Read Batak Angkola PANGARATAION 31 Bible Online

PANGARATAION 31 - Batak Angkola bible

PANGARATAION 31

¹Dipaudut si Musa mandok hata tu bangso Israel,

²ning ia ma, “Saonnari madung marumur au saratus dua pulu taon jana nada lobas au be mamimpin hamu. Boti muse madung didokkon TUHAN na so tariparanku Batang aek Jordan i.

³TUHAN Debatamu sandiri ma mardalan di jolomunu dohot na mangabiskon angka bangso na maringan disi, anso laing tarbaen hamu mambuat tano ni halahi i. Si Josua ma mamimpin hamu, songon na nidok ni TUHAN i.

⁴Abiskonon ni TUHAN ma bangso i, songon ditaluhon Ia si Sihon dohot si Og, raja ni halak Amori lalu Dironcohon Ia luat ni halahi i.

⁵Lehenon ni TUHAN ma hamonangan di hamu maralohon halahi, jana angkon baenonmunu do tu halahi laing songon na hudokkon i tu hamu.

⁶Togu ma rohamunu jana barani! Ulang mabiar hamu mida halahi! Debatamunu i, TUHAN sandiri ma mandongani hamu. Nada pailaon sanga tadingkononNia hamu.”

⁷Dung i dipio si Musa ma si Josua, jana di jolo ni sude bangso Israel i didok si Musa ma tusia, “Sai pos ma rohamu jana barani, ale Josua! Ho noma na mamimpin bangso on laho mambuat tano na dung dijanjihon ni TUHAN i tu ompu ni halahi.

⁸TUHAN sandiri do na giot manogu dohot mandongani ho. Nada pailaon sanga tadingkononNia ho. Antong, ulang ho mabiar sanga hurang togu rohamu.”

⁹Dung i disuratkon si Musa ma angka Tona Ni TUHAN Debata jana dilehen ia ma i tu angka Malim Levi na ditugaskon mangurus Poti Parjanjian i, dohot tu angka pamimpin ni Israel.

¹⁰Diparentahon ia ma tu halahi, “Ganop di ujung ni taon papituhon, di Pesta Undung-undung Bulung Rata, di taon panyesaan ni angka utang, angkon sisehononmunu do buku on marsora na gogo.

¹¹Sise hamu ma i tu halak Israel di na ro halahi marsomba tu TUHAN Debatamunu di sada inganan paribadatan na dung ditontuhon.

¹²Suru ma marlagut sude halaklahi, dadaboru dohot dakdanak, dohot halak sileban na maringanan di hutamunu laho manangihon anso marsiajar halahi pasangapkon TUHAN Debatamunu, dohot manghaburjuhon mangoloi angka pangajaranNia.

¹³Jadi songon on ma dalanna di angka pomparanmunu na so jungada dope umbege Uhum Ni TUHAN Debatamunu i laho manangihonsa. Jana di na songon i, marsiajar ma halahi mangoloi Tuhan salolot mangolu halahi di tano na so sadia lolot nari be giot buatonmunu di bariba ni Batang aek Jordan.”

¹⁴Dung i didok TUHAN ma tu si Musa, “Nada pola lolot be ho mangolu. Jadi piohon ma si Josua, jana oban ma ia tu Bandar ParmiananKu, anso tarlehen Au angka panogu-noguon tusia.” Jadi kehe ma si Musa dohot si Josua tu Bandar Parmianan,

¹⁵jana haidaan ma TUHAN di halahi di bagasan tiang ombun di lambung ni pintu ni Bandar Parmianan.

¹⁶Didok TUHAN ma tu si Musa, “Nada pola sadia lolot nari marujung ma ngolumu. Dung salpu hamamatemu, nada setia be bangso Israel tu Au jana gagaan ni halahi ma parjanjian na Hubaen i dohot halahi. Tadingkonon ni halahi ma Au laho mamele tu angka debata na asing na nisomba ni angka na maringanan di tano na so sadia lolot nari be masuhanmunu.

¹⁷Muda tarjadi songon i, hona muruk ma halahi baenonKu. TadingkononKu ma halahi, tabunihononKu ma bohingKu maradopkon halahi jana pangabison halahi. Marroan ma bahat parmaraan na ampe tu halahi, jana botoon ni halahi ma umbaen na masa pe songon i tu halahi, angke Au do antong Debata ni halahi, hape nada Hudongani be halahi.

¹⁸Nada ra Au mangurupi halahi anggo di hatiha i, dibaen madung mambaen na jahat halahi jana marsomba tu angka debata na asing.

¹⁹Saonnari, suratkon ma ende on. Ajarkon ma i tu bangso Israel anso gabe hasaksian maradopkon halahi.

²⁰ObanonKu ma halahi tu tano na napu jana na marlobian susu dohot madu, songon na dung Hujanjihon tu ompu ni halahi. Dapot halahi ma disi sipanganon na porlu di halahi jana mangolu di bagasan sonang ma halahi. Tapi di pudian ni ari marbalik ma halahi jana marsomba tu angka debata na asing. Tulahon ni halahi ma Au jana gagaan ni halahi ma parjanjianKu,

²¹jana bahat ma parmaraan na jorbut ampe tu halahi. Tapi anggo ende on tongtong ma diendehon jana dipake gabe hasaksian maradopkon halahi, harana laing tong-tong do i endehonon ni pomparan ni halahi. Salang saonnari pe, painte so Huoban halahi tu tano na Hujanjihon i, Huboto do pardangolan ni pikiran ni halahi.”

²²Laing di na sadari i do disuratkon si Musa ende i lalu diajarkon ia tu bangso Israel.

²³Dung i mangkuling ma TUHAN tu si Josua, anak ni si Nun, ninna ma, “Patogu ma rohamu jana barani! Ho noma mamimpin bangso Israel mamasuhi tano na dung Hujanjihon tu halahi, jana Au ma mandongani ho.”

²⁴Dung i disuratkon si Musa ma Tona Ni TUHAN di bagasan sada buku. Tangkas do panyuratna dibaen ia anso ulang adong na lupa panyuratna.

²⁵Dung sidung, didok ia ma tu angka Malim Levi na dikarejokon mangurus Poti Parjanjian i,

²⁶“Buat hamu ma Buku Tona Ni Debata on, jana payakkon ma di lambung ni Poti Parjanjian ni TUHAN Debatamunu i, anso laing hot ma i disi gabe hasaksian maradopkon bangsoNa i.

²⁷Huboto do sanga na bia jogal ni roha ni bangso i jana na sai tagi-tagi mangalo. Na dung mangalo do halahi tu TUHAN salolot mangolu au, jana mur mangalo dope i muse dung marujung ngolungku.

²⁸Antong, suru hamu ma marlagut sude pamimpin ni marga dohot angka ulubalang di jolongku, anso hupalalu angka pangalaho on tu halahi. Langit dohot tano ma hupiohon gabe saksina maradopkon halahi.

²⁹Huboto do, muda dung marujung ngolungku, marjahati ma angka jolma jana tulakkononna ma sanga aha na dung huajarkon tu halahi. Di pudian ni ari, ampe ma parmaraan tu halahi, patunda ni na mangalapi muruk ni TUHAN marhite na mambaen na nilarangNia.”

³⁰Dung i dipajojor si Musa ma ende on lopus sidung jana sude ma bangso Israel manangihonsa.