Read Batak Angkola PANGARATAION 24 Bible Online

PANGARATAION 24 - Batak Angkola bible

PANGARATAION 24

¹“Marbagas ma umpamana sada halaklahi dohot sada dadaboru, dung di pudian ni ari nada giot bayo i be anak boru i angke sala dadaboru i hara ni pangalahona na pailahon. Dung i dibaen bayo i ma surat sirang, dipasahat ia ma i tu anak boru i jana disuru ia kehe sian bagasnia i.

²Dung i marbagas muse ma anak boru i dohot sada bayo na asing,

³tapi bayo i pe nada giot ia muse be mamake anak boru i jana dibaen ia muse ma surat sirang jana dipasahat ia ma i tu anak boru i lalu disuru ia morot sian bagasnia i. Sanga mate ma umpamana halaklahinia na paduahon i.

⁴Di na dua pangalaho on, nada tola halaklahinia na parjolo i mambuat ia mangulahi; angkon songon dadaboru na dung dipahodar do i idaonnia. Muda laing dipake ia dope i mangulahi, i ma sada pangalaho na pabilehon TUHAN. Nada tola baenonmunu dosa na songon i jahatna di tano na giot silehenon ni TUHAN i tu hamu.”

⁵“Muda adong sada bayo na baru mambuat boru, nada tola i suruon masuk dinas tentara sanga karejo umum na asing. Angkon bebas do ia sian karejo sataon lolotna, anso tarbaen ia tinggal di bagas dohot pajopkon roha ni dadaborunia i.

⁶Muda painjamkon sanga aha hamu tu halak, ulang buat hamu batu panggilingan na nipakenia manggiling gandumnia gabe songon jaminan. Muda dibuat hamu batu i, na mangarampas do hamu di parkokas na nipakenia laho paradehon sipanganon anso laing mangolu ia.

⁷Muda adong sada halak na manangko sanga ise dongan sabangsona, lalu dibaen ia gabe hatobanna sanga digadis ia songon hatoban, angkon mate niuhuman do sitangko jolma i. Songon i ma dalanna baenonmunu laho mangagohon hajahatan i sian tonga-tongamunu.

⁸Muda hona nyae kusta na marbahaya hamu, angkon tangkas sajo do patulusonmunu sanga aha na niparentahon ni Malim Levi tu hamu; ihutkon hamu ma angka sipaingot na dung hulehen tu halahi.

⁹Ingot hamu ma sanga aha na nibaen ni TUHAN Debatamunu tu si Miryam di na ro hamu sian Mesir.

¹⁰Muda painjamkon sanga na aha hamu tu halak, ulang pola masuk hamu tu bagasna i laho mambuat pakean na giot lehenonnia tu hamu gabe songon jaminanna.

¹¹Painte ma di ruar jana padiar ia sandiri mangalehen tu hamu.

¹²Muda pogos do halakna i, nada tola jabat marborngin pakean i di bagasmu,

¹³tapi angkon paulahonmu do i tusia ganop borngin, anso tarpake ia pakean i modom. Jadi gabe mandok tarimakasi ma ia jana lomo ma roha ni TUHAN Debatamu tu hamu.

¹⁴Ulang kicu hamu halak pangomo na pogos jana na hurangan, sanga na halak Israel pe i sanga na halak sileban na maringanan di sada sian hutamunu i.

¹⁵Ganop ari painte so lusut mataniari, angkon gararonmunu do gajina na markarejo sadari i, sai arop do rohania anso dapot ia antong hepeng i hara ni porluna i disia. Muda nada digarar hamu upana i, pio-pio ma ia tu TUHAN mangaduhon hamu jana torang ma hamu mardosa dokkononna.

¹⁶Ulang bunu hamu simatobang hara ni hajahatan na nibaen ni angka dakdanakna; jana ulang bunu hamu dakdanak hara ni hajahatan ni simatobangna. Hum hara ni hajahatan na nibaenna sandiri do anso tola niuhuman sada-sada halak.

¹⁷Ulang rampas hamu hak ni halak sileban dohot dakdanak na so marama, jana ulang buat hamu gabe jaminan pakean ni sada halak na mabalu hara ni na manginjam bagi aha ia.

¹⁸Ingot hamu ma na jungada do hamu gabe hatoban di Mesir jana na dung dipalua TUHAN Debatamunu do hamu; hara ni i ma da umbaen na hulehen aturan on tu hamu.

¹⁹Muda palagutkon sagean ni gandum hamu, jana adong dope sasaotik na martinggalan gandum na dung disabi i, ulang be ulahi hamu mamuaisa. Angkon tadingkonon do gandum i baen di halak sileban, di na so marama, dohot di angka na mabalu, anso dipasupasu TUHAN Debatamunu i hamu di sandok na nibaenmunu.

²⁰Muda mamutik suha ni zetunmunu ho, ulang be pareso angka rantingna i paduanolihon; i ma na gabe bagian ni halak na asing, na so marama dohot na mabalu.

²¹Muda paluhutkon suha ni kobun anggurmu, ulang be pareso paduanolihon; i ma bagian ni halak na asing; na so marama dohot na mabalu.

²²Ulang hamu ra manghalupahon bahaso na jungada hamu gabe hatoban di Mesir; i do dalanna umbaen na hulehen aturan on tu hamu.