Read Batak Angkola PANGARATAION 23 Bible Online

PANGARATAION 23 - Batak Angkola bible

PANGARATAION 23

¹“Angka halaklahi na dung dikasing sanga na digotap dongan magodangna i nada tola gabe anggota ni bangso ni TUHAN.

²Halak na sorang sian na marbagas roha-roha, dohot sude pomparanna lopus tu sundut pasampuluhon, nada tola gabe anggota ni bangso ni TUHAN.

³Angka halak Amon dohot Moab maradu pomparan ni halahi lopus tu sundut pasampuluhon nada tola gabe anggota ni bangso ni TUHAN.

⁴Dalanna, i ma hara ni na so ra halahi mangalehen sipanganon dohot siinumon di hamu dompak na mardalan hamu haruar sian Mesir. Diongkosi halahi dope gari ada si Bileam, anak ni si Beor na sian kota Petor na di Mesopotamia laho mamurai hamu.

⁵Hape nada ra TUHAN Debatamunu manangihon si Bileam. Mur dipabalik TUHAN noma bura i gabe pasupasu, hara ni holong ni rohaNia di hamu.

⁶Salolot marrumangkon sada bangso hamu, ulang dicubo-cubo hamu mangurupi angka bangso i sanga mambaen sonang halahi.

⁷Ulang pabile hamu halak Edom, dibaen kahanggimunu do halahi. Jana ulang muse layas rohamunu mida halak Mesir, dibaen jungada do hamu maringanan di tano ni halahi.

⁸Mamungka sian sundut patoluhon dohot sundut na mangihut sian pomparan ni halahi tola do gabe anggota ni bangso ni TUHAN.”

⁹“Muda tinggal di parbandaran hamu di hamamasa ni porang, angkon pasidingonmunu do sandok na mambaen hamu gabe so ias.

¹⁰Muda gabe hodar sada halaklahi hara ni na marnipi na pahodar saraor taran borngin-borngin, angkon haruar do ia sian bandar i jana tinggal ia di ruar.

¹¹Marayak andospotang angkon mangias diri do ia jana di halulusut ni mataniari, tola ma ia mulak tu bandar i.

¹²Angkon baenonmunu do inganan tu aek na menek di ruar ni bandar i.

¹³Oban hamu ma sada tungkot na gabe sada bagian sian haporluanmunu baen panghuar ni lubang muda giot tu aek na godang dohot panutupina mangulahi.

¹⁴Jagohon hamu anso tong-tong ias bandarmunu i, dibaen didongani TUHAN Debatamunu do hamu di bandarmunu i laho mangondihon hamu dohot mangalehen hamonangan di hamu maralohon musumunu. Ulang ma baen hamu pangalaho na so tama na mambaen marbalik TUHAN sian hamu.”

¹⁵“Muda adong sada hatoban na lari sian tuanna jana ro tu hamu mangido parlindungan, ulang suru hamu ia mulak.

¹⁶Tola do i tinggal di sada sian hutamunu marguru tu na nipilinia, jana nada tola pajolo gogo hamu tusi.

¹⁷Nada tola sada halak Israel, halaklahi sanga dadaboru na gabe panggampang di bagas pamelean ni angka debata na asing.

¹⁸Songon i hepeng na dapot sian dalan na songon i, nada tola obanon tu Bagas Ni TUHAN Debatamunu baen panggarar ni haul bagi aha, angke magigi do TUHAN tu angka panggampang di bagas pamelean ni angka debata na asing i.

¹⁹Muda painjamkon sanga panganon, sanga barang na asing ho tu donganmu sabangso, nada maranak baenonmu painjamkon i.

²⁰Tapi tola do pangidoonmu anak ni sanga aha na nipainjamkonmu tu halak sileban. Oloi ma parenta on, dung i pasupasuon ni TUHAN Debatamu ma sanga aha na nibaenmu di tano na giot sibuatonmi.

²¹Muda dijanjihon hamu sanga na aha tu TUHAN Debatamunu, ulang ma palambat-lambat laho patuluskon sanga aha na nijanjihonmi, angke torus do i ditunggu TUHAN, jana mardosa do hamu muda nada digohi hamunu i.

²²Nada mardosa hamu muda nada mambaen janji hamu tu TUHAN,

²³tapi muda sian na nionjar ni rohamunu do hamu mambaen janji, angkon patulusonmunu do i.

²⁴Muda mardalan hamu mamolus di kobun anggur ni halak, tola do papangananmunu batu ni anggurna i sanga sadia giotmunu, tapi nada tola palagutkon tu hadanganmunu.

²⁵Muda mardalan hamu mamolus di ladang ni gandum ni halak, tola do panganonmunu gandum i sabahat ni na tarrurus hamu dohot tanganmunu tapi ulang buat hamu gandum i saotik pe mamake sasabi.”