Read Batak Angkola PANGARATAION 27 Bible Online

PANGARATAION 27 - Batak Angkola bible

PANGARATAION 27

¹Dung i rap ma si Musa dohot angka pamimpin ni bangso i mandok tu bangso i, “Oloi hamu ma sude parenta na hulehen tu hamu di ari sadari on.

²Sadari on taripar ma hamu di Batang aek Jordan laho masuk tu tano na giot silehenon ni TUHAN Debatamunu tu hamu, angkon pajongjongonmunu do sanga na piga batu na godang, jana hapuri hamu ma.

³Angkon suratkononmunu do di angka batu i sude uhum dohot pangajaran on. ‘Muda dung dimasuhi hamu tano na mora boti na napu na nijanjihon ni TUHAN, Debata na nisomba ni ompumunu i,

⁴jana dung di bariba ni Batang aek Jordan hamu, angkon kehe do hamu tu Dolok Ebal. Di puncut ni dolok i ma pajongjong hamu angka batu i jana hapur hamu songon na huparentahon tu hamu sadari on.

⁵Angkon pajongjongonmunu do sada langgatan di inganan i sian angka batu na so unjung dikarejoi dope, dohot parkokas na sian bosi,

⁶angke angkon sian batu na so unjung dikarejoi dohot na so mabola do baenon sandok langgatan sipajongjongon di TUHAN Debatamunu. Angkon di ginjang ni langgatan i ma hamu manghaulkon angka haul situtungon.

⁷Angkon laing di inganan i muse ma hamu manghaulkon dohot mangankon haul pardonganan dohot mandok tarimakasi di adopan ni TUHAN Debatamunu.

⁸Di ginjang ni angka batu na dung dihapuri i angkon suratkononmunu do tangkas sandok hata na sian uhum ni Debata.’ ”

⁹Dung i rap ma si Musa dohot angka Malim Levi mandok tu sude bangso Israel, “Parate-atehon hamu ma ale bangso Israel, jana tangihon hamu ma! Di ari sadari on, madung gabe bangso ni TUHAN Debata hamu.

¹⁰Hara ni i, oloi hamu ma TUHAN i jana ihutkon hamu ma sude uhumNia na hulehen tu hamu sadari on.”

¹¹Dung i didok si Musa ma tu bangso Israel,

¹²“Dung ditaripari hamu Batang aek Jordan, angkon jongjong do Marga Simeon, Levi, Juda, Isakar, Josep dohot Benyamin di Dolok Gerisim di hatiha na pasahatkon hata pasupasu tu bangso on.

¹³Di hatiha na pajojorkon hata bura, angkon jongjong do Marga Ruben, Gad, Aser, Zebulon, Dan dohot Naftali di ginjang ni Dolok Ebal.

¹⁴Angkon dokkonon ni angka halak Levi do hata na mangihut on mardongan sora na gogo.

¹⁵Angka halak Levi mandok, ‘Bura ni Debata ma di jolma na mambaen patung sian batu, hayu sanga logam, jana na manyomba i di na buni; dihagigihon TUHAN do na mamele gana-ganaan!’ Sude bangso i mandok, ‘I ma tutu!’

¹⁶‘Bura ni Debata ma di halak na palayas amangna dohot inangna.’ Dung i sude ma bangso i mandok: ‘I ma tutu!’

¹⁷‘Bura ni Debata ma di halak na paimbar parbalohan dohot hombarna.’ Dung i sude ma bangso i mandok: ‘I ma tutu!’

¹⁸‘Bura ni Debata ma di halak na mangaliluhon halak na mapitung.’ Dung i sude ma bangso i mandok: ‘I ma tutu!’

¹⁹‘Bura ni Debata ma di halak na mangarampas hak ni halak sileban, dakdanak na so marama so marina dohot na mabalu.’ Dung i sude ma bangso i mandok: ‘I ma tutu!’

²⁰‘Bura ni Debata ma di halak na palayas amangna di na marcampur dohot sada sian ripe ni amangna.’ Dung i sude ma bangso i mandok: ‘I ma tutu!’

²¹‘Bura ni Debata ma di halak na marcampur dohot binatang.’ Dung i sude ma bangso i mandok: ‘I ma tutu!’

²²‘Bura ni Debata ma di halak na marcampur dohot ibotona kandung, sanga donganna saama sanga saina.’ Dung i sude ma bangso i mandok: ‘I ma tutu!’

²³‘Bura ni Debata ma di halak na marcampur dohot inang ni dongan saripena.’ Dung i sude ma bangso i mandok: ‘I ma tutu!’

²⁴‘Bura ni Debata ma di halak sibunu jolma di na buni.’ Dung i sude ma bangso i mandok: ‘I ma tutu!’

²⁵‘Bura ni Debata ma di halak na manjagit sogok laho mamunu sada halak na so marsala.’ Dung i sude ma bangso i mandok: ‘I ma tutu!’

²⁶‘Bura ni Debata ma di halak na so mangoloi sude uhum dohot pangajaran ni Debata.’ Dung i sude ma bangso i mandok: ‘I ma tutu!’ ”