Read Batak Angkola PANGARATAION 7 Bible Online

PANGARATAION 7 - Batak Angkola bible

PANGARATAION 7

¹“Giot obanon ni TUHAN Debatamu ma ho tu tano siingananmu jana paorotonNia ma bahat bangso sian i. Di jolo ni matamu ayahonNia ma pitu bangso na gumodang jana na gumogo sian ho: Halak Het, Girgasi, Amori, Kanaan, Peris, Hewi dohot Jebus.

²Muda dipasahat TUHAN Debatamu angka bangso i tu bagasan kuasomu jana talu halahi dibaen ho, angkon bunuonmunu do sude halahi. Ulang baen parjanjian dohot halahi, sanga pe maribo ni roha.

³Nada tola ho marbagas dohot halahi, ulang patola angka dakdanakmu marbagas dohot sada halak sian halahi,

⁴anso ulang dipadao halahi angka dakdanakmu sian TUHAN laho marsomba tu angka debata na asing. Muruk do TUHAN tu hamu muda marsomba ho tu angka debata na asing jana manigor do pusaonNia ho.

⁵Antong, angkon parrumpakkononmunu do angka langgatan ni bangso i, ropuhi hamu angka tiang batu na nietong ni halahi keramat, rumpakkon hamu angka gambaran ni Asera dewi ni halahi i jana tutungi hamu angka patung na nisomba ni halahi.

⁶Baen hamu ma sudena i, dibaen bangso na badia di TUHAN Debatamu do hamu. Sian sasude bangso na di sisik ni tano on, hamu do na nipiliNia na gabe bangso hapunjunganNia.

⁷Na nihaholongan jana na nipili ni TUHAN do hamu, nada hara ni na gumodang hamu sian angka bangso na asing, hamu noma tehe bangso na ummenek di tano on sudena.

⁸Tapi dihaholongi TUHAN do hamu jana giotNia do manggohi janji na nibaenNia dohot ompumunu. I ma dalanna umbaen na dipalua Ia hamu mardongan kuaso na godang, jana dipalua Ia hamu sian parhatobanan, sian kuaso ni raja ni Mesir.

⁹Ingot hamu ma! Sasada TUHAN Debatamunu i do Debata, jana Debata na setia do Ia. Tu angka na manghaholongi Ia jana na mangoloi angka parentaNia, patulusonNia ma janjiNa jana patuduhononNia ma holong ni rohaNia na manongtong i lopus tu sundut pasaribuhon.

¹⁰Tapi nada maralang-alang Ia manguhumi angka na magigi tuSia.

¹¹Jadi, angkon oloanmunu do sasude na dung diajarkon i tu hamu, oloi hamu ma sude aturan na Hulehen tu hamu di ari on.”

¹²“Muda sai diparate-atehon hamu do angka parenta on, jana dihaburjuhon hamu mangoloisa, gabe setia muse ma TUHAN Debatamunu i tu parjanjian na nibaenNia dohot hamu. PatuduhononNia ma holong ni rohaNia na manongtong i tu hamu, songon na nijanjihonNia tu ompumunu.

¹³HaholonganNia jana pasupasuonNia ma hamu, anso mur mabahat bilanganmunu; pasupasuonNia angka ladangmunu, anso gabe haroroan ni gandum, anggur dohot miak zetun. PasupasuonNa ma hamu marhite lombu dohot biri-biri na bahat. Lehenon ni Tuhan ma sude pasupasu i tu hamu di tano na giot silehenonNia tu hamu hombar tu janjiNia dohot ompumunu.

¹⁴Sian sasude bangso na di tano on, umpe sada na dapotan pasupasu na songon i godang songon hamu. Sian sude hamu dohot sandok pahan-pahananmunu, sada pe nada adong na so martamba bahatna.

¹⁵Jagohonon ni TUHAN do hamu sian sude nyae na masa, jana dipadao sian sude nyae na masa godang na niidamunu di Mesir, tapi dihonahon ma angka bala i tu angka musumunu.

¹⁶Sandok bangso na nipasahat ni TUHAN Debatamu tu bagasan kuasomunu, siabiskononmunu do sudena i; ulang patuduhon hamu ibo ni roha tu halahi. Ulang somba hamu angka debata ni halahi, dibaen na mangalapi hamatean tu dirimunu do pangalaho na songon i.

¹⁷Ulang dokkon hamu di bagasan rohamunu na umbahat do bilangan ni angka bangso i sian hamu gabe nada tarpaorot hamu halahi.

¹⁸Ulang mabiar hamu tu halahi; ingot hamu na sanga aha na dung dibaen TUHAN Debatamunu tu raja ni Mesir dohot sude rayatna i.

¹⁹Ingot hamu ma angka parmaraan godang na niidamunu sandiri, angka tanda na pahomang roha, dohot hagogoan godang na nipake ni TUHAN Debatamunu laho paluahon hamu. Sude bangso na nihabiaranmunu abiskononNa do i songon pangabiskonNa di halak Mesir.

²⁰BaenonNia tehe dut ni roha ditonga-tonga ni halahi jana angka jolma na kehe maporus martabuni, roncohononNia.

²¹Jadi ulang hamu mabiar tu angka bangso i. TUHAN Debatamunu rap dohot hamu. Debata na tongam do Ia; sai habiari hamu ma Ia.

²²PaorotonNa muli-muli abis angka bangso i di jolo ni matamunu. Nada tarbaen hamu mamusa halahi anggo sanoli mangabisi, anso ulang martamba bahat ni binatang panyoro na gabe parmaraan na mangondam tu hamu.

²³Pasahaton ni TUHAN ma angka musumunu tu hamu. BaenonNia halahi lenong anso gabe hona pusa halahi.

²⁴Pasahaton ni TUHAN angka raja ni halahi tu bagasan kuasomunu. Bunuonmunu ma halahi, jana halupahonon ma halahi saulahon. Sada halak pe nada adong na tarbaen mangambati hamu; sandok halak angkon abiskononmunu.

²⁵Angkon tutunganmunu do sude angka patung na nisomba ni halahi, ulang por rohamunu di sere sanga perak na lohot di angka patung i jana ulang buat hamu muse i baen di hamu sandiri. Muda dilanggar hamu parenta on, mate ma hamu, angke magigi do TUHAN maradopkon parsombaan tu patung.

²⁶Sada pe sian angka patung i ulang jabat dioban hamu tu bagasan bagasmunu, anso ulang madabu tu hamu bura na di ginjang ni halahi. Angkon magigi do hamu jana angkon layas do idaonmunu angka patung i, angke na hona bura ni TUHAN do i.”