songon i.

²¹Di angka parkaro sisongon i, ulang baen hamu ibo ni roha. Angka songon on ma uhumanna: Hosa gonti ni hosa, mata gonti ni mata, ipon gonti ni ipon, tangan gonti ni tangan, jana pat gonti ni pat.”