Read Batak Angkola PANGARATAION 33 Bible Online

PANGARATAION 33 - Batak Angkola bible

PANGARATAION 33

¹Painte so marujung ngolu ni si Musa, utusan ni Debata i, dipasupasu ia ma marga-marga ni bangso Israel, dohot hata on:

²“Ro do TUHAN sian Dolok Sinai bincar di ginjang ni Edom songon mataniari. Sian Dolok Paran murgap Ia laho manyondangi bangsoNa, diudurkon sampulu ribu surusuruan api na marjilam di tanganna songon hilap.

³Dihaholongi TUHAN do bangsoNa dijagohon Ia do nampunaNia. Manungkap ma hita di jolo ni patNia mangoloi angka parentaNa.

⁴Taoloi ma Tona Ni TUHAN na nilehen ni si Musa, i ma sinadongan ni bangso on na ummarga.

⁵Di na marlagut bangso on dohot angka pamimpinNa, TUHAN do na gabe raja di bangsoNa.”

⁶Salaho tu Marga Ruben didok si Musa ma: “Sai ulang nian Marga Ruben unjung pusa, haru pe hum saotik bilanganna.”

⁷Salaho tu Marga Juda didok ia: “TUHAN, tangihon ma pio-pio ni halahi. Anso marsada dohot marga na asing mangulahi. Urupi ma halahi di paraloan, mangadopi musu ni halahi.”

⁸Salaho tu Marga Levi didok ia: “Marhite Urim dohot Tumim[1] torang ma giot ni rohamu, sian halak Levi naposoMu na burju-burju. Diuji Ho do halahi di Masa, martangkangi dohot halahi di sumur Meriba.

⁹Sumurung do haburjuon ni halahi tu Ho. Sumurung sian simatobang maradu koum sisolkot. Dioloi halahi do angka parentaMi parjanjianMu pe digohi.

¹⁰Diajari halahi do bangsoMu mangoloi UhumMu; dibaen halahi do haul di langgatanMu.

¹¹TUHAN, dongani ma marga on anso margogo, marhite na nibaen ni halahi, anso sonang Ho. Ropuk ma sude musu ni halahi; anso ulang be bisa halahi bangkit.”

¹²Salaho tu Marga Benyamin didok ia: “On ma marga hasudungan marga na nihaholongan ni TUHAN. Dijagohon Ia do i borngin dohot arian di antara ni dolokNia halahi maringanan.”

¹³Salaho tu Marga Josep didok si Musa ma: “Sai dipasupasu TUHAN ma tano ni halahi mardongan aek sian toru ni tano dohot udan sian langit i.

¹⁴Na lobi jeges sian na nisuhahon ni mataniari dohot na lobi jeges na nitubuhon ni bulan,

¹⁵dohot na umporlu sian dolok-dolok mulai najolo, dohot na umporlu sian angka tor na marratus taon,

¹⁶dohot na lobi jeges sian sude isi ni portibi on, na nisatujui ni TUHAN sian ramba na gara di si Josep ma pasupasu on dohot di pomparanna. Si Josep on do pamimpin di kahanggina.

¹⁷Gogo ni si Josep songon lombu harangan marribu pinompar ni si Manase, marpulu ribu pinompar ni si Efraim i ma tanduknia. Didogo ia angka bangso dionjar ia halahi lopus tu ujung ni tano.”

¹⁸Salaho tu Marga Zebulon dohot Isakar didok si Musa: “Sai mardohar ma Zebulon hara ni boniaga di laut jana hamoraon ni Isakar martamba di hutana.

¹⁹Diontang halak sileban tu dolok ni halahi haul na asli dihaulkon disi. Sian laut halahi dapotan arta sian horsik sapanjang ni pantaina.”

²⁰Salaho tu Marga Gad didok si Musa: “Nipuji ma Debata na mangalehen tano i tu si Gad maradu bidang anso diingani. Inte si Gad suman tu singa laho mangaluak tangan sanga uluna.

²¹Tano na dumenggan do dibuat baen ia puna, bagian ni pamimpin do dilehen disia. Oloanna do Uhum Ni TUHAN maradu sude parenta di na marpokat pamimpin ni Israel sudena.”

²²Salaho tu Marga Dan didok si Musa, “Singa na poso do si Dan. Mangalumpat ia ruar sian Basan.”

²³Salaho tu Marga Naftali didok si Musa: “Dipalobi do tu Naftali pasupasu holong ni roha ni TUHAN; tanonia manggistang sian Dano Galilea tu Selatan.”

²⁴Salaho tu Marga Aser didok si Musa: “Sian sude marga ni Israel na umbahat do marpasupasu Marga Aser. Haholongan ni kahanggina do ia zetun pe tubu simbur di tanonia.

²⁵Angka hutana pe dijagoi pintu bosi anso mangolu ia di bagasan dame humani.”

²⁶“O, Israel, boto hamu ma, sumurung do Debata sian sasude debata. Dibolus Ia do langit di bagasan hamuliaan mamintas di ombun mangalehen di hamu tolongan.

²⁷Sai tongtong do Debata na gabe pambelamunu; tanganNa na so ra mantak i panungkolmunu. Dipaorot Ia musu sian jolomunu, disuru Ia ho mangaropuk sude alomu.

²⁸Mardame ma ngolu ni pomparan ni si Jakob i, sonang di tano na jogi gandum dohot aek ni anggur marlobi-lobian mangaehi tanona pe ombun na sian langit an.

²⁹O Israel, na godang ma antong tuamu, nada adong bangso na dipalua songon bangsomu. TUHAN i sandiri do parince dohot podangmu, mambela dohot mangalehen hamonanganmu. Marroan ma musumu mangido ibo ni roha, dege-degeonmu ma halahi sudena di dolok-dolok ni halahi.”