Read Batak Angkola PANGARATAION 34 Bible Online

PANGARATAION 34 - Batak Angkola bible

PANGARATAION 34

¹Dung i kehe ma si Musa sian napa ni Moab jana manangkok ma ia tu Dolok Nebo, tu puncut ni Dolok Pisga na di Habincaran ni Jeriko. Disi ma dipatuduhon Debata luat i sude tusia, i ma: Tano Gilead di Utara lopus tu kota Dan;

²sudena Luat Naftali; Luat Efraim dohot Manase, Luat Juda sabola Hasundutan lalu tu Laut Tonga;

³bagian Selatan ni Juda dohot tano napa na manggistang sian Zoar tu Jeriko kota na gok dohot kurma.

⁴Dung i didok TUHAN ma tu si Musa, “On ma da tano na Hujanjihon i tu si Abraham, si Ishak dohot si Jakob sipasahaton tu pomparan ni halahi. Hupatidahon do i tu ho Musa, tapi nada Hupatola ho kehe tusi.”

⁵Jadi marujung ma ngolu ni si Musa, naposo ni TUHAN i di tano Moab, laing songon na nidok ni TUHAN i hian.

⁶Dikuburkon TUHAN ma ia di sada rura di Moab, di bariba ni kota Bet-Peor, tapi lopus tu sadari on nada adong sada halak pe na mamboto tanomanna i.

⁷Marumur ma si Musa saratus dua pulu taon di na marujung ngolunia. Nada surut gogonia jana parnidaannia pe laing tajom do.

⁸Tolu pulu ari honokna bangso Israel marsiluluton di napa ni Moab hara ni hamamate ni si Musa.

⁹Digohi TUHAN ma si Josua anak ni si Nun dohot habisuhon dibaen madung ditodo si Musa ia gontinia. Mangoloi do bangso Israel tu si Josua jana didalankon halahi do angka parenta na nilehen ni TUHAN tu halahi markite-hite si Musa.

¹⁰Nada adong dope di Israel sada panurirang songon si Musa na paadop-adop mangkobari dohot TUHAN.

¹¹Nada unjung adong panurirang na asing mambaen tanda hahomangan dohot na so haastuan songon na nibaen ni si Musa i maradopkon sude tano Mesir, rajana maradu angka menterina hombar tu parenta ni TUHAN.

¹²Nada adong jungada panurirang na asing na patupahon angka pambaenan songon na nibaen ni si Musa i godangna dohot jorbutna di adopan ni sude bangso Israel.