Read Batak Angkola PANGARATAION 5 Bible Online

PANGARATAION 5 - Batak Angkola bible

PANGARATAION 5

¹Dipalagut si Musa ma sude bangso Israel jana didok ia ma tu halahi, “Dongan sabangso, tangihon hamu ma sude aturan na giot silehenonku tu hamu sadari on. Parsiajari hamu ma angka aturan i jana haburjuhon hamu ma mangoloisa.

²Dibaen TUHAN Debatanta do sada parjanjian di Dolok Sinai,

³nada hum tu angka ompunta i, tapi dohot do tu hita na mangolu di ari sadari on.

⁴Mangkobari do TUHAN di ginjang ni dolok i sian api paadop-adop dohot hamu.

⁵Jongjong do au di hatiha i di antaramunu dohot TUHAN laho palaluhon tu hamu sanga aha na nidok ni TUHAN, angke mabiar do hamu tu api i jana nada ra hamu manganangkohi dolok i.

⁶Ninna Debata ma, ‘Au do TUHAN Debatamu, na maroban hamu ruar sian tano Mesir, sian inganan parhatobanan i.

⁷Ulang adong di ho debata na asing di jolongKu.

⁸Ulang baen di ho patung na manyarupai sanga aha pe diginjang di langit sanga na adong di tano, bope na di aek na di toru ni tano.

⁹Ulang unduk marsomba tu angka i sanga marsomba tu sudena i, angke Au, TUHAN Debatamu, i ma Debata na so ra padiarkon adong imbangKu, na mambaloskon hasalahan ni ama-ama tu dakdanakna, lopus tu sundut patoluhon dohot paopatkon sian halak na margoyak ni roha tu Au.

¹⁰Tapi patuduhononku do holong ni rohangKu tu marribu-ribu halak, i ma na manghaholongi Au jana na mangoloi di parentangKu.

¹¹Ulang dokkon goar ni TUHAN Debatamu, di na so dalanna, dibaen uhuman ni TUHAN do halak na mandok goarNia di na so dalanna.

¹²Pagodang ma Ari Sabat, anso diparbadiai ho ari i, angke Au do TUHAN Debatamu na mamarentahon i tu ho.

¹³Onom ari ma lolotmu mangkarejohon sude karejomu,

¹⁴tapi ari papituhon, i ma Ari Sabat ni TUHAN Debatamu. Nada jadi mangkarejohon nasa karejo di na sadari i — bope ho, bope anakmu, bope borumu, bope naposomu halaklahi, bope naposomu dadaboru, bope lombumu, bope halodemu, sanga halak na mardagang di hutamu. Angka naposomu pe angkon maradian do laing songon ho sandiri.

¹⁵Ingot ma, na diparhatoban do ho di Mesir jana Au do TUHAN Debatamu na dung paluahon ho mardongan hagogoon na godang. Hara ni i ma umbaen na Huparentahon tu ho laho manghagodangkon Ari Sabat i.

¹⁶Pasangap ma amangmu dohot inangmu; songon na diparentahon ni TUHAN Debatamu, anso sonang jana ginjang umurmunu di tano na nilehen ni TUHAN Debatamu di ho.

¹⁷Ulang mamunu.

¹⁸Ulang markarosuan.

¹⁹Ulang manangko.

²⁰Ulang manyaksihon gabus maradopkon donganmu jolma.

²¹Ulang marpor ni roha tu dadaboru ni donganmu jolma, ulang marpor ni roha di bagasna, tanona, bope naposona halaklahi, bope naposona dadaboru; bope di lombuna, bope di halodena, bope sanga aha nampuna ni donganmu jolma.’

²²I ma angka parenta na nilehen ni TUHAN tu bangso na marlagut di dolok i. Di na mangkuling Ia mardongan sora na mangaronggur sian api dohot ombun dohot hagolapan i, disi ma Dilehen Ia angka parenta on, jana nada adong na asing Dilehen Ia. Lalu disuratkon Ia muse ma i di batu siduangkoping jana Dilehen Ia ma i tu au.”

²³“Di na marjilam-jilam dolok i jana dibege hamu sora sian hagolapan, ro ma angka pamimpin dohot kapala ni angka marga-margamunu tu au.

²⁴Didok halahi, ‘Dipatuduhon TUHAN Debatanta i do hagodangan dohot hamuliaanNa di na hami bege Ia mangkuling sian api i! Madung hami saksihon di ari sadari on, na bolas do di sada-sada halak laing hot tongtong mangolu, haru pe na dung mangkuling Debata tusia.

²⁵Hapengani tu aha dope angkon sai porangkononnami hosanami? Na giot abiskonon ni api na jorbut i ma hami. Anggo ning rohanami na mate ma hami muda hami bege TUHAN Debatanami mangkuling mangulahi.

²⁶Adong ma he jungada halak na laing mangolu songon hami dung dibegesa Debata na mangolu i mangkuling sian api?

²⁷Antong Musa, ho ma kehe laho manangihon sandok na nidok ni TUHAN Debatanta i. Dung salpu i, angkon mulak ho laho palaluhon tu hami sanga aha, na nidokNa i tu ho. Tangi ma hami jana mangoloi.’

²⁸Di na nibege ni TUHAN taringot tusi, didok Ia ma tu au, ‘Madung hubege sanga aha na nidok ni bangso on, jana tutu do na nidok ni halahini i.

²⁹Sugari nian sai songon i ma pangkilalaan ni halahi! Sugari sai tongtong halahi nian mabiar tu Au jana dioloi sude na Huparentahon, gabe sonang do halahi dohot pomparan ni halahi salolot-lolotna.

³⁰Kehe ma ho saonnari, jana suru ma mulak bangso i tu bandarna be.

³¹Tapi anggo ho, Musa, dison ma ho rap dohot Au, lehenonKu ma tu ho sude aturan dohot parentangKu. Angkon ajarkononmu do i tu bangso i anso dioloi halahi i di tano na giot silehenonKu tu halahi.’

³²Angka dongan sabangso, burju be ma hamu mangoloi sasude na niparentahon ni TUHAN Debatamunu i tu hamu. Ulang adong sada pe sian angka parenta i langgar hamu.

³³Oloi hamu ma i sudena, anso sonang hamu jana tarbaen tongtong mangingani tano na giot siingananmunu i.”