Read Batak Angkola PANGARATAION 29 Bible Online

PANGARATAION 29 - Batak Angkola bible

PANGARATAION 29

¹On ma hata ni parjanjian na niparentahon ni TUHAN baenon ni si Musa dohot bangso Israel taran di tano Moab halahi. Songon tamba ni parjanjian na nibaen ni TUHAN dohot halahi na di Dolok Sinai do parjanjian on.

²Disuru si Musa ma marlagut sude halak Israel, jana didok ia ma tu halahi, “Madung diida hamu sandiri sanga aha na nibaen ni TUHAN maradopkon raja ni Mesir, angka menterina dohot tu sude luatna i.

³Madung diida hamu muse angka parmaraan na jorbut, angka tanda hahomangan dohot na so tarastui roha na nibaen ni TUHAN.

⁴Tapi lopus tu sadari on laing nada podo dilehen Ia pangastuion di hamu taringot tu sude na nialamanmunu i.

⁵Opat pulu taon lolotna dipimpin TUHAN hamu di parhorsihan, hapengani nada mumut pakean dohot sandalmunu.

⁶Nada adong rotimunu baen panganon, aek ni anggur sanga inuman na pamabukkon baen inumon, hapengani dilehen TUHAN do sude na porlu di hamu anso diboto hamu, Ia do Debatamunu.

⁷Jana di na lalu hita tu inganan on, ro do Raja Sihon sian Hesbon dohot Raja Og sian Basan mamorangi hita. Hape tataluhon do halahi,

⁸tarampas tano ni halahi lalu tabagi-bagi di Marga Ruben dohot Gad dohot di Marga Manase deba gabe arta pusako ni halahi.

⁹Jadi sai burju ma hamu antong mangoloi sude hata na sian parjanjian on anso mardohar hamu di sude na nibaenmunu.

¹⁰Sadari on jongjong do hamu sude di adopan ni TUHAN Debatamunu, sude pamimpin dohot parkarejo, sude halaklahi,

¹¹dadaboru dohot dakdanak, dohot sude halak sileban na maringanan di tonga-tongamunu partaba hayu dohot siporsan aek di hamu.

¹²Sadari on marlagut do hamu sude dison laho mamudun janji na giot baenon ni TUHAN Debatamunu dohot hamu songon i muse laho manjagit angka na patut sikarejohononmunu.

¹³Marhite parjanjian on saonnari, dirasmihon TUHAN ma hamu gabe bangsoNa, jana Ia gabe Debatamunu songon na nijanjihonNia tu hamu dohot tu ompumunu si Abraham, si Ishak dohot si Jakob.

¹⁴Nada hum tu hamu sajo dibaen TUHAN parjanjian dohot angka na patut sikarejohononmunu on.

¹⁵Tu hita sude do dibaen Ia parjanjian on, i ma angka na jongjong dison sadari on, di adopanNia, dohot muse tu pomparanta na so sorang dope.

¹⁶Diboto hamu do sanga songon dia bagianta di Mesir, jana songon dia na tataon mamolusi tano ni angka bangso na asing.

¹⁷Madung diida hamu angka patung sihagigian na nisomba ni halahi; angka patung na dibaen sian hayu, batu, perak dohot sere.

¹⁸Jadi, jago ma hamu, anso ulang jabat adong sahalak pe sian tonga-tongamunu, halaklahi sanga dadaboru, marsasaripe sanga marga na jongjong dison na marbalik sian TUHAN Debatanta laho marsomba tu angka debata ni bangso na asing i. Tudos do pangalaho na songon i tu urat na tubu gabe suan-suanan na paet boti halalango.

¹⁹Ulang ma adong dison sahalak pe na umbege sadari on pangidoan na koras i hapengani di bagasan rohania laing pos do rohania marnasib na denggan ia tongtong haru pe manggogo ia manustus dalannia sandiri. Hara ni i angkon diabiskon ma sude na maraek dohot na mahiang.

²⁰Nada ra TUHAN mangampuni jolma na songon i. Tapi rimas ni TUHAN na marpiar-piar do manutung halakna i jana ampe ma sude parmaraan na tarsurat di bagasan buku on tusia, lopus abis ia baenon ni TUHAN.

²¹Gabe tudosan ma i baenon ni TUHAN di sude marga ni Israel. UhumanNa ma i dohot parmaraan, hombar tu bura na didok di bagasan parjanjian songon na tarsurat di bagasan buku on, di buku pangajaran na sian TUHAN.

²²Di hatiha na giot ro, idaon ni pomparanmunu ma dohot angka bangso na asing na sian luat sihadaoan angka parmaraan dohot parkancitan na niparo ni TUHAN tu tanomunu on.

²³Gabe padang na gariang ma angka ladangmunu ditutupi barerang dohot sira. Nada tarsuani be tanona i, jana duhut pe nada ra be tubu disi. Tudos noma tanomunu i tu kota Sodom dohot Gomora, Adma dohot Zeboim na nironcohon ni TUHAN di na gurgur rimasNia.

²⁴Jadi gabe sapa-sapa ma na satano on, ‘Biasi songon i ulaning dibaen TUHAN tu tano ni halahi i? Aha do mambaen songon i jabat murukNia?’

²⁵Jana songon on ma alusna, ‘Hara ni na marbalik do bangso ni TUHAN i sian parjanjian na nibaen ni halahi dohot TUHAN, Debata ni ompu ni halahi, di na niobanNia halahi ruar sian Mesir.

²⁶Mamele halahi antong tu angka debata na asing na so jungada hian disomba halahi, hape nian na dung dilarang ni TUHAN hian do halahi mamele angka debata i.

²⁷I do dalanna umbaen na muruk TUHAN tu bangsoNa i jana diparo Ia di tano ni halahi sude parmaraan na tarsurat di bagasan buku on.

²⁸Ma pola marsijongjong rimas ni TUHAN maradopkon bangsoNia i, jana di bagasan rimasNia na jorbut i, diumpat Ia ma bangso Israel sian tano ni halahi i lalu diambungkon halahi tu tano sileban, jana disi ma halahi saonnari maringanan.’

²⁹Adong do sanga na piga pangalaho na nitabunihon ni TUHAN Debatanta; tapi anggo UhumNia madung nian dipatangkas Ia tu hita, jana angkon oloanta do i dohot pomparanta salolot-lolotna.”