Read Batak Angkola PANGARATAION 30 Bible Online

PANGARATAION 30 - Batak Angkola bible

PANGARATAION 30

¹“Saonnari bolas ma pilionmunu pasupasu sanga bura. Muda dung tarjadi sudena i tu dirimunu, jana maringanan di tonga-tonga ni angka bangso na asing hamu di inganan parserahanmunu dibaen TUHAN, tarsingot ma hamu di sipilion na hulehen tu hamu.

²Muda giot mulak hamu dohot pomparanmunu tu TUHAN, jana sian sandok rohamunu giot mangoloi angka parentaNia na hulehen tu hamu sadari on,

³jadi gabe ibo ma roha ni TUHAN Debatamunu i mida hamu. ObanonNia ma hamu mangulahi sian angka bangso inganan parserahanmunu i, jana baenonNia ma hamu maduma mangulahi.

⁴Haru marserak pe hamu lalu tu ujung ni tano tu inganan na dumao pe, laing palaguton ni TUHAN Debatamunu do hamu jana buatonNia hamu mulak.

⁵Jadi tarbaen hamu ma mangulahi mambuat tano i, tano na niinganan ni ompumunu narobi. Jana baenonNia hamu mur tu makmurna, jana bilanganmunu pe mur mabahat sian na jungada dialami angka ompumunu.

⁶LehenonNa ma di hamu roha na burju mangoloi, jadi gabe holong ma rohamunu di TUHAN Debatamunu sian sandok rohamunu, jana bolas ma hamu torus maringanan di tano i.

⁷Ampehonon ni TUHAN Debata ma tu angka musumunu na sai magigi mida hamu dohot na manyosak hamu angka bura i.

⁸Mangulahi ma hamu mangoloi TUHAN dohot mandalankon sude parentaNia na hulehen tu hamu sadari on.

⁹Sai mardohar ma hamu baenon ni TUHAN di sude na nikarejohonmunu; bahat ma dakdanakmunu jana bahat pahan-pahananmunu dohot hasil ni tanomunu. Songon jop ni rohaNia mangalehen hamakmuran di ompumunu, laing songon i do jop ni roha ni TUHAN mambaen hamu makmur.

¹⁰Tapi angkon oloanmunu do Ia jana oloanmunu sude uhumNia na tarsurat di bagasan buku on, buku pangajaran ni TUHAN. Angkon mulak do hamu tuSia sian sandok rohamunu.

¹¹Nada na mamaoltu sanga na so tarpadalan parenta na hulehen tu hamu sadari on.

¹²Nada di langit ingananna. Indangkon pola marsapa hamu, ‘Ise ma na manaek tusi dohot na marobansa mijur di hita, anso tarbaen hita manangihon dohot mangoloisa?’

¹³Nada di bariba ni laut muse ingananna. Indangkon pola marsapa hamu, ‘Ise ma he na manaripari laut i dohot na marobansa tu hita anso tarbaen hita manangihon dohot mangoloisa?’

¹⁴Nada! Dison, di hamu sandiri do hata i. Diboto jana tarenet hamu do i, antong oloi hamu ma i saonnari.

¹⁵Sadari on bolas ma pilionmunu hangoluan dohot na denggan, hamatean dohot hasusaan.

¹⁶Muda holong rohamunu tu TUHAN Debatamunu jana mangoloi hamu tuSia bope diihutkon hamu sandok uhum dohot parentaNia na hulehen tu hamu sadari on, gabe dapot hamu ngolu na sonang, jana gabe bangso na sonang. Pasupasuon ni TUHAN Debata ma hamu di tano na so sadia honok nari be giot siingananmunu.

¹⁷Tapi muda nada ra hamu mangoloi dohot manangihon jana dipadiar hamu dirimunu dililuhon laho mamele tu angka debata na asing,

¹⁸ingot hamu ma na hupaingot hamu sadari on: mago ma hamu. Nada maginjang umurmunu di tano na di bariba ni Batang aek Jordan na so sadia lolot nari be giot buatonmunu.

¹⁹Saonnari bolas ma pilionmunu, hangoluan sanga na hamatean, pasupasu ni Tuhan sanga na buraNia. Langit dohot tano hupio gabe saksina di haputusan sibaenonmunu. Antong pili hamu ma hangoluan.

²⁰Haholongi ma TUHAN Debatamu, oloi hamu ma Ia, jana setia ma hamu tuSia. Gabe siginjang umur ma hamu dohot pomparanmunu di tano na nijanjihon ni TUHAN tu ompumunu si Abraham, si Ishak dohot si Jakob.”